Yoshlar kuni – kelajak poydevorini mustahkamlovchi muhim qadam

Oʻzbekiston Respublikasi Prezidentining joriy yil 24-fevral kuni yoshlar bilan oʻtkazgan uchrashuvida belgilab berilgan ustuvor vazifalarga muvofiq, har payshanba kuni yurtimizda “Yoshlar kuni” sifatida qator amaliy ishlar tashkil etilmoqda. Bu tashabbus zamirida bitta ezgu maqsad mujassam — yoshlar muammolarini bevosita joylarda oʻrganish, ularning taklif va tashabbuslarini qoʻllab-quvvatlash hamda hayotda oʻz oʻrnini topishiga koʻmaklashish.

Shu munosabat bilan 26-fevral kuni Qilichboy ovulida joylashgan, Oʻzbekiston Respublikasi Prezidentining 2024-yil 14-fevraldagi 60-sonli qaroriga muvofiq tashkil etilgan xorijiy tillarga ixtisoslashgan oʻquv markazi faoliyati bilan tanishildi. Mazkur markaz yoshlarning zamonaviy bilimlarni egallashi, ayniqsa, xorijiy tillarni puxta oʻrganishi orqali ularning raqobatbardoshligini oshirishga xizmat qilmoqda.

Taʼkidlash joizki, bugun Prezidentimiz tomonidan yoshlarga yaratilayotgan sharoitlar koʻlami tobora kengayib bormoqda. Xorijiy tillarni oʻrganish, zamonaviy kasb-hunar egallash, tadbirkorlikni boshlash uchun imtiyozli kreditlar, sport va madaniyat maskanlarining barpo etilishi — bularning barchasi yosh avlodning barkamol boʻlib voyaga yetishi uchun mustahkam zamin yaratmoqda. Ayniqsa, ijtimoiy himoyaga muhtoj, ogʻir toifadagi yoki otaliqqa olingan yoshlar bilan manzilli ishlash tizimi yoʻlga qoʻyilgani eʼtiborga molikdir.

Oʻquv markazida ana shunday toifadagi yoshlar bilan ochiq muloqot oʻtkazildi. Unda tuman hokimi Sobir Xojametov, tuman xavfsizlik xizmati boʻlimi boshligʻi Baxtiyor Abrayev, tuman prokurori Bahram Masharipov hamda tuman IIB boshligʻi Timur Doshumbayev ishtirok etdi.

Uchrashuv davomida 30 nafar yoshning murojaat va takliflari tinglandi. Jami 7 ta murojaatdan 4 tasi joyida ijobiy hal etildi, 3 tasi esa tegishli tartibda ijroga yoʻnaltirilib, nazoratga olindi. Bu esa yoshlar bilan ishlashda ochiqlik, tezkorlik va masʼuliyat tamoyillari ustuvor ekanini koʻrsatadi.

“Yoshlar kuni” doirasidagi tadbirlar yoshlarning boʻsh vaqtini mazmunli tashkil etishga ham qaratildi. Hududdagi 83-sonli maktabda qoʻl jangi boʻyicha Oʻzbekiston chempionlarini tantanali taqdirlash marosimi boʻlib oʻtdi. Bu kabi eʼtirof va ragʻbat yoshlarni yanada katta marralar sari ruhlantiradi, sogʻlom turmush tarzini targʻib etadi.

Shuningdek, 15-sonli maktabda shashka va shaxmat boʻyicha musobaqalar oʻtkazildi. Intellektual sport turlari yoshlarning tafakkurini oʻtkirlashtirib, strategik fikrlash koʻnikmalarini rivojlantiradi. Rahbarlar sportchi yoshlar bilan samimiy suhbat qurib, ularning yutuqlari va kelgusidagi maqsadlari bilan qiziqdilar.

Qayd etish kerakki, bugungi kunda Prezidentimiz tashabbusi bilan amalga oshirilayotgan keng koʻlamli islohotlar samarasini yoshlar hayotida yaqqol koʻrish mumkin. Taʼlim, bandlik, tadbirkorlik, sport va maʼnaviyat yoʻnalishlarida yaratilayotgan imkoniyatlar yoshlarning ertangi kunga ishonchini mustahkamlamoqda.

Zero, yoshlar — mamlakatning strategik resursi, taraqqiyotning harakatlantiruvchi kuchidir. Ularni qoʻllab-quvvatlash, muammolarini hal etish va salohiyatini roʻyobga chiqarish yoʻlida amalga oshirilayotgan har bir tashabbus Yangi Oʻzbekiston kelajagiga qoʻyilgan mustahkam poydevordir.

Charos Arslonova, tuman hokimligining Axborot xizmati rahbari.