"Siyosatdagi yoshlar" intellektual turniri oʻtkazildi
Oʻzbekiston Xalq demokratik partiyasi Qoraqalpogʻiston Respublikasi Kengashi tomonidan Amudaryo tumanida "Siyosatdagi yoshlar" intellektual turniri oʻtkazildi.
Tadbirda Oʻzbekiston Xalq demokratik partiyasi Qoraqalpogʻiston Respublikasi Kengashi masʼul xodimlari, Xalq deputatlari Amudaryo tuman Kengashidagi partiya guruhi aʼzolari, partiyaning "Yoshlar qanoti" aʼzolari, partiya faollari, yoshlar va ommaviy axborot vositalari vakillari ishtirok etdi.
Tadbirni Oʻzbekiston Xalq demokratik partiyasi Qoraqalpogʻiston Respublikasi Kengashi raisi oʻrinbosari Maxmud Yesengeldiyev hamda partiyaning Qoraqalpogʻiston Respublikasi Kengashi Yoshlar va xotin-qizlar bilan ishlash boʻlimi boshligʻi Gulnaz Dalibayevalar soʻzga chiqib ishtirokchilarni samimiy qutlab, turnirda barcha jamoalarga omad va yuksak natijalar tiladi.
Intellektual turnirni tashkil etishdan asosiy maqsad — yoshlarning siyosiy bilim va koʻnikmalarini yuksaltirish, ularning mamlakatimizda kechayotgan siyosiy jarayonlarda faol va ongli ishtirokini taʼminlashdan iborat. Shuningdek, yoshlarning siyosiy-huquqiy savodxonligini aniqlash, ularni har tomonlama qoʻllab-quvvatlash va ragʻbatlantirish ham ustuvor vazifa sifatida belgilandi.
Bu kabi tadbirlar Oʻzbekiston Xalq demokratik partiyasining Saylovoldi dasturida nazarda tutilgan vazifalarni amaliyotga tatbiq etishda muhim ahamiyat kasb etadi. Ayniqsa, partiya safidagi yoshlarning intellektual salohiyatidan samarali foydalanish, yuksak siyosiy bilim va tashkilotchilik qobiliyatiga ega boʻlgan iqtidorli yoshlarni aniqlash hamda ularning isteʼdod va salohiyatini roʻyobga chiqarishga xizmat qiladi.
Intellektual turnirda yoshlardan iborat jamoalar bilim va tafakkur borasida oʻzaro bellashdi. Qizgʻin va murosasiz kechgan tadbir yoshlarning intellektual salohiyati, jamoaviy hamjihatligi va tezkor fikrlash qobiliyatini namoyon etdi.
Tanlov ishtirokchilari ikki shart asosida oʻz bilim va salohiyatlarini sinovdan oʻtkazdi.
“Tezkor savol-javob” deb nomlangan birinchi shartda jamoalar davlat boshqaruvi, siyosiy jarayonlar va huquqiy tizimga oid savollarga qisqa vaqt ichida aniq va toʻgʻri javob berish orqali oʻz bilim darajasi hamda tezkor fikrlash qobiliyatini namoyon etdi.
“Siyosiy tezkor javob berish” nomli ikkinchi shartda esa ishtirokchilar Oʻzbekiston Respublikasi Konstitutsiyasi, “Siyosiy partiyalar toʻgʻrisida”gi Qonun, Saylov kodeksi, Oila kodeksi va Mehnat kodeksi boʻyicha tayyorlangan savollar yuzasidan oʻzaro bellashib, siyosiy-huquqiy savodxonlik darajasini sinovdan oʻtkazdilar.
Yuqori saviyada va qizgʻin raqobat ruhida oʻtgan intellektual turnir yakunlariga koʻra gʻolib jamoalar aniqlandi.
Mazkur bellashuvda bilim va zakovati bilan ajralib turgan “Yuksalish” jamoasi faxrli birinchi oʻrinni qoʻlga kiritdi. “Yoshlar” va “Taraqqiyot” jamoalari ikkinchi oʻringa, “Qalqon” hamda “Vatanparvar” jamoalari esa uchinchi oʻringa sazovor boʻldi.
Gʻoliblar partiyaning Qoraqalpogʻiston Respublikasi Kengashi tomonidan tayyorlangan maxsus diplom va esdalik sovgʻalari bilan taqdirlandi.
Shuningdek, tadbir yakunida partiya safiga yangidan qabul qilingan aʼzolarga partiyaning aʼzolik guvohnomalari tantanali ravishda topshirildi.
Oʻzbekiston XDP Qoraqalpogʻiston Respublikasi Kengashi
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
