Inklyuziv jamiyat sari dadil qadamlar: Qoraqalpogʻistondagi toʻrt yetakchi NNTning 2025-yil davomida amalga oshirgan ishlari toʻgʻrisida hisoboti tinglandi

Maʼlumki, “Nodavlat notijorat tashkilotlari toʻgʻrisida”gi Oʻzbekiston Respublikasining qonunida jamoat fondlari va nodavlat notijorat tashkilotlari har yili oʻz faoliyati toʻgʻrisida hisobot eʼlon qilib borishi lozimligi koʻrsatilgan. Nukus shahridagi nodavlat notijorat tashkilotlari uyida shu munosabat bilan Oʻzbekiston Nogironlar assotsiatsiyasi, Nogironlar jamiyati, Koʻzi ojizlar jamiyati va Karlar jamiyati Qoraqalpogʻiston boʻlimlari masʼullari muassasalar tomonidan oʻtgan yil davomida amalga oshirilgan ishlar yuzasidan hisobot berdi.

Yigʻilishda Qoraqalpogʻiston Respublikasi Joʻqorgʻi Kengesi deputatlari, Oliy Majis huzuridagi Fuqarolik jamiyati institutlarini qoʻllab-quvvatlash jamoat fondining Qoraqalpogʻiston boʻlinmasi, Oʻzbekiston Nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlinmasi masʼullari hamda nodavlat notijorat tashkilotlari vakillari ishtirok etdi.

Yigʻilishni Qoraqalpogʻiston Respublikasi Joʻqorgʻi Kengesining qoʻmita raisi Sharapat Otemisov ochdi va olib bordi. Qayd etilganidek, 2025-yil Qoraqalpogʻiston Respublikasida ijtimoiy himoya va inklyuzivlikni taʼminlash borasidagi islohotlarning amaliy natijalari bilan esda qolarli yil boʻldi. Hududda faoliyat yuritayotgan toʻrtta yirik nodavlat notijorat tashkiloti — Nogironlar assotsiatsiyasi, Nogironlar jamiyati, Koʻzi ojizlar jamiyati va Karlar jamiyati tomonidan yil davomida keng koʻlamli ishlar amalga oshirildi.

Jumladan, Oʻzbekiston Nogironlar assotsiatsiyasining Qoraqalpogʻiston Respublikasi hududiy boʻlimi 2025-yilda asosiy eʼtiborni jamoatchilik nazorati va grant loyihalariga qaratdi. Tashkilot tomonidan yil davomida ijtimoiy obʼektlarda toʻsiqsiz muhit yaratilganligi boʻyicha 17 ta jamoatchilik nazorati tadbirlari oʻtkazildi. Ushbu monitoringlar banklar, bozorlar, davlat xizmatlari markazlari va taʼlim muassasalarini qamrab oldi.

Assotsiatsiya grant tanlovlarida ham faollik koʻrsatdi. Xususan, Oliy Majlis huzuridagi jamoat fondi tomonidan moliyalashtirilgan «Inklyuziv infratuzilma yaratish» va mahalliy fondlar koʻmagida «Biz birgamiz» loyihalari muvaffaqiyatli amalga oshirildi. Xalqaro hamkorlik doirasida Birlashgan Millatlar tashkiloti Taraqqiyot dasturining «Barcha uchun xavfsiz turmush» grant loyihasi qoʻlga kiritildi. Shuningdek, korruptsiyaga qarshi kurashish mavzusida grant loyihasi doirasida seminarlar tashkil etilib, unda 300 dan ortiq nogironligi boʻlgan shaxslar va talabalar ishtirok etdi.

Oʻzbekiston Nogironlar jamiyatining Qoraqalpogʻiston hududiy boʻlimi tomonidan 2025-yilda 223 marotaba tadbir oʻtkazilib, ularga 8735 nafar fuqaro jalb qilindi. Hozirgi kunda jamiyat aʼzolarining soni 37 ming 291 nafarni tashkil etadi.

Tashkilot xotin-qizlar bandligini taʼminlashga alohida urgʻu berdi. Xususan, «Tadbirkor ayollar haftaligi» doirasida kashtachilik boʻyicha master-klasslar tashkil etildi hamda «MEHNAT VA SAMARA» forumida hunarmand ayollar oʻz mahsulotlari bilan qatnashdilar. Inklyuzivlikni taʼminlash maqsadida jamiyat mutaxassislari tomonidan respublika boʻylab 650 dan ortiq bino va inshootlarning nogironligi boʻlgan shaxslar uchun qulayligi monitoring qilindi. Bayramlar arafasida va Ramazon oyida minglab ehtiyojmand oilalarga oziq-ovqat mahsulotlari tarqatildi.

Oʻzbekiston Koʻzi ojizlar jamiyati Qoraqalpogʻiston boʻlimi 2025-yilda oʻz aʼzolarining madaniy hordiq chiqarishi va salomatligini tiklashga eʼtibor qaratdi. Hisobot davrida jamiyatga 276 nafar yangi aʼzo qabul qilinib, umumiy roʻyxatdagilar soni 7 ming 449 nafarga yetdi. Yil davomida 359 ta madaniy-maʼrifiy tadbir va 45 ta sport musobaqasi oʻtkazildi.

Bandlik masalasida ham ijobiy natijalar qayd etildi: 13 nafar koʻzi ojiz shaxs ishga joylashtirilib, jamiyat aʼzolaridan ishlovchilar soni 155 nafarga yetdi. Ijtimoiy himoya doirasida homiylar va mahalliy hokimiyat koʻmagida aʼzolarga 236 million soʻmdan ortiq moddiy yordam koʻrsatildi. Shuningdek, 96 nafar aʼzo sihatgohlarga bepul yoʻllanma bilan taʼminlandi.

Oʻzbekiston Karlar jamiyati Qoraqalpogʻiston boʻlimi esa eshitish va gapirish qobiliyati cheklangan shaxslarni kasbga yoʻnaltirishda namunali ishlarni amalga oshirdi. Surdotarjimonlar koʻmagida 15 nafar erkak haydovchilik guvohnomasini olish uchun oʻqitilib, ulardan 6 nafari guvohnomaga ega boʻldi va 3 nafari «Yandex» taksi xizmatida ish boshladi.

Jamiyat tomonidan 468 nafar fuqaroga mavsumiy ishlarda bandligini taʼminlashga koʻmaklashildi. Ijtimoiy himoya daftarida turuvchi 429 ta oilaga kommunal toʻlovlar uchun 1 million soʻmdan mablagʻ plastik kartalariga tushirib berildi. Tibbiy yoʻnalishda ham amaliy yordam koʻrsatilib, aʼzolarning koʻz operatsiyalari va sanatoriylarda davolanishi tashkil etildi.

Xulosa qilib aytganda, 2025-yilda mazkur toʻrt tashkilot davlat subsidiyalari va grant mablagʻlaridan samarali foydalangan holda, minglab hamyurtlarimizning ijtimoiy hayotga moslashuviga va huquqlari himoya qilinishiga xizmat qildi.

Yigʻilish ishtirokchilari mazkur tashkilotlarning 2025-yil davomidagi faoliyatiga yuqori baho berib, kelgusidagi ishlariga omad va muvaffaqiyatlar tiladilar.