TUMAN PROKURATURASI YIRIK LOYIHALAR IJROSINI OʻRGANDI

Bugungi kunda Yangi Oʻzbekiston boʻylab amalga oshirilayotgan keng koʻlamli bunyodkorlik ishlari nafaqat shahar va tumanlarimiz qiyofasini oʻzgartirmoqda, balki aholining turmush darajasini yuksaltirishga xizmat qilmoqda. Davlat dasturlari doirasida barpo etilayotgan har bir inshoot — xoh u turar-joy majmuasi boʻlsin, xoh ijtimoiy soha obʼekti boʻlsin — sifatli va xavfsiz tarzda, belgilangan muddatlarda foydalanishga topshirilishiga asosiy masala sifatida qaraladi. Shu maqsadda Amudaryo tumani prokuraturasi tomonidan hududdagi strategik qurilish obʼektlarida nazorat tadbirlari va oʻrganishlar olib borildi.

Maʼlumki, aholini arzon va sifatli uy-joy bilan taʼminlash davlat siyosatining ustuvor yoʻnalishlaridan biridir. Oʻzbekiston Respublikasi Prezidentining 2021-yil 9-dekabrdagi “Yangi Oʻzbekiston” massivlarini qurish va hududlarning ijtimoiy-iqtisodiy rivojlanishini taʼminlash chora-tadbirlari toʻgʻrisida”gi Farmoni ijrosi doirasida Amudaryo tumanining Doʻstlik mahallasi hududida qad rostlayotgan “Yangi Oʻzbekiston” massivi ana shunday yirik loyihalardan biridir.

Tuman prokuraturasi masʼul xodimlari mazkur massivda boʻlib, qurilish ishlarining borishi bilan yaqindan tanishdilar. Oʻrganish jarayonida asosiy eʼtibor binolarning sifati, qurilish materiallarining standartlarga mosligi va eng muhimi — ishchi-xodimlar uchun yaratilgan mehnat sharoitlariga qaratildi.

Qurilish maydoni — bu yuqori xavf manbai sanladi. Shu bois, prokuratura xodimlari tomonidan texnika xavfsizligi qoidalariga rioya etilishi, ishchilarning maxsus kiyim-bosh va himoya vositalari bilan taʼminlanganlik darajasi qatʼiy nazorat qilindi. Zero, har bir bino poydevorida nafaqat beton va gʻisht, balki inson mehnati va xavfsizligi yotadi.

Prokuratura xodimlarining navbatdagi nazorat manzili tumanning Oq oltin ovuli boʻldi. Bu yerda kelajagimiz egalari boʻlgan jajji bolajonlar uchun moʻljallangan 90-oʻrinli maktabgacha taʼlim tashkiloti binosining qurilish-taʼmirlash ishlari koʻzdan kechirildi. Mazkur ijtimoiy obʼekt Oʻzbekiston Respublikasi Prezidentining 2024-yil 24-dekabrdagi “2025 — 2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi 454-sonli Qarori asosida barpo etilmoqda.

Ijtimoiy obʼektlar, ayniqsa, bogʻcha va maktablar qurilishida masʼuliyat ikki hissa ortadi. Chunki bu binolarda ertaga farzandlarimiz taʼlim-tarbiya oladi. Shu bois, prokuratura vakillari binoning loyiha-smeta hujjatlariga mosligini, issiqlik tizimi, sanitariya-gigiyena talablari va pardozlash ishlarining sifatini chuqur tahlil qildilar.

Aytish kerakki, ijtimoiy soha obʼektlarini qurishda qurilish qoidalari va normalariga qatʼiy amal qilish jamiyat hayotida beqiyos ahamiyatga ega. Maktablar, bogʻchalar, shifoxonalar, madaniyat uylari, sport inshootlari kabi obʼektlar avvalo inson salomatligi, xavfsizligi va qulayligi uchun xizmat qiladi. Shu bois ularni barpo etish jarayonida belgilangan meʼyoriy talablarga rioya etish asosiy shart hisoblanadi.

Qurilish qoidalari va normalari binolarning mustahkamligi, seysmik barqarorligi, yongʻin xavfsizligi hamda sanitariya-gigiyena talablariga javob berishini taʼminlaydi. Ayniqsa, yurtimiz seysmik faol hududda joylashganini inobatga olsak, loyihalash va qurilish ishlarida ushbu meʼyorlarga amal qilish inson hayotini saqlab qolishda hal qiluvchi omildir. Qoidalarga rioya qilinmagan hollarda esa turli avariyalar, qurilish nuqsonlari va inson salomatligiga tahdid soluvchi holatlar yuzaga kelishi mumkin.

Shuningdek, meʼyorlarga muvofiq qurilgan ijtimoiy obʼektlar uzoq yillar davomida samarali xizmat qiladi, taʼmirlash xarajatlari kamayadi va davlat mablagʻlaridan oqilona foydalanish taʼminlanadi. Bunday inshootlar fuqarolarda ishonch uygʻotadi, ijtimoiy infratuzilmaning barqaror rivojlanishiga xizmat qiladi.

Oʻrganishlar davomida faqat tekshiruv bilan cheklanib qolinmadi. Joyining oʻzida pudratchi tashkilot rahbarlari, muhandislar va quruvchilar bilan ochiq muloqot tashkil etildi. Suhbat chogʻida quruvchilarni qiynayotgan muammolar, qurilish materiallari taʼminotidagi ehtimoliy uzilishlar va moliyalashtirish masalalari oʻrganildi.

Pudratchi tashkilotlarga qurilish ishlarini belgilangan jadval asosida, sifat koʻrsatkichlarini tushirmagan holda, oʻz vaqtida yakunlash boʻyicha qatʼiy koʻrsatmalar berildi. Shuningdek, byudjet mablagʻlarining maqsadli sarflanishi, talon-torojlikka yoʻl qoʻymaslik va korruptsion holatlarning oldini olish yuzasidan tushuntirish ishlari olib borildi.

Xulosa oʻrnida aytganda, Amudaryo tumani prokuraturasi tomonidan olib borilayotgan bu kabi nazorat tadbirlari qogʻozdagi raqamlarning hayotda oʻz ifodasini topishiga, xalqimiz uchun qurilayotgan uy-joylar va bogʻchalarning uzoq yillar beminnat xizmat qilishiga kafolat boʻladi. Zero, qonun ustuvorligi taʼminlangan joyda sifat va taraqqiyot boʻladi.