MAKTABGAChA TAʼLIM SOHASIDAGI ISLOHOTLAR — FAOLIYaTIMIZDAGI YuTUQLARNING BOSh OMILIDIR
Mamlakatimizda maktabgacha taʼlim tizimida amalga oshirilayotgan keng koʻlamli islohotlar yosh avlodning har tomonlama barkamol rivojlanishi uchun mustahkam poydevor yaratmoqda. Davlat siyosatining ustuvor yoʻnalishlaridan biriga aylangan bu jarayonlar chekka hududlarda ham oʻz samarasini bermoqda. Bizning Doʻstlik mahallasi hududida joylashgan 7-sonli maktabgacha taʼlim tashkilotimiz faoliyati misolida ham ana shu islohotlarning amaldagi ifodasini yaqqol koʻrish mumkin.
Muassasamiz 2010-yilda “Rohat” nomli maktabgacha taʼlim muassasasi sifatida tashkil etilgan. 2018-yilda bogʻcha binosi tubdan rekonstruktsiya qilinib, Amudaryo tuman maktabgacha taʼlim boʻlimiga qarashli 7-sonli maktabgacha taʼlim muassasasi deb nomlandi. Yangi bino maxsus loyiha asosida 70-oʻringa moʻljallab qurilgan ikki qavatli inshootdan iborat. Muassasaning tevarak-atrofi toʻliq oʻralgan boʻlib, obodonlashtirish va koʻkalamzorlashtirish ishlari muntazam ravishda olib boriladi. Bu esa bolalarning xavfsiz va sogʻlom muhitda tarbiyalanishini taʼminlamoqda.
Bugungi kunda 7-sonli davlat MTTda 200 nafarga yaqin bola taʼlim-tarbiya olmoqda. 5 ta asosiy guruh mavjud boʻlib, har bir guruhda 25 nafardan jami 125 nafar bola tarbiyalanadi. Shuningdek, 2 ta majburiy guruhda 25 nafardan, jami 50 nafar bola qamrab olingan. Bolajonlarga 35 nafar pedagog xodimlar taʼlim-tarbiya berishmoqda. Shulardan 15 nafari tarbiyachilar va 9 nafari yordamchi tarbiyachilardir. Tarbiyachilarning 6 nafari oliy, 3 nafari esa tugallanmagan oliy maʼlumotli kadrlardir.
Maktabgacha taʼlim tashkilotimizning zamonaviy binosida 3 ta guruh uchun xonalar, oshxona, tibbiy xizmat boʻlimi, omborxona, musiqa va sport xonalari, bolalar maydonchalari va ayvonchalar, sport maydonchasi mavjud. Shuningdek, ekin maydonchalari ham tashkil qilingan boʻlib, bu bolalarning tabiat bilan yaqin muloqotda boʻlishiga imkon beradi. Muassasamiz zamonaviy mebel jihozlari, televizorlar bilan taʼminlangan. Guruhlarda 5 ta rivojlantiruvchi markazlar hamda “Maʼnaviyat” va “Sport” burchaklari tashkillashtirilgan. Bularning barchasi bolalarning har tomonlama rivojlanishi, ularning qiziqishlarini uygʻotish va ijodiy qobiliyatlarini shakllantirishga xizmat qilmoqda.
Ayni kunlarda muassasamizda maktabgacha yoshdagi bolalarga taʼlim va tarbiya berish, ularni sogʻlomlashtirish, maktabga tayyorlash, sifatli va sogʻlom ovqatlanishini taʼminlash borasida keng koʻlamli ishlar olib borilmoqda. Pedagog va tarbiyachilarimiz bolalarning nafaqat bilim olishi, balki ijtimoiy koʻnikmalarni egallashi, jismonan chiniqishi va maʼnan yuksalishi uchun imkoniyatlarini toʻliq safarbar qilgan holda faoliyat yuritmoqdalar. Zamonaviy oʻquv dasturlari va innovatsion pedagogik texnologiyalardan samarali foydalanayotgan jamoamiz bogʻchamizni tumandagi namunali muassasalardan biriga aylantirishga intilmoqdalar.
Fursatdan foydalanib, muassasamiz jamoasi va barcha hamkasblarimizni 1-oktyabr — Oʻqituvchi va murabbiylar kuni bilan chin qalbimdan tabriklayman! Yurtimizdagi barcha maktabgacha taʼlim tashkilotlaridagi aziz ustoz va murabbiylarning, qadrli hamkasblarimizning murgʻak bolajonlarni ilm-fan olamiga yetaklash, ularga dunyoni tanitishdek sharafli va mashaqqatli faoliyatida kuch-gʻayrat tilayman!
Barno XUDOYBERGENOVA, 7-sonli MTT mudirasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
