Ichimlik suvi taʼminoti sohasida jamoatchilik va davlat nazorati kuchaytirilmoqda

Aholini toza ichimlik suvi bilan taʼminlash va oqova suv xizmatlarini sifatli tashkil etish – aholi salomatligi va turmush farovonligining asosiy omilidir. Oʻzbekiston Respublikasining “Ichimlik suvi taʼminoti va oqova suvlarni chiqarib yuborish toʻgʻrisida”gi Qonuni bu boradagi ishlarni huquqiy jihatdan tartibga solishga xizmat qiladi. Mazkur qonun nafaqat davlat organlariga, balki fuqarolar, mahallalar va jamoat tashkilotlariga ham ushbu jarayonda faol ishtirok etish huquqini berdi.

Qonun ijrosini taʼminlash hamda jamoatchilik nazoratini yangi bosqichga olib chiqish maqsadida 2025-yil 14-yanvar kuni Oʻzbekiston mahallalari uyushmasi hamda Qurilish va uy-joy kommunal xoʻjaligi sohasida nazorat qilish inspektsiyasi oʻrtasida hamkorlik memorandumi imzolangan edi. Mazkur hujjat respublika aholisini sifatli kommunal xizmatlar bilan qamrab olish, sohadagi islohotlar ijrosini taʼminlashda oʻzaro saʼy-harakatlarni birlashtirishni koʻzda tutadi.

Ushbu hamkorlik doirasida Oʻzbekiston Respublikasi Vazirlar Mahkamasi huzuridagi qurilish va uy-joy kommunal xoʻjaligi sohasida nazorat qilish inspektsiyasi Qoraqalpogʻiston Respublikasi hududiy nazorat qilish inspektsiyasining Ichimlik suvdan oqilona foydalanish va sotishni muvofiqlashtirish hamda oqova suv xizmatlaridan foydalanish boʻlimi xodimlari tomonidan keng qamrovli oʻrganish va targʻibot ishlari amalga oshirilmoqda.

Inspektsiya xodimlari “Qoraqalpoq suv taʼminoti” aktsiyadorlik jamiyati Amudaryo tumani filiali masʼul xodimlari bilan hamkorlikda tumanning Choykoʻl ovuli va Gulzor mahallasida monitoring tadbirlarini oʻtkazdilar. Oʻrganishlarning asosiy maqsadi – isteʼmolchilarning suvdan foydalanish qoidalariga rioya etishini tekshirish va xizmat sifatini baholashdan iborat.

Oʻrganish jarayonida mazkur mahallalar aholisi tomonidan suv taʼminoti yuzasidan jiddiy eʼtirozlar kelib tushmadi. Xususan, avariya holatlarining oʻz vaqtida bartaraf etilayotgani, ichimlik suvining belgilangan bosimda va vaqtida berilishi, shuningdek, suv sifatining standart talablariga javob berishi boʻyicha ijobiy fikrlar bildirildi.

Shu bilan birga, mahallalarda nazorat tadbirlari davomida aholi oʻrtasida suvdan oqilona va tejamkor foydalanish madaniyatini oshirishga alohida eʼtibor qaratildi. Isteʼmolchilarga suv taʼminoti korxonasi bilan tuzilgan shartnoma shartlariga qatʼiy amal qilish, toʻlov intizomi va suvni isrof qilmaslik yuzasidan zarur tavsiyalar berildi.

Aytish joizki, Inspektsiya tomonidan 2025-yilning oʻtgan 10 oyi davomida amalga oshirilgan ishlar tahlili sohada tartib-intizomni kuchaytirish boʻyicha tizimli choralar koʻrilayotganidan dalolat beradi. Jumladan, Inspektsiya va Mahallalar uyushmasi oʻrtasidagi memorandumga asosan, yanvar-oktyabr oylarida respublika boʻylab 204 ta ovul va mahallalarda oʻrganishlar oʻtkazilgan.

Aholi salomatligini asrash maqsadida Sanitariya-epidemiologik osoyishtalik va jamoat salomatligi qoʻmitasi bilan hamkorlikda ichimlik suvidan jami 1911 ta namuna olinib, laboratoriya tekshiruvlari natijasida 37 ta holatda suv sifatining milliy standart talablariga javob bermasligi aniqlangan va tegishli choralar koʻrilgan.

Respublika hududidagi 280 ta byudjet tashkilotida ichimlik suvidan foydalanish qoidalariga rioya etilishi oʻrganilganida, 40 ta holatda kamchiliklar aniqlanib, rahbarlarga koʻrsatmalar berilgan. Qoidabuzarlikka yoʻl qoʻygan 9 nafar masʼul xodimga nisbatan Maʼmuriy javobgarlik toʻgʻrisidagi kodeksning tegishli moddasiga asosan jami 9,3 million soʻmlik jarimalar solingan.

Mahallalarda oʻtkazilgan tadbirlar davomida 325 nafar isteʼmolchi bilan qonuniy shartnomalar rasmiylashtirilishiga erishilib, 1309 nafar aholi qonuniy suv isteʼmolchisi maqomiga ega boʻlgan. Yer osti suv zaxiralarini muhofaza qilish maqsadida 239 ta quduqning sanitariya muhofaza zonalari holati tekshirilib, aniqlangan 24 ta kamchilik yuzasidan koʻrsatmalar berilgan hamda 3 nafar fuqaroga jami 3,3 million soʻm miqdorida maʼmuriy jarimalar rasmiylashtirilgan.

Bu kabi keng qamrovli nazorat va targʻibot tadbirlari nafaqat sohada qonun ustuvorligini taʼminlashga, balki eng muhimi – aholiga yetkazib berilayotgan ichimlik suvining sifati va xavfsizligini kafolatlashga xizmat qilishi shubhasiz.