Xalq deputatlari Amudaryo tuman Kengashining 14-sessiyasi haqida axborot

Joriy yilning 28-oktyabr kuni Amudaryo tumani hokimligining majlislar zalida yettinchi chaqiriq Xalq deputatlari tuman Kengashining navbatdagi 14-sessiyasi boʻlib oʻtdi. Sessiya majlisida deputatlar, hokim oʻrinbosarlari, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Xalq deputatlari tuman Kengashi Raisi – tuman hokimi Sobir Xoʻjametov ochdi hamda olib bordi. Sessiya kotibligiga “17-Jumurtov” saylov okrugidan deputat Baxram Shermanovni tayinlash toʻgʻrisidagi taklif deputatlar tomonidan maʼqullandi.

Kun tartibdagi “Tuman mahalliy byudjetining qoʻshimcha manbalari hisobidan mablagʻ ajratish toʻgʻrisida”gi masala yuzasidan tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari – Iqtisodiyot va moliya boʻlimi boshligʻi Faxriddin Yusupov hisobot berdi.

Hisobotda Qoraqalpogʻiston Respublikasi byudjetidan maqbullashtirilgan mablagʻlarni koʻp qavatli turar joylar hamda ijtimoiy soha binolarini 2025-2026-yillar kuz-qish mavsumida doimiy ishlashga tayyorlash, shuningdek, ijtimoiy turar joylarni taʼmirlash xarajatlari uchun tuman Obodonlashtirish boshqarmasiga oʻtkazib berish toʻgʻrisidagi taklif ilgari surildi. Ushbu taklif deputatlar tomonidan maʼqullandi.

Sessiya kun tartibidagi tuman hududida “Yashil bogʻ” tashkil etish toʻgʻrisidagi masala yuzasidan tuman hokimining qurilish, toʻsiqlarsiz muhit yaratish, kommunikatsiyalar, kommunal xoʻjaligi, ekologiya va koʻkalamzorlashtirish masalalari boʻyicha oʻrinbosari Baxodir Ernazarov hisobot berdi.

Hisobotda keltirilishicha, tegishli idora-tashkilotlar bilan hamkorlikda tumanning Xizr eli, Choykoʻl, Doʻstlik, Farovon, Kuyuk koʻpir ovul va mahallalari hududidan jami 20,07 gektar yer maydonlari “Yashil bogʻ” yaratish uchun tanlab olingan. Ushbu taklif ham bir ovozdan tasdiqlandi.

Sessiya majlisida mahallalarda xavfsiz muhitni yaratish va huquqbuzarliklarning barvaqt oldini olish yuzasidan tuman prokurori Bahrom Masharipov axborot berdi.

Axborotda prokuratura tomonidan joriy yilning 9 oyi mobaynida “Inson qadri uchun” degan ezgu gʻoyani roʻyobga chiqarish, hududda qonun ustuvorligini taʼminlash, jinoyatchilik va huquqbuzarliklarning barvaqt oldini olish maqsadida amalga oshirilayotgan ishlar xususida soʻz yuritildi.

Xususan, Oʻzbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi 1-sonli qarori ijrosi doirasida mahallalarda xavfsiz muhitni yaratish va huquqbuzarliklarning barvaqt oldini olishning yangi tizimi joriy qilindi. Oʻtgan 2024-yildagi 8 ta “qizil” toifadagi mahallalarda kriminogen vaziyatni barqarorlashtirish va yangicha yondashuv asosida profilaktika ishlarini tizimli tashkil etish maqsadida aniq tadbirlar, masʼul ijrochilar belgilandi va “yoʻl xaritalari” ishlab chiqildi. Amalga oshirilgan samarali ishlar natijasida oʻtgan davr mobaynida kriminogen vaziyati ogʻir mahallalar “qizil” toifadan chiqarildi.

Sessiya kun tartibidan oʻrin olgan “Amudaryo tumanidagi aholining ijtimoiy ehtiyojmand toifalarini 2026-yilda ishga joylashtirish uchun ish oʻrinlarining eng kam sonini belgilash va zaxiraga qoʻyish toʻgʻrisida”gi masala yuzasidan tuman Kambagʻallikni qisqartirish va bandlikka koʻmaklashish boʻlimi boshligʻi Ruslon Narimbetov axborot berdi.

Axborotda keltirilishicha, Amudaryo tumani hokimining “Amudaryo tumanida ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarini band qilib qoʻyish toʻgʻrisida”gi qaroriga koʻra, tumanda 33 ta muassasa, korxona va tashkilotlarda 77 ta ish oʻrinlarini band qilib qoʻyish belgilangan.

Sessiya majlisida “Amudaryo tumani boʻyicha 2025-2026-yillar kuz-qish davri uchun suv olish limitlarini tasdiqlash toʻgʻrisida”gi masala yuzasidan tuman suv yetkazib berish xizmati davlat muassasasi direktori Baxtiyor Davekov hisobot berdi. Deputatlar tomonidan 2025-2026-yillar kuz-qish davri uchun qishloq xoʻjaligi korxonalari, aholi va fermer xoʻjaliklarining suv olish limitlari tasdiqlandi.

Sessiya kun tartibiga kiritilgan barcha masalalar yuzasidan hisobot va axborotlar atroflicha muhokama qilinib, fikr-mulohazalar bildirildi, savollarga javoblar berildi va fikr-mulohazalar tinglanib, tegishli qarorlar qabul qilindi.

Shu bilan Xalq deputatlari tuman kengashining 14- sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.