AMUDARYo TUMANIDA JORIY YILDA 20 GEKTAR MAYDONDAGI BOGʻLAR ORASIGA TOʻQSONBOSTI EKINLAR EKISh REJALAShTIRILGAN

Mamlakatimizda aholining kundalik sabzavot mahsulotlariga boʻlgan talabini toʻliq qondirish, shuningdek, oziq-ovqat xavfsizligini taʼminlash maqsadida hosildan boʻshagan maydonlarga, bogʻ qator oralariga sovuqqa chidamli sabzi, piyoz, sarimsoqpiyoz, osh lavlagi, kashnich, petrushka, selderey, salatbarg kabi koʻkatlarni toʻqsonbosti usulida ekishga katta eʼtibor qaratilmoqda.

Kuz oylarining quyoshli kunlaridan unumli foydalanib, toʻqsonbosti usulida yerga urugʻ qadagan dehqon hech qachon yutqazmaydi. Chunki aynan ana shu usulda ekilgan ekinlar juda erta, qish nisbatan iliq kelgan yillarda hatto fevral oyi oxirlaridanoq unib chiqishni boshlaydi va dehqon uchun haqiqiy daromad manbaiga aylanadi.

Amudaryo tumanida ham fermer xoʻjaliklarining hosildan boʻshagan dalalarida, aholi tomorqa yerlarida, bogʻ qator oralariga sovuqqa chidamli, iqlim sharoitiga mos sabzavotlar urugʻlari tanlanib, toʻqsonbosti usulida ekinlar ekishga alohida eʼtibor qaratiladi. Tumandagi bogʻdorchilik yoʻnalishidagi fermer xoʻjaliklari ixtiyorida jami 1096 gektar mevazor bogʻlar mavjud boʻlib, shundan 2026-yil ertagi hosili uchun 20 gektar yerga toʻqsonbosti usulida ekin ekish rejalashtirilgan.

Yaqinda tumandagi “Ulugʻbek Hosilbek” masʼuliyati cheklangan jamiyati tasarrufidagi dalada hosildan boʻshagan bogʻ qator oralariga toʻqsonbosti usulida ekinlar ekish va parvarishlash boʻyicha koʻrgazmali seminar boʻlib oʻtdi.

Koʻrgazmali seminarda Agrosanoatni rivojlantirish agentligi Amudaryo tumani loyiha ofisi, tuman Oʻsimliklar karantini va himoyasi agentligi mutaxassislari, bogʻdorchilik yoʻnalishidagi fermer xoʻjaliklari rahbarlari va tajribali bogʻbonlar ishtirok etdilar.

Seminarda soha mutaxassislari toʻqsonbosti usulida ekin ekish uchun urugʻliklarni tanlash va saralash, urugʻ qadalgandan keyin dalaga ishlov berish, ekin ekilgan bogʻlarni ihotalash, sugʻorish va oziqlantirishning muddatlari, yerning yuza qismi muzlab qolmasligi uchun mahalliy oʻgʻit sepish kabi zarur agrotexnik tadbirlar batafsil maʼlumotlar taqdim etdilar.

Taʼkidlanganidek, yerga urugʻ qadalgani toʻqsonbosti ekinlaridan erta bahorda moʻl hosil olinadi, degani emas, balki urugʻning bir tekis unib chiqishini taʼminlash maqsadida amalga oshiriladigan agrotexnik tadbirlar sifatli va samarali boʻlganidagina koʻzlangan maqsadga erishish mumkin.

Xususan, Oʻsimliklar karantini va himoyasi agentligining Amudaryo tuman boʻlimi mutaxassislari toʻqsonbosti ekinlari uchun serhosil, sara urugʻlarni tanlash, shuningdek, kuzning iliq kunlarida ekilgan urugʻlarga zarar yetkazishi mumkin boʻlgan hasharotlarga, hatto qattiq qish sovuqlariga ham chidamli zararkunandalarga qarshi kurash choralari boʻyicha maslahatlar berdilar.

Koʻrgazmali seminar davomida ishtirokchilar oʻzlarini qiziqtirgan savollar bilan mutaxassislarga murojaat qildilar va ularning barcha savollariga soha mutaxassislari nazariy va amaliy, koʻrgazmali vositalar orqali javoblar berdilar.

Mazkur seminar mamlakatimiz oziq-ovqat xavfsizligini taʼminlash, yerdan unumli va samarali foydalanish orqali aholi daromadlarini, shu bilan birga ekologik toza sabzavot mahsulotlariga boʻlgan ehtiyojini qondirishga qaratilgani bilan muhim ahamiyat kasb etdi.

Robiya YOʻLDOShEVA.