Yuqumli kasalliklarning oldini olishga qaratilgan targʻibot ishlari kuchaytirilmoqda

Amudaryo tumanida aholi salomatligini muhofaza qilish, jamoat xavfsizligini taʼminlash hamda turli yuqumli kasalliklarning oldini olishga qaratilgan targʻibot va tushuntirish ishlari izchil davom ettirilmoqda. Ayniqsa, bugungi kunda sanitariya-gigiyena qoidalariga qatʼiy rioya etish, sogʻlom turmush tarzini shakllantirish va kasalliklarning tarqalish xavfini bartaraf etish masalalari dolzarb ahamiyat kasb etmoqda. Shu bois, tuman sanitariya-epidemiologik osoyishtalik va jamoat salomatligi boʻlimi xodimlari tomonidan mahallalarda keng qamrovli profilaktik tadbirlar amalga oshirilmoqda.

Mutaxassislarning taʼkidlashicha, yuqumli kasalliklar bakteriyalar, viruslar, zamburugʻlar va parazitlar singari turli mikroorganizmlar taʼsirida kelib chiqadi. Ularning eng xavfli jihati shundaki, bunday kasalliklar bir insondan boshqasiga oson yuqishi mumkin. Kasalliklar havo-tomchi, maishiy muloqot, iflos qoʻl, sifatsiz oziq-ovqat yoki ichimlik suvi, shuningdek, sanitariya talablariga rioya etilmagan muhit orqali tarqalishi mumkin. Ayrim holatlarda esa mavsumiy omillar, aholining gavjum joylarda koʻp boʻlishi va shaxsiy gigiyena qoidalariga beparvolik ham yuqumli xastaliklarning tarqalishiga sabab boʻladi.

Shu nuqtai nazardan, tuman sanitariya-epidemiologik osoyishtalik va jamoat salomatligi boʻlimi tomonidan mahallalarda olib borilayotgan targʻibot ishlari aholining bu boradagi bilimini oshirishga xizmat qilmoqda. Profilaktik tadbirlar davomida fuqarolarga yuqumli kasalliklarning kelib chiqish sabablari, ularning dastlabki belgilari, yuqish yoʻllari hamda eng muhimi, oldini olish choralari haqida keng tushuntirishlar berilmoqda. Ayniqsa, qoʻllarni tez-tez sovunlab yuvish, toza ichimlik suvidan foydalanish, oziq-ovqat mahsulotlarini toʻgʻri saqlash, xonadon va atrof-muhit tozaligiga eʼtibor qaratish, bemorlar bilan muloqotda ehtiyotkor boʻlish kabi oddiy, ammo muhim qoidalarning ahamiyatiga alohida urgʻu berilmoqda.

Taʼkidlash joizki, bu kabi targʻibot ishlari faqatgina ogʻzaki tushuntirishlar bilan cheklanib qolmayapti. Boʻlim xodimlari aholi bilan profilaktik suhbatlar va uchrashuvlar oʻtkazib, turli yosh toifalari va ijtimoiy qatlam vakillari bilan manzilli ish olib bormoqda. Shuningdek, tibbiyot xodimlari ishtirokida seminar va maʼruzalar tashkil qilinib, ular orqali yuqumli kasalliklarni erta aniqlash va oʻz vaqtida shifokorga murojaat qilish madaniyatini shakllantirishga eʼtibor qaratilmoqda.

Bundan tashqari, sanitariya-gigiyena qoidalariga bagʻishlangan buklet va plakatlar tarqatilishi ham aholiga qulay va tushunarli shaklda maʼlumot yetkazishda muhim vosita boʻlmoqda. Ayniqsa, maktab va maktabgacha taʼlim muassasalarida olib borilayotgan targʻibot ishlari yosh avlod ongida sogʻlom turmush tarzi koʻnikmalarini mustahkamlashga xizmat qilmoqda. Bolalarga shaxsiy gigiyena, ozodalik, toʻgʻri ovqatlanish va jamoat joylarida oʻzini tutish qoidalari haqida tushunchalar berilishi kelgusida jamiyat salomatligini yanada mustahkamlashda muhim ahamiyat kasb etadi.

Shu bilan birga, ommaviy axborot vositalari va ijtimoiy tarmoqlar orqali ham aholiga tezkor va ishonchli maʼlumotlar yetkazish choralari koʻrilmoqda. Bu esa nafaqat profilaktika ishlarining qamrovini kengaytirmoqda, balki odamlarning salomatlikka daxldor masalalarda masʼuliyatini oshirishga ham xizmat qilmoqda. Zero, har bir inson oʻz salomatligiga befarq boʻlmasa, oila va jamiyat salomatligini asrashga munosib hissa qoʻshgan boʻladi.

Amudaryo tumanida yuqumli kasalliklarning oldini olishga qaratilgan profilaktika va targʻibot ishlari izil davom ettirilmoqda. Bu yoʻnalishdagi saʼy-harakatlar fuqarolarning tibbiy madaniyatini oshirish, kasalliklarning tarqalish xavfini kamaytirish va sogʻlom turmush tarzini qaror toptirishga xizmat qilayotgani bilan ahamiyatlidir. Eng muhimi, bunday tadbirlar har bir insonni oʻz salomatligi uchun masʼul boʻlishga, tozalik va ehtiyotkorlikni kundalik hayot tarziga aylantirishga undaydi.

I.Yusupov, Amudaryo tuman SEO va JSB sanitariya vrachi