Aholi farovonligi yoʻlida muhim qadam: Amudaryoda gaz taʼminoti yaxshilanmoqda

Soʻnggi yillarda yurtimizda aholi turmush sharoitlarini yaxshilash, xonadonlarni barqaror issiqlik, elektr energiyasi va ichimlik suvi bilan taʼminlash borasida izchil va manzilli ishlar amalga oshirilmoqda. Bu boradagi amaliy saʼy-harakatlar Amudaryo tumanida ham oʻzining yaqqol samarasini bermoqda.

Xususan, tumanda tabiiy gaz taʼminotini yaxshilash, mavjud infratuzilmani zamon talablariga moslashtirish maqsadida keng koʻlamli rekonstruktsiya ishlari olib borilmoqda. Amudaryo tumani hududidan oʻtuvchi yuqori bosimli magistral gaz tarmoqlarini yangilash orqali aholining kundalik ehtiyojlarini qondirish, gaz bosimini meʼyorlashtirish va uzluksiz taʼminotni yoʻlga qoʻyish ustuvor vazifa etib belgilangan.

Bugungi kunda tumandagi Toʻlqin, Toshyop, Boʻston ovul va mahallalari hududlaridan oʻtuvchi yuqori bosimli magistral gaz quvurlari bosqichma-bosqich rekonstruktsiya qilinmoqda. Ushbu hududlarda qariyb 9,5 kilometrga yaqin tabiiy gaz quvurlarini yangilash va yangi tarmoqlar tortish ishlari “Urganchtransgaz” unitar korxonasi xodimlari tomonidan yuqori masʼuliyat va fidoyilik bilan amalga oshirilmoqda.

Ayni paytda rekonstruktsiya ishlari yakunlanish arafasida boʻlib, bu esa yaqin fursatlarda minglab xonadonlarda gaz taʼminotining yanada barqarorlashishiga xizmat qiladi. Mazkur loyiha nafaqat texnik jihatdan muhim, balki aholi farovonligini oshirish, qish mavsumida qulay sharoit yaratish yoʻlidagi muhim qadamdir.

Shu munosabat bilan, aholining tabiiy gaz bilan bogʻliq ehtiyojlarini qondirish yoʻlida jonbozlik bilan mehnat qilayotgan ishchi-xodimlarga tuman hokimligi tomonidan bayramlar arafasida minnatdorchilik tariqasida tadbir tashkil etildi. “Diamond” restoranida yozilgan dasturxon atrofida fidokor mehnatkashlar jam boʻlishdi.

Tadbirda Amudaryo tumani hokimi oʻrinbosarlari Bahodir Ernazarov hamda Nodirbek Kamolovlar ishtirok etib, gaz taʼminoti tizimini yaxshilash yoʻlidagi mehnatlari uchun mutaxassislarga samimiy minnatdorlik bildirdilar. Ularning taʼkidlashicha, aholi manfaatiga qaratilgan bunday tashabbuslar bundan buyon ham izchil davom ettiriladi.

Tadbir davomida oʻz mehnati va masʼuliyati bilan alohida ajralib turgan bir guruh ishchi-xodimlar qimmatbaho sovgʻalar bilan taqdirlandi. Bu esa mehnatkashlarga boʻlgan eʼtibor va eʼtirofning yorqin ifodasiga aylandi.

Bayramona tadbirga tuman Madaniyat boʻlimi xonandalari tomonidan ijro etilgan kuy-qoʻshiqlar yanada fayz bagʻishlab, ishtirokchilarga koʻtarinki kayfiyat ulashdi. Samimiy muhitda oʻtgan uchrashuv mehnat jamoasiga yangi kuch va ilhom baxsh etdi.

Aholi farovonligini oshirish, infratuzilmani rivojlantirish va hayot sifatini yaxshilashga qaratilgan bunday ezgu tashabbuslar Amudaryo tumanida amalga oshirilayotgan islohotlarning amaliy natijasi boʻlib, kelgusida ham izchil davom etishiga ishonch uygʻotadi.

Charos Arslonova, tuman hokimligining Axborot xizmati rahbari.