MAHALLALARDA XAVFSIZ MUHITNI YaRATISh BOʻYIChA MANZILLI IShLAR DAVOM ETMOQDA

Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi Qarori ijrosini taʼminlash yuzasidan joylarda aniq va maqsadli ishlar amalga oshirilmoqda. Xususan, Amudaryo tumanida mazkur hujjat talablaridan kelib chiqqan holda mahallalarda tinchlik-osoyishtalikni mustahkamlash, huquqbuzarliklarning barvaqt oldini olish hamda aholining xavfsizligini taʼminlashga qaratilgan chora-tadbirlar izchil yoʻlga qoʻyilgan.

Amudaryo tumani Ichki ishlar boʻlimi huzuridagi Qoʻriqlash xizmati tomonidan 2026-yil davomida tuman mahallalarida xavfsiz muhitni yaratish va profilaktika ishlari samaradorligini oshirish ustuvor vazifa sifatida belgilangan. Ayniqsa, kriminogen vaziyati ogʻir, “qizil” toifaga kiritilgan hududlarda manzilli ishlash tizimi asosida keng qamrovli tadbirlar amalga oshirilmoqda. Tumanning Durunki mahallasi ham kriminogen vaziyat borasida “qizil” toifaga kiritilgan. Tuman Ichki ishlar boʻlimi huzuridagi Qoʻriqlash xizmati tomonidan mazkur hududda aholi xonadonlari, tadbirkorlik obʼektlari oʻrganilib, qoʻriqlash xizmati imkoniyatlari va afzalliklari toʻgʻrisida tushuntirish, targʻibot va tashviqot tadbirlari muntazam tashkil etilmoqda.

Qoʻriqlash xizmati tomonidan amalga oshirilayotgan ishlar aniq raqamlarda ham oʻz ifodasini topmoqda. Joriy yilning yanvar oyida 8 ta tadbirkorlik obʼekti hamda 8 ta fuqaro xonadonlari qoʻriqlash va yongʻindan ogohlantirish signalizatsiya vositalari orqali qoʻriqqa olindi. Fevral oyida esa 2 ta tadbirkorlik obʼekti, shuningdek, himoya orderi berilgan 61 nafar fuqarolar yashovchi xonadonlar zamonaviy texnik vositalar yordamida muhofazaga olindi. Ushbu obʼekt va xonadonlarga qoʻriqlash va yongʻindan ogohlantirish signalizatsiyasi hamda “Tashvish” tugmasi oʻrnatilishi orqali xavfsizlik darajasi oshirildi. “Tashvish” tugmasining ahamiyati shundaki, agar oilada notinchlik kelib chiqib, himoyaga olingan ayollarga xavf tugʻilsa, ushbu tugma bosilganidan keyin sanoqli daqiqalarda Qoʻriqlash xizmati xodimlari yetib keladi.

Shuningdek, tumandagi 13 ta koʻp qavatli uyning kirish yoʻlaklariga ham “Tashvish” tugmalari oʻrnatilib, mazkur uylardagi 156 ta xonadon xavfsizligi taʼminlangan holda doimiy qoʻriqqa olindi. Bu esa koʻp qavatli uylarda yashovchi aholining xavfsizligini taʼminlash, favqulodda holatlarda tezkor chora koʻrish imkonini yaratmoqda.

Mutaxassislar taʼkidlashicha, manzilli va tizimli yondashuv asosida amalga oshirilayotgan ushbu chora-tadbirlar mahallalarda huquqbuzarliklar sonini qisqartirish, aholining huquqiy ongi va xavfsizlik madaniyatini yuksaltirishga xizmat qiladi. Amudaryo tumanida xavfsiz muhitni yaratish borasida olib borilayotgan bu kabi chora-tadbirlar esa Prezident qarori ijrosining amaliy ifodasi sifatida aholi farovonligi va tinchligini taʼminlashga qaratilgan muhim qadam boʻlib xizmat qilmoqda.