"Kasblar festivali" va "Mehnat yarmarkasi" oʻtkazildi

Yoshlarni hayotga tayyorlash, ularning kasb-hunar koʻnikmalarini oshirish va bandligini taʼminlashga qaratilgan tizimli ishlar doirasida Amudaryo tumanida “Kasblar festivali” hamda “Mehnat yarmarkasi” tadbirlari boʻlib oʻtdi. Tumandagi 2-sonli politexnikumda tashkil etilgan tadbir yoshlar va ish beruvchilar oʻrtasida mustahkam koʻprik vazifasini oʻtadi.

Tadbirda tuman hokimi Sobir Xoʻjametov boshchiligidagi rahbarlar, tumandagi yirik korxona va tashkilotlar vakillari, tijorat banklari masʼullari hamda yuzlab oʻquvchi-yoshlar ishtirok etdilar.

Tadbirni ochib bergan tuman hokimi Sobir Xoʻjametov oʻz nutqida bugungi kunda yurtimizda yoshlarning kasb-hunar egallashiga sharoit yaratish, ularning bandligini taʼminlash borasida keng imkoniyatlar yaratilayotganini alohida taʼkidladi.

Darhaqiqat, kasb-hunar oʻrganish yoshlar uchun hayotiy zaruratdir. Bugungi raqobatli mehnat bozorida anʼanaviy va zamonaviy kasb sirlarini mukammal egallash muhim ahamiyatga ega. Kasb egasi boʻlgan yoshlar oʻz hayotining meʼmori, jamiyatning tayanchi, Vatan taraqqiyotining tayanch kuchidir. Shu bois davlatimiz tomonidan har bir hududda kasb-hunar oʻquv maskanlarini modernizatsiya qilish, zamonaviy texnikalar bilan taʼminlash va yoshlarni amaliy koʻnikmalar bilan qurollantirishga alohida eʼtibor qaratilmoqda. Sababi, oʻz kasbining ustasi boʻlgan yoshlar hayotda oʻz oʻrniga va jamiyatda munosib obroʻ-eʼtiborga ega boʻladi.

Tadbir davomida soʻzga chiqqan tashkilot va muassasalar vakillari yoshlar uchun mavjud imkoniyatlar, amaliy oʻquv dasturlari, taʼlim va ishga joylashish masalalari boʻyicha batafsil maʼlumot berishdi. Xususan, tuman 1-sonli muhandislik texnikumi direktori Shuhrat Matrizayev soʻzga chiqib, texnikumda tashkil etilgan 18 ta kasb-hunar yoʻnalishi boʻyicha oʻquv kurslari xususida maʼlumot berdi.

"Kasblar festivali" doirasida politexnikum oʻquvchilari tomonidan pazandachilik, tikuvchilik, dizaynerlik, payvandlash va boshqa yoʻnalishlarda yaratilgan ijodiy ishlardan iborat koʻrgazma namoyish etildi. Yoshlarning qoʻl mehnati bilan tayyorlagan buyumlar, texnik ishlanmalar va kreativ gʻoyalar tadbir ishtirokchilarida, ayniqsa, ish beruvchilarda katta taassurot qoldirdi.

Tadbirning ikkinchi qismi – "Mehnat yarmarkasi" yoshlar uchun amaliy imkoniyat maydoniga aylandi. U yerda turli korxona va tashkilotlar vakillari tomonidan boʻsh ish oʻrinlari taklif etildi. Yoshlar ish beruvchilar bilan toʻgʻridan-toʻgʻri muloqot qilish imkoniyatiga ega boʻldilar. Shuningdek, bandlik va tadbirkorlikni qoʻllab-quvvatlash markazlari tomonidan yoshlarga imtiyozli kreditlar, subsidiyalar va oʻz biznesini boshlash boʻyicha muhim maslahatlar berildi.

Bu kabi tadbirlar yoshlarning hayotda oʻz oʻrnini topishlari, kasb-hunar egallashlari va kelajak hayotga puxta tayyorlanishida muhim vosita sanaladi.

Charos Arslonova, Tuman hokimligining Axborot xizmati rahbari.