Nukusda “TalabaExpo – 2025” kasb koʻrgazmasi boʻlib oʻtdi

Mamlakatimizda yoshlar bandligini taʼminlash va ularning hayotda oʻz oʻrnini topishi uchun barcha imkoniyatlarni yaratish eng ustuvor vazifalaridan biridir. Aynan shu maqsadda Qoraqalpogʻiston Respublikasida bitiruvchilarning kasbiy yoʻnalishini aniqlash va biznes tashabbuslarini qoʻllab-quvvatlashga qaratilgan “TalabaExpo – 2025” kasblar koʻrgazmasi boʻlib oʻtdi.

Tadbir Qoraqalpogʻiston Respublikasi Joʻqorgʻi Kengesi hamda Vazirlar Kengashi, Oʻzbekiston Respublikasi Tashqi iqtisodiy faoliyat Milliy banki va Oliy taʼlim, fan va innovatsiyalar vazirligi hamkorligida tashkil etildi.

Ochilish marosimida taʼkidlanganidek, mamlakat kelajagi boʻlgan yoshlar bilan ishlash, ularning muammolarini eshitish va bartaraf etish, hayotda oʻzining munosib oʻrnini topishi uchun har tomonlama koʻmaklashish va qoʻllab-quvvatlash davlat va hukumatning bosh maqsadidir. Prezidentimizning yuksak ishonchi, alohida eʼtibori va gʻamxoʻrligi natijasida yoshlarimiz uchun barcha imkoniyatlar yaratib berilmoqda. Oʻtgan yillarga nazar tashlaydigan boʻlsak, yoshlar hayotida ulkan tarixiy oʻzgarishlar va yangilanishlar yuz berayotganini koʻplab misollarda koʻrishimiz mumkin.

Xususan, yurtimiz yoshlarini qoʻllab-quvvatlash boʻyicha joriy yilning oʻzida 2 ta farmon va 3 ta qarorning qabul qilingani, tadbirkorlik yoʻnalishi boʻyicha koʻplab imtiyozlar berilgani, oliy oʻquv yurtlarida qoraqalpogʻistonlik yoshlar uchun qoʻshimcha kvotalar ajratilgani ularga boʻlgan gʻamxoʻrlikning amaliy ifodasi hisoblanadi.

Shu yilning 14-fevral kuni yoshlar masalasida oʻtkazilgan videoselektor yigʻilishida ishsiz yoshlarning, ayniqsa oliy oʻquv yurtlari bitiruvchilarining bandligini taʼminlash, ijtimoiy yordamga muhtoj yoshlarni qoʻllab-quvvatlash, sifatli taʼlim berish, kasb-hunarga oʻqitish kabi ustuvor vazifalar belgilab berilgan edi. Ushbu tadbir ham ana shu topshiriqlar ijrosi doirasida tashkil etildi.

Oʻzbekiston Respublikasi Prezidentining 2025-yil 14-fevral kungi “Oliy taʼlim muassasalari bitiruvchilarining ishga joylashishiga koʻmaklashish boʻyicha qoʻshimcha chora-tadbirlar toʻgʻrisida”gi qarori asosida yoshlar bandligini taʼminlashda Milliy bank asosiy masʼul bank etib belgilandi. Ushbu bank tomonidan bitiruvchi yoshlarning bandligini taʼminlashga koʻmaklashuvchi “Kelajakka birinchi qadam”, “Kelajak uchun start”, “Yorqin kelajak sari” kabi dasturlar amalga oshirilmoqda.

Bugungi kunda bank bilan hududdagi oliy taʼlim muassasalari oʻrtasida oʻzaro hamkorlik yoʻlga qoʻyilgan boʻlib, yoshlar tadbirkorligini qoʻllab-quvvatlash maqsadida Qoraqalpoq davlat universiteti va Nukus davlat pedagogika institutida “Kelajakka qadam” markazining maslahat markazi tashkil etildi. Shu kunga qadar “Milliy bank” aktsiyadorlik jamiyati Qoraqalpogʻiston Respublikasi boshqarmasi tomonidan 364 nafar bitiruvchi talabaga 8 milliard soʻmdan ortiq miqdorda kredit mablagʻi ajratildi.

Koʻrgazmada respublikaning barcha oliy taʼlim muassasalari qatori Qoraqalpogʻiston qishloq xoʻjaligi va agrotexnologiyalar instituti jamoasi ham faol ishtirok etdi. Institutning rahbariyati, professor-oʻqituvchilari va koʻplab bitiruvchi talabalari ushbu muhim tadbirda faollik koʻrsatdilar. Bu institutning nafaqat yuqori sifatli taʼlim berishga, balki oʻz bitiruvchilarini ishga joylashtirish va ularning tadbirkorlik tashabbuslarini qoʻllab-quvvatlashga ham katta eʼtibor qaratayotganidan dalolat beradi.

Koʻrgazma davomida institut vakillari agrar sohadagi zamonaviy ish oʻrinlari va qishloq xoʻjaligidagi klaster korxonalari taklif etayotgan vakansiyalar haqida bitiruvchilarga maʼlumot berdilar. Shuningdek, ular talabalar va fermerlar, agroklasterlar va tijorat banklari vakillari oʻrtasida toʻgʻridan-toʻgʻri muloqot oʻrnatishga koʻmaklashdilar.

Bitiruvchilarning ishga joylashishiga koʻmaklashish, ularning kasbiy yoʻlini belgilash hamda biznes tashabbuslarini qoʻllab-quvvatlash maqsadida oʻtkazilgan “TalabaExpo – 2025” koʻrgazmasida 80 ga yaqin korxona va tashkilot oʻzlarida mavjud 700 dan ziyod boʻsh ish oʻrni bilan ishtirok etdi. Tadbirga 10 ming nafarga yaqin bitiruvchi yosh tashrif buyurdi.

Koʻrgazma davomida talabalar korxonalar faoliyati bilan tanishdilar, “Kelajakka qadam” markazi tomonidan taqdimotlar oʻtkazildi. Eng muhimi, 3,5 ming nafar yaqin bitiruvchining ish beruvchilar bilan toʻgʻridan-toʻgʻri suhbati tashkil etildi. Buning natijasida 755 nafar bitiruvchining ish oʻrni aniqlandi. Qolaversa, 33 nafar bitiruvchi talabaning biznes loyihasi taqdim etilib, tadbirkorlikka yoʻnaltirildi.

Tadbir yakunida istiqbolli biznes loyihalarining gʻoliblariga imtiyozli kreditlar uchun sertifikatlar topshirildi. Bu kabi amaliy chora-tadbirlar yoshlarning iqtisodiy mustaqilligini taʼminlash va jamiyatdagi faolligini oshirishda muhim vosita boʻlishi shubhasiz.