AMUDARYoDA QIShLOQ XOʻJALIGI XODIMLARI KUNI TANTANALI NIShONLANDI

Oʻzbekiston zamini azaldan qut-baraka oʻchogʻi, dehqonlari esa el dasturxonining butunligi uchun tinim bilmaydigan fidoyi insonlar sifatida qadrlanadi. Prezidentimiz Shavkat Mirziyoyevning tashabbusi bilan har yili dekabr oyida mamlakatimizda "Qishloq xoʻjaligi xodimlari kuni"ning keng nishonlanishi soha vakillariga koʻrsatilayotgan yuksak ehtiromning yorqin namunasidir. Ana shunday koʻtarinki ruh va bayramona kayfiyat joriy yilning 24-dekabr kuni Amudaryo tumanida ham hukmron boʻldi. Tumanning Qipchoq ovulida joylashgan muhtasham "Jayxun" toʻyxonasida tashkil etilgan tantanali bayram tadbiri yil davomida dalada ter toʻkkan mirishkor dehqonlar, chorvadorlar, suvchilar va mexanizatorlar, agrar soha fidoyilari sharafiga bagʻishlandi.

Tadbirning ochilish marosimida soʻz olgan Oʻzbekiston Fermerlari kengashi boʻlim boshligʻi Mehriddin Muhammadiyev, Qoraqalpogʻiston Respublikasi Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anvar Jumanazarov, Joʻqorgʻi Kengesi Raisining maslahatchisi Muratbay Abdirov hamda Amudaryo tumani hokimi Sobir Xoʻjametovlar yigʻilganlarni kasb bayrami bilan samimiy muborakbod etdilar.

Mutasaddilar oʻz nutqlarida bugungi kunda yurtimizda agrar sohani modernizatsiya qilish, eng soʻnggi innovatsion texnologiyalarni joriy etish, yer va suv resurslaridan oqilona foydalanish borasidagi islohotlar oʻz samarasini berayotganini alohida taʼkidladilar. Xususan, Davlatimiz rahbari tomonidan aynan Qoraqalpogʻiston Respublikasi uchun qabul qilingan tarixiy farmon va qarorlar hududda dehqonchilik madaniyatini yuksaltirish va aholi farovonligini taʼminlashda muhim omil boʻlayotgani eʼtirof etildi.

Aytish joizki, yakunlanayotgan 2025-yil Amudaryo tumani qishloq xoʻjaligi tarixida sermahsul yillardan biri sifatida muhrlandi. Raqamlarga murojaat qiladigan boʻlsak, tuman mehnatkashlari barcha yoʻnalishlarda ulkan zafarlarni qoʻlga kiritganiga guvoh boʻlamiz.

2025-yil hosili uchun tumandagi 348 ta fermer xoʻjaligi tomonidan 13 ming gektar maydonda gʻoʻza parvarishlandi. Mirishkorlarimiz gektaridan oʻrtacha 44 tsentnerdan hosil olishni maqsad qilib, qabul maskanlariga 57 ming 220 tonna "oq oltin" topshirishni rejalashtirgan edilar. Omilkorlik va tinimsiz mehnat evaziga amalda 66 ming 250 tonna paxta xomashyosi yetishtirilib, ulkan xirmon bunyod etildi.

Gʻallachilikda ham natijalar quvonarli. Rizq-roʻzimiz boʻlgan bugʻdoy yetishtirish uchun 270 ta fermer xoʻjaligi va qishloq xoʻjaligi korxonalari tomonidan 4800 gektar yerga urugʻ ekildi. Rejadagi 11 ming 130 tonna oʻrniga omborlarga 13 ming 768 tonna sifatli don qabul qilinib, dasturxonlarimiz toʻkinligi taʼminlandi.

Shuningdek, "kumush tola" ijodkorlari ham mavsumni yorugʻ yuz bilan yakunladilar. Tumanda 4936 quti ipak qurti parvarishlanib, rejadagi 296 tonna oʻrniga 296,1 tonna pilla hosili olindi.

Aholini meva-sabzavot mahsulotlari bilan taʼminlash – dolzarb vazifa. Amudaryo tumanida jami 1096 gektar bogʻ va 66 gektar tokzorlar mavjud boʻlib, sohani rivojlantirishga jiddiy eʼtibor qaratilmoqda. Eskirgan va hosildorligi past boʻlgan 14 gektar bogʻ va 4 gektar tokzorlar oʻrnida yangicha yondashuv asosida ishlar tashkil etildi. 2025-yil dasturiga koʻra 90 gektar intensiv bogʻ va 10 gektar tokzor barpo etish koʻzda tutilgan boʻlsa-da, amalda 126 gektar intensiv bogʻ va 16 gektar yangi tokzorlar yaratildi. Bu esa kelajakda eksportbop mahsulotlar hajmini oshirish imkonini beradi.

