YuRT TINChLIGI VA JAMIYaT OSOYIShTALIGINI ASRASh – ShARAFLI BURChIMIZ
Jamiyat hayotining barcha jabhalarida tinchlik va osoyishtalikni taʼminlash, barqaror turmush tarzini qaror toptirish, fuqarolarning huquq va erkinliklarini ishonchli himoya qilish, aholi farovonligini yuksaltirish va huquqiy demokratik davlatni barpo etishda Ichki ishlar organlarining samarali faoliyati ustuvor ahamiyatga ega.
Shu bois, mamlakatimizda barcha sohalar singari Ichki ishlar tizimida ham keng koʻlamli islohotlar amalga oshirilmoqda. Ayniqsa, jamiyatda qonun ustuvorligini taʼminlash, Ichki ishlar organlarini el-yurt manfaatiga xizmat qiladigan chinakam xalqchil tizimga aylantirish yoʻlida samarali ishlar olib borilmoqda. Shu barobarida “Oʻzbekiston Respublikasida Ichki ishlar organlari xodimlari kunini belgilash toʻgʻrisida”gi Qonun bilan soha xodimlari faoliyatiga alohida eʼtibor qaratilib, 2006-yildan buyon 25-oktyabr sanasi Oʻzbekiston Respublikasi Ichki ishlar organlari xodimlarining kasb bayrami sifatida keng nishonlanib kelinadi. Biz ham bayram arafasida ushbu masʼuliyatli va sharafli kasb egalarining faoliyati bilan tanishish maqsadida Amudaryo tumani Ichki ishlar boʻlimida boʻldik.
Boʻlim xodimlari tomonidan jamoat tartibi va tinchlik-osoyishtalikni saqlash, fuqarolarning huquq va erkinliklarini himoya qilish borasida samarali ishlar amalga oshirilmoqda. Xususan, jamoat xavfsizligini taʼminlash, huquqbuzarliklarning oldini olish va jinoyatchilikka qarshi kurashish borasida olib borilayotgan profilaktik chora-tadbirlar natijasida tuman hududida umumiy jinoyatlar soni joriy yilning 9 oyida oʻtgan yilning shu davriga nisbatan 32,9 foizga, yaʼni 146 tadan 98 taga kamayishiga erishildi.
Sohalar kesimida tahlil qiladigan boʻlsak, bu koʻrsatkich jinoyat qidiruv yoʻnalishida 92 tadan 54 taga, iqtisodiy sohada — 19 tadan 15 taga, boshqa sohalarda esa 35 tadan 29 taga kamaygan.
Taʼkidlash joizki, boʻlimda Ichki ishlar organlari xodimlarining samarali faoliyat olib borishlari uchun barcha qulayliklar, zarur shart-sharoitlar yaratilgan. Xodimlarning zamonaviy sport jihozlari oʻrnatilgan sport zallarida jismoniy chiniqish amaliyotlarini bajarishlari, zamonaviy axborot texnologiyalari bilan ishlash boʻyicha bilim va malakalarini mustahkamlashlari uchun zarur sharoit va imkoniyatlar mavjudligi ularning oʻz faoliyatlarini muvaffaqiyatli tarzda amalga oshirishlariga zamin yaratmoqda.
Shu sababli sodir etilgan jinoyatlar tasnifi boʻyicha ham natijalarlar sezilarli darajada yaxshilangan. Jumladan, ogʻir turdagi jinoyatlar — 15 tadan 8 taga, oʻlim bilan bogʻliq boʻlmagan yoʻl-transport hodisalari 28,6 foizga, qasddan badanga ogʻir tan jarohati yetkazish holatlari 100 foizga, oʻrtacha ogʻir tan jarohati yetkazish holatlari esa 66,7 foizga kamayishiga erishilgan. Qotillik jinoyati esa 2025-yilning oʻtgan davri mobaynida qayd etilmagan.
Oʻzbekiston Respublikasi Vazirlar Mahkamasining 2024-yil 30-noyabrdagi “Obod va xavfsiz mahalla” tamoyili asosida mahallalarda ijtimoiy profilaktika tizimi samaradorligini oshirish chora-tadbirlari toʻgʻrisida”gi qarori asosida huquqbuzarliklar sodir etilishi yoki undan jabrlanish ehtimoli boʻlgan shaxslar bilan ishlashish boʻyicha “Ijtimoiy profilaktika tizimi” yoʻlga qoʻyilgani oʻzining ijobiy samarasini bermoqda. Natijada tumandagi 49 ta fuqarolar yigʻinlaridan 2 tasi “qizil”, 6 tasi “sariq”, 41 tasi “yashil” toifalarga kiritilib, umumiy jinoyatlar soni oʻtgan yilning mos davriga nisbatan keskin kamayishiga erishildi.
IIBning tegishli boʻlinmalari xodimlarining oʻz vazifalariga masʼuliyat bilan yondashayotganlari, tumanning eng chekka hududlari aholisi orasida amalga oshirilayotgan profilaktik chora-tadbirlar, sayyor qabullar, huquqiy savodxonlik boʻyicha uchrashuvlar hamda ochiq va oshkora muloqot tarzidagi targʻibot-tashviqot tadbirlari ushbu yoʻnalishlardagi ishlar muvaffaqiyatini taʼminlash imkonini bermoqda.
Taʼkidlash joizki, bugungi kunda dunyo miqyosida roʻy berayotgan xavf-xatar va tahdidlar — xalqaro terrorizm, diniy ekstremizm, noqonuniy migratsiya, odam savdosi kabi illatlarga qarshi kurashish Ichki ishlar organlari xodimlari oldiga yangi vazifalarni qoʻymoqda.
Ushbu vazifalarni sharaf bilan ado etishni, elimiz tinchligi, jamiyat osoyishtaligini saqlashni oʻz burchi deb bilgan mashaqqatli va sharafli kasb egalari — Ichki ishlar organlari xodimlarini 25-oktyabr — kasb bayramlari bilan chin dildan muborakbod etamiz. Oʻz xizmat postlarida hamisha sobit turib, burchiga sodiqlik bilan xalqimiz osoyishtaligi yoʻlida halol xizmat qilayotgan Ichki ishlar organlari xodimlari va soha faxriylariga kuch-gʻayrat, mustahkam sogʻlik, el-yurt tinchligi va osoyishtaligi yoʻlida qilayotgan ezgu xizmatlarida zafarlar tilaymiz.
Timur Doshumbayev, tuman IIB boshligʻi, polkovnik
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
