QANGLIDA SAYYoR QABUL: SUD TIZIMIDAGI ISLOHOTLAR MOHIYaTI TUShUNTIRILDI
23-fevral kuni Amudaryo tumanining Qangli ovul fuqarolar yigʻini maʼmuriy binosida sud-huquq masalalariga bagʻishlangan sayyor qabul boʻlib oʻtdi. Unda Jinoyat ishlari boʻyicha Amudaryo tuman sudi raisi Jasurbek Baltabayev, Fuqarolik ishlari boʻyicha Amudaryo tuman sudi raisi Adilbek Seytnazarov, Amudaryo tumani “Madad” nodavlat notijorat tashkiloti yuristi Davron Pirmanov hamda Qangli ovul fuqarolar yigʻini masʼullari, ovul aholisi vakillari ishtirok etdi.
Tadbirda Jinoyat ishlari boʻyicha tuman sudi raisi Jasurbek Baltabayev 2025-yil 21-avgustda qabul qilingan Oʻzbekiston Respublikasi Prezidentining Farmoni haqida maʼlumotlar berdi. Farmonning asosiy maqsadi — sud ishlarini yuritish samaradorligini oshirish, fuqarolar va tadbirkorlar uchun qulaylik yaratish, sud jarayonlarini toʻliq elektronlashtirish orqali odil sudlov darajasini yuksaltirishdan iborat.
Tadbirda “Raqamli sud” kontseptsiyasi doirasida ishlarni elektron shaklga oʻtkazish, qogʻoz hujjat aylanmasini qisqartirish, elektron murojaat va interaktiv xizmatlarni joriy etish rejalashtirilgani taʼkidlandi. Jumladan, “Mening suddagi ishim”, “Mening sudga taalluqliligim” kabi servislar orqali fuqarolar oʻz ishlari haqida onlayn maʼlumot olish imkoniga ega boʻladi.
Shuningdek, sunʼiy intellekt yordamida sud majlisi bayonnomalarini real vaqt rejimida matnga aylantirish, sud hujjatlari loyihalarini avtomatik shakllantirish, ariza berishdan oldin taxminiy natija va sud xarajatlarini hisoblash imkoniyatlari yaratilishi rejalashtirilgan. Tomonlarning sud majlislarida masofadan ishtirok etishi va ish materiallari bilan elektron tanishishi ham islohotlarning muhim jihatlaridan biri sifatida qayd etildi.
Fuqarolik ishlari boʻyicha Amudaryo tuman sudi raisi Adilbek Seytnazarov internet tarmogʻida inson shaʼni va qadr-qimmatini kamsituvchi maʼlumotlar tarqatilganda qoʻllaniladigan choralar haqida tushuntirish berdi. Agar ijtimoiy tarmoqlarda shaxs haqida haqiqatga toʻgʻri kelmaydigan maʼlumotlar tarqatilsa, jabrlanuvchi nafaqat raddiya berishni, balki ushbu maʼlumotlarni oʻchirib tashlash, qidiruv tizimlaridan olib tashlash hamda maʼnaviy zararni undirishni talab qilishi mumkin. Eʼtiborli jihati shundaki, tarqatilgan maʼlumotning haqiqatga toʻgʻri kelishini isbotlash majburiyati endilikda maʼlumotni tarqatgan javobgar zimmasiga yuklatiladi.
Madad” nodavlat notijorat tashkiloti yuristi Davron Pirmanov tashkilotning asosiy maqsadi – jamiyatda huquqiy ong va huquqiy madaniyatni yuksaltirishga koʻmaklashish hamda aholiga birlamchi bepul yuridik yordam koʻrsatish ekanini taʼkidlab, fuqarolarning huquqiy bilimlarini oshirish borasida amalga oshirilayotgan targʻibot ishlari haqida maʼlumotlar berdi.
Sayyor qabul davomida fuqarolar oʻzlarini qiziqtirgan sud-huquq masalalari yuzasidan savollar bilan murojaat qildi va mutaxassislar tomonidan atroflicha javoblar berildi. Tadbir aholining huquqiy madaniyatini oshirish, sud tizimidagi islohotlar mazmun-mohiyatini keng jamoatchilikka yetkazishda muhim ahamiyat kasb etdi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