Xalqimiz dasturxonini goʻsht va sut mahsulotlari bilan uzluksiz taʼminlash maqsadida chorvachilik tarmogʻida ham ijobiy oʻsish surʼatlari kuzatildi. Tumandagi 53 ta chorvachilik subʼekti va aholi xonadonlaridagi saʼy-harakatlar natijasida yirik shoxli qoramollar bosh soni 175,6 mingga yetib, oʻtgan yilga nisbatan 100,7 foizga oʻsdi. Shundan sigirlar soni 48,9 ming boshni tashkil etdi.

Natijada, goʻsht yetishtirish hajmi 11,9 ming tonnaga, sut yetishtirish hajmi esa 39 ming 227 tonnaga yetkazildi. Eʼtiborli jihati, qishloq xoʻjaligi korxonalarida goʻsht yetishtirish oʻtgan yilga nisbatan qariyb 18 foizga, sut ishlab sogʻib olish hajmi esa qariyb 20 foizga oshdi.

Chorvachilikning boshqa tarmoqlarida ham raqamlar oʻsishni koʻrsatmoqda. Jumladan, qoʻy va echkichilikda mayda shoxli mollar soni 113,4 ming boshga yetkazildi. Tumandagi 9 ta parrandachilik subʼekti va aholi xonadonlarida parvarishlanayotgan parrandalar soni 1 mln 170 ming boshdan oshdi. Yil davomida 48 milliondan ziyod tuxum yetishtirildi.

Asalarichilik yoʻnalishida esa 3 ta ixtisoslashgan subʼekt va havaskorlar asalarichilar tomonidan 176,3 tonna asal yigʻib olindi.

Eng katta oʻsish surʼatlaridan biri baliqchilik sohasida qayd etildi. 84 ta baliqchilik xoʻjaligi tomonidan 2071 tonna baliq ovlanib, oʻtgan yilgi koʻrsatkich 124,1 foizga bajarildi. Ayniqsa, fermer xoʻjaliklari baliq yetishtirishni 2,3 barobarga oshirgani tahsinga loyiq.

Sohani rivojlantirish faqat raqamlarni oshirish emas, balki naslchilikni yaxshilash va investitsiyalarni jalb qilish bilan ham oʻlchanadi. 2025-yilgi tuman dasturiga asosan umumiy qiymati 138 mlrd 510 mln soʻmlik 17 ta loyiha toʻliq ishga tushirildi.

Xususan, naslchilikni yaxshilash maqsadida "O‘rta-qala chorva mollari" va "Avazbek Gʻayrat" masʼuliyati cheklangan jamiyatlari hamda "Ilhom Shohrux" fermer xoʻjaligi tomonidan Rossiya Federatsiyasi, jumladan Dogʻiston Respublikasidan jami 1000 dan ortiq zotdor qoramollar olib kelindi. Shuningdek, raqamlashtirish jarayonida 50 ta xoʻjalikdagi 4 mingdan ortiq qoramollar identifikatsiya qilinib, "Chinor" yagona elektron bazasiga kiritildi.

Tadbirda soʻz olganlar Prezidentimizning qishloq xoʻjaligi xodimlariga yoʻllagan bayram tabrigidagi muhim fikrlarni yana bir bor yodga oldilar: global iqlim oʻzgarishi va suv tanqisligi sharoitida oziq-ovqat xavfsizligini taʼminlash uchun faqat zamonaviy bilim, tajriba va innovatsion yondashuv zarur.

Bayramning eng hayajonli qismida fidokorona mehnati bilan barchaga oʻrnak boʻlayotgan soha ilgʻorlari taqdirlandi. Jami 170 nafar agrar soha vakiliga tuman hokimligining tashakkurnomalari va qimmatbaho sovgʻalari topshirildi. Ularning safida 15 nafar fermerning "Ilgʻor fermer" koʻkrak nishoni bilan mukofotlangani ularning mashaqqatli mehnatiga berilgan yuksak baho boʻldi.

"Jayxun" toʻyxonasida yangragan kuy-qoʻshiqlar, dilrabo raqslar bayramga oʻzgacha shukuh bagʻishladi. Amudaryolik dehqonlarning bugungi yutuqlari ertangi kun uchun mustahkam poydevor boʻlib, elimiz dasturxoni toʻkinligi va yurtimiz farovonligiga xizmat qilishi shubhasiz.

Gʻulomjon Yeshniyozov