Uyshin mahallasida yangi tibbiyot maskani foydalanishga topshirildi

6-oktyabr sanasi Amudaryo tumanining olis va chekka hududlaridan biri — Uyshin mahallasi aholisi uchun unutilmas, tarixiy kunlardan biri boʻldi. Shu kuni mahalla ahli uzoq yillar davomida orziqib kutgan yangi oilaviy shifokorlik punkti foydalanishga topshirildi.

Mazkur zamonaviy tibbiyot maskani mahalla aholisi hayotida katta qulaylik yaratadi. Chunki ilgari Uyshin mahallasi aholisi Qipchoq shaharchasi hududidagi 1-sonli oilaviy poliklinikaga borib tibbiy xizmat olishga majbur edi. Poliklinika mahalladan 8–9 chaqirim uzoqlikda joylashgani, ayniqsa qishning izgʻirinli kunlarida yoki yozning jazirama issigʻida transport vositasi topish mushkulligi sababli, bu yoʻl keksalar va yosh bolali ayollar uchun ayniqsa ogʻir kechardi.

Aholining ana shunday ehtiyojini inobatga olgan holda, saxovatpesha tadbirkorning tashabbusi qoʻllab-quvvatlandi va Qoraqalpogʻiston Respublikasi Sogʻliqni saqlash vazirligi tomonidan Uyshin mahallasi hududida yangi tibbiy punkt qurish loyihasi tasdiqlandi. Eng eʼtiborlisi shundaki, mazkur inshoot toʻliq tadbirkor homiyligida barpo etildi — bu esa xususiy sektorning ijtimoiy sohadagi faol ishtirokining yorqin namunasi boʻldi.

Ochilish marosimida tuman hokimligi masʼullari, sogʻliqni saqlash tizimi rahbarlari, nuroniylar, keng jamoatchilik vakillari hamda mahalla aholisi ishtirok etdi.

Tadbirda soʻzga chiqqanlar ushbu xayrli tashabbus uchun saxovatpesha tadbirkorga chuqur minnatdorchilik bildirib, uning mahalla aholisi farovonligi yoʻlida amalga oshirgan ezgu ishlarini yuksak eʼtirof etdilar. Tadbirkorning xalq manfaati yoʻlidagi bunyodkorlik ishlari, nafaqat Uyshin mahallasi aholisi uchun qulaylik yaratdi, balki uning ijtimoiy masʼuliyati, vatanparvarlik va mehr-oqibat kabi fazilatlarining yorqin namunasi boʻldi.

Bu kabi xayrli ishlar zamirida inson salomatligini asrash, jamiyat farovonligiga hissa qoʻshish kabi ezgu maqsadlar mujassam. Shuning uchun ham bu tashabbus jamoatchilik tomonidan eʼtirof etilib, fidoyi tadbirkorning mehnatlari alohida qadrlandi.

Tabrik va qutlovlardan keyin ramziy tasma kesilib, zamonaviy tibbiy jihozlar bilan taʼminlangan yangi bino oʻz faoliyatini boshladi.

Ushbu zamonaviy tibbiy punkt ultra tovush tekshiruvi, elektrokardiograf, tish davolash uskunalari, kompyuter texnikalari va boshqa ilgʻor tibbiy jihozlar bilan toʻliq taʼminlangan. Endilikda Uyshin mahallasi aholisi birlamchi tibbiy xizmatlardan mahallasining oʻzida, qulay va tezkor tarzda foydalanish imkoniga ega boʻldi.

Bu nafaqat tibbiyot infratuzilmasining kengayishi, balki odamlar hayot sifatining oshishi, sogʻlom turmush tarzini targʻib etish yoʻlidagi navbatdagi muhim qadamlardan biridir.

Charos Arslonova, tuman hokimligining Axborot xizmati rahbari.