Qilichboylik yoshlar xorijiy tillarni oʻrganish uchun tuman markaziga qatnamaydigan boʻlishdi

Mustaqillik yillarida mamlakatimizda yoshlar tadbirkorligini, ularning gʻoya va tashabbuslarini qoʻllab-quvvatlash, ishbilarmonlik koʻnikmalarini rivojlantirishga qaratilgan izchil chora-tadbirlar tufayli har yili minglab yoshlar oʻz biznes-gʻoyalarini muvaffaqiyatli amalga oshirmoqdalar. Ayniqsa, ularning startap va innovatsion gʻoyalarini roʻyobga chiqarishlariga koʻmaklashish, kasb-hunar, raqamli texnologiyalar hamda xorijiy tillarni chuqur egallashlari uchun zarur shart-sharoitlar yaratib berilayotgani yoshlarning zamonaviy bilimlarni qunt bilan oʻrganishlarida muhim omil boʻlmoqda. Oʻzbekiston Respublikasi Prezidentining 2025-yil 14-fevraldagi “Yoshlar tadbirkorligini rivojlantirish hamda ularning bandligini taʼminlashga qaratilgan biznes-loyihalarni qoʻllab-quvvatlash tizimini takomillashtirish chora-tadbirlari toʻgʻrisida”gi qaroriga asosan Yoshlar ishlari agentligi huzurida “Yoshlar tadbirkorligini rivojlantirish davlat maqsadli jamgʻarmasi” tashkil etilib, mazkur jamgʻarma hisobidan “Koʻmak” loyihasi amalga oshirilayotgani yoshlar uchun keng imkoniyatlar sari yoʻl ochdi.

Ushbu loyiha xorijiy tillar boʻyicha S1 darajadagi milliy yoki xalqaro darajadagi sertifikatga ega hamda chekka hududlarda xorijiy tillarga ixtisoslashgan oʻquv markazi faoliyatini yoʻlga qoʻyish niyatidagi yoshlar uchun moʻljallangan boʻlib, bu imtiyozdan amudaryolik yoshlar ham samarali foydalanishmoqda. Loyihaning afzallik tomoni shundaki, taʼlim yoʻnalishida oʻz biznesini boshlayotgan yoshlarga 3-yil muddatga, 6 oylik imtiyozli davr bilan 130 mln soʻmgacha ssuda (foizsiz qarz) beriladi.

Amudaryo tumanining Qilichboy ovulida tugʻilib-oʻsgan Sardorbek Imomiddinov axborot texnologiyalari sohasi boʻyicha oliy maʼlumotli mutaxassis. U Qilichboy hududidagi olis qishloq va mahallalardan 35-40 chaqirim yoʻl bosib, tuman markazidagi xorijiy tillarni oʻrgatish boʻyicha oʻquv kurslariga qatnab, taʼlim olayotgan hamqishloqlariga sharoit yaratishni koʻpdan orzu qilardi. Ana shu ezgu orzusini amalga oshirish, qolaversa, yozning jazirama issigʻi-yu izgʻirinli qish kunlarida tuman markaziga qatnab, qimmatli vaqtlarini behuda sarflayotgan qilichboylik yoshlarni qoʻllab-quvvatlash maqsadida chet tillarni oʻqitishga ixtisoslashgan oʻquv markazini tashkil etishga qaror qildi. Shu niyatda oʻz biznes gʻoyasi bilan Yoshlar ishlari agentligi tomonidan tashkillashtirilgan “Oʻquv markazlari forumi”da ishtirok etdi va 130 mln soʻmlik ssuda uchun vaucherni qoʻlga kiritib, qilichboylik yoshlar uchun xorijiy tillarni oʻqitishga ixtisoslashgan oʻquv markazi faoliyatini yoʻlga qoʻydi.

Orzulari yoʻlidagi ilk qadamni oʻquv markazi binosini eng zamonaviy axborot texnologiyalari bilan jihozlash, malakali chet tili oʻqituvchilarini tanlov asosida ishga qabul qilishdan boshlagan Sardorbek Imomiddinov rahbarligidagi chet tillarni oʻqitishga ixtisoslashgan taʼlim muassasasida ayni paytda 2 smenada 250 nafar ilmga chanqoq yoshlar katta qiziqish bilan xorijiy tillarni oʻrganishmoqda. Eʼtiborli tomoni shundaki, mazkur oʻquv markazining ochilishi nafaqat oʻquvchi-yoshlar uchun, balki ularning ota-onalari uchun ham avvalo qulaylik, qolaversa, yoʻl xarajatlarini tejash imkonini berdi.

Ayni paytda oʻquv markazida Sardorbek Imomiddinovning shaxsiy tashabbusi bilan kompyuter savodxonligi boʻyicha bepul mashgʻulotlar oʻtkazish ham yoʻlga qoʻyilganidan qilichboyliklar mamnun.

Bilimdon, izlanuvchan, tashabbuskor yoshlar — mamlakatimizning suyanch togʻlaridir. Chunki har qanday davlatning jadal rivojlanishi, dunyo miqyosida muayyan yutuqlarga erishishi, xalqning farovon hayoti yosh avlod taʼlim-tarbiyasi hamda ularning kelajagini koʻzlab qilingan ezgu ishlarga bogʻliq. Sardorbek Imomiddinovning oʻsib kelayotgan qilichboylik yosh avlodni qoʻllab-quvvatlash maqsadidagi saʼy-harakatlari mazmun-mohiyatida ham ona Vatan kelajagiga daxldorlik hissi bilan yashab, mehnat qilishdek ezgu niyatlar mujassam. Biz taʼlim sohasidagi yosh fidoyi tadbirkor Sardorbek Imomiddinovga mustahkam sogʻlik va muvaffaqiyatlar tilaymiz.

Robiya Yoʻldosheva