Besh tom mahallasida ijtimoiy profilaktika: natijalar va muammolar tahlil qilindi

Bugungi kunda mahallalarda jinoyatchilikning oldini olish, ijtimoiy profilaktika ishlarini samarali tashkil etish va aholi muammolarini joyida hal qilish davlat siyosatining ustuvor yoʻnalishlaridan biri hisoblanadi. Shu maqsadda joriy yil 5-yanvar kuni Prezidentimizning maxsus qaror qabul qilinib, bu boradagi ishlar yangi bosqichga koʻtarildi. 15-fevral kuni Amudaryo tumani Prokuraturasi masʼullari rahbarligidagi mahalliy ishchi guruh tomonidan mazkur qaror asosida tumanning Besh tom mahallasida amalga oshirilayotgan ishlar ahvoli joyiga chiqqan holda oʻrganildi.

Besh tom mahallasida jami 3810 nafar aholi istiqomat qiladi. Shundan 1880 nafarini ayollar tashkil etadi. Mahallada 740 ta xonadon, 939 ta oila va 36 ta koʻcha mavjud. Oʻtgan yilning 12 oyi davomida mahallada jami 3 ta jinoyat sodir etilgan. Shundan bittasi oldini olish mumkin boʻlgan, 2 tasi esa aniqlanadigan jinoyatlar hisoblanadi. 2025-yil yakuniga koʻra mahalla toifasi “yashil” deb baholangan. Joriy yil yanvar oyi yakuni boʻyicha esa mahalla hududida bironta ham jinoyat sodir etilmagan va toifa yana “yashil” deb qayd etilgan.

Prezidentimizning yuqoridagi qarori doirasida ishlab chiqilgan choraklik “yoʻl xarita” ijrosi boʻyicha oʻrganishlar davomida ayrim kamchiliklar ham aniqlandi. Jumladan, maxsus elektron platformaga orqali profilaktika inspektoriga 37 ta band biriktirilgan boʻlib, joriy yil davomida 21 ta maʼlumot yuklangan. “Yoʻl xaritasi”ning tegishli 4 bandiga muvofiq, voyaga yetmaganlarni qarovsiz va nazoratsiz qoldirgan 5 nafar ota-onalarga nisbatan maʼmuriy bayonnoma rasmiylashtirilgan.

Biroq Qipchoq koʻchasi va Qipchoq choyxona koʻchasiga 2 ta kuzatuv kamerasi oʻrnatish vazifasi bajarilmagan. Shuningdek, xonadonlar, savdo va maishiy xizmat koʻrsatish shoxobchalari, koʻngilochar maskanlar, kafe, restoran va barlarni qoʻriqlovga olish choralari koʻrilmagan. 6 ta ijtimoiy obʼektga “Hudud kamera nazoratida” stikerlari oʻrnatilgan, xolos. Kameralarning oʻzi esa oʻrnatilmagan.

Mazkur platforma boʻyicha xotin-qizlar faoliga 12 ta band biriktirilgan boʻlib, joriy yil davomida faqat 5 tasi boʻyicha maʼlumot yuklangan. Muntazam tazyiq va zoʻravonlikka uchrayotgan xotin-qizlar bilan ijtimoiy profilaktika ishlari tekshiruv kuniga qadar tashkil etilmagan.

Yoshlar yetakchisiga 30 ta band biriktirilgan, ammo 12 tasi boʻyicha maʼlumot kiritilgan, 18 ta band boʻyicha maʼlumot yuklanmagan. 3-yoʻnalish 9.1 bandiga muvofiq, huquqbuzarlikka moyil 3 nafar yosh roʻyxatga olingan. Ulardan 2 nafari bilan profilaktik tadbir oʻtkazilgan, 1 nafari bilan esa umuman oʻtkazilmagan.

Ijtimoiy xodimga 10 ta band biriktirilgan boʻlsa-da, joriy yil davomida bironta maʼlumot yuklanmagan.

Oʻrganish jarayonida huquqbuzarlik ehtimoli boʻlgan shaxslar toifasi ham tahlil qilindi. Mahallada 3 nafar muqaddam sudlangan shaxs mavjud boʻlib, ular bilan profilaktik suhbatlar oʻtkazilgan. Jazoni ijro etish muassasasidan qaytganlar 1 nafar, probatsiya hisobida turganlar 1 nafarni tashkil etadi. Maʼmuriy huquqbuzarlik sodir etib, profilaktik hisobga olinganlar 8 nafar.

Spirtli ichimliklar, giyohvandlik vositalari va psixotrop moddalarga qaramlar 2 nafar boʻlib, ulardan 1 nafari ixtiyoriy ravishda davolanishga yotqizilgan. Ruhiy kasallar 3 nafar, ulardan 1 nafari davolashga yotqizilgan. Qimor va tavakkalchilikka asoslangan oʻyinlarga ruju qoʻyganlar, gʻayriijtimoiy xulq-atvorli shaxslar va qarovsiz voyaga yetmaganlar aniqlanmagan.

Oilaviy zoʻravonlik va tazyiq holatlari profilaktikasi doirasida 5 nafar xotin-qizga himoya orderlari berilgan. Biroq ajrim yoqasiga kelgan va nizoli oilalar bilan “xonadonbay” va “oilabay” profilaktika ishlari yetarlicha tashkil etilmagan.

Oʻrganishlar davomida Besh tom mahallasi jinoyatchilik koʻrsatkichlari boʻyicha “yashil” toifada saqlanib qolayotgan boʻlsa-da, “yoʻl xarita” ijrosi, elektron platformaga maʼlumot kiritish, videokuzatuv tizimini joriy etish va xotin-qizlar hamda yoshlar bilan profilaktika ishlarini kuchaytirish boʻyicha jiddiy kamchiliklar mavjudligi aniqlandi. Mazkur kamchiliklarni qisqa fursatlarda bartaraf etish boʻyicha “mahalla yettiligi” aʼzolariga zarur topshiriqlar berildi.