Amudaryo tumanida Oʻqituvchi va murabbiylar kuni keng nishonlandi

Har bir millatning ertangi kuni, taraqqiyoti va ravnaqi yosh avlod taʼlim-tarbiyasiga bogʻliq. Bu ishni esa yuksak maʼrifat va sabr-toqat bilan amalga oshiruvchi shaxslar – bu ustozlardir. Shu bois ham yurtimizda 1-oktyabr — Oʻqituvchi va murabbiylar kuni ushbu kasb egalariga yuksak ehtirom ramzi sifatida keng nishonlanadi.

Amudaryo tumanida ham ushbu qutlugʻ sana katta koʻtarinkilik bilan nishonlandi. Tuman hokimligi tashabbusi bilan “Sher” toʻyxonasida ustoz va murabbiylar uchun bayram dasturxoni yozildi.

Tantanali tadbirda Oliy Majlis Qonunchilik palatasi deputati Sapargul Utemuratova, tuman hokimi oʻrinbosari Nodirbek Kamolov, tuman Maktabgacha va maktab taʼlimi boʻlimi boshligʻi Yalgʻash Shomuratov, Xalq deputatlari tuman Kengashi kotibiyati mudiri Mansur Oʻrazboyev hamda boshqa masʼul shaxslar ishtirok etib, fidoyi pedagoglarni samimiy tabrikladilar.

Tadbirda soʻz olganlar bugungi kunda mamlakatimizda oʻqituvchi va murabbiylarning jamiyatdagi mavqeini yuksaltirish, taʼlim-tarbiya sifatini oshirish borasida amalga oshirilayotgan keng qamrovli islohotlarga alohida toʻxtalib oʻtishdi. Jumladan, oʻqituvchilarning mehnatini munosib qadrlash, ularning ijtimoiy himoyasini kuchaytirish, moddiy-maʼnaviy ragʻbatlantirish boʻyicha qilinayotgan saʼy-harakatlar haqida soʻz yuritildi. Ustoz va murabbiylarning jamiyatdagi oʻrni hech qachon yoʻqolmasligi, bugungi islohotlarning bosh maqsadi ham aynan taʼlim-tarbiya sohasi fidoyilarining mehnatini eʼzozlash, kelajak avlodni bilimli, yurtga sadoqatli qilib tarbiyalash ekanligi alohida eʼtirof etildi.

Tadbir davomida yosh avlod tarbiyasiga oʻz hissasini qoʻshib kelayotgan, bu borada yuksak natijalarga erishgan bir guruh ustoz va murabbiylar, tarbiyachi, pedagog xodimlar tuman hokimining tashakkurnomasi hamda taʼlim va fan xodimlari kasaba uyushmasi tuman boʻlinmasi kengashi tomonidan esdalik sovgʻalari bilan taqdirlandilar. Bu, albatta, ularning fidokorona mehnatiga boʻlgan munosib eʼtibor va hurmat ifodasi boʻldi.

Taʼkidlash joizki, har bir xalq oʻzining maʼnaviy kamoloti va kelajagini taʼlim-tarbiya tizimisiz tasavvur eta olmaydi. Ustoz – bu millatning maʼnaviy poydevorini yaratuvchi, kelajak avlodni tarbiyalovchi buyuk shaxsdir. Shu bois, ularning mehnatini qadrlash, ustoz shaxsiga ehtirom koʻrsatish barcha davrlarda dolzarb boʻlib kelgan.

Shu bois yurtimizda taʼlim-tarbiya tizimini tubdan isloh qilish, oʻqituvchi va murabbiylarning jamiyatdagi mavqeini yuksaltirish, ularning mehnatini munosib qadrlash davlat siyosatining ustuvor yoʻnalishlaridan biri sifatida belgilangan.

Oʻtkazilgan bayram tadbirida tuman Madaniyat boʻlimi sanʼatkorlari tomonidan ijro qilingan shoʻx kuy-qoʻshiqlar, bildirilgan samimiy tabriklar, mehr va ehtiromga boy daqiqalar barchaga unutilmas bayramona kayfiyat ulashdi. Bu kabi hurmat va ehtirom, berilgan yuksak eʼtibor esa ustozlarning mehnatini qadrlash ramzi, davlatimiz va jamiyatimizning ularni naqadar eʼzozlashining amaldagi isboti boʻldi.

Charos Arslonova, tuman hokimligining Axborot xizmati rahbari.