Amudaryo tumanida kadastr xizmatlari sifati va qamrovi oshmoqda

Davlat kadastrlari palatasi Qoraqalpogʻiston Respublikasi boshqarmasi Amudaryo tumani filiali tomonidan joriy yil boshidan bugungi kungacha qator amaliy ishlar qilindi.

Filial tomonidan hududda yer va koʻchmas mulk munosabatlarini tartibga solish, fuqarolar hamda tadbirkorlik subʼektlariga qulay va sifatli kadastr xizmatlarini koʻrsatish borasida tizimli ishlar olib borilmoqda. Xususan, Oʻzbekiston Respublikasining 2024-yil 5-avgustdagi “Oʻzboshimchalik bilan egallab olingan yer uchastkalariga hamda ularda qurilgan binolar va inshootlarga boʻlgan huquqlarni eʼtirof etish toʻgʻrisida”gi OʻRQ-937-son Qonuni ijrosini taʼminlash doirasida keng koʻlamli xatlov ishlari tashkil etildi.

Mazkur qonun talablari asosida koʻchmas mulk obʼektlarini xatlovdan oʻtkazish, ularni texnik inventarizatsiya qilish hamda elektron yigʻma jildlarini shakllantirish boʻyicha muhim ishlar amalga oshirildi. Jumladan, 3 ta mahalla fuqarolar yigʻinida jami 2205 ta koʻchmas mulk obʼektlari xatlovdan oʻtkazildi. Hozirgi kunda ushbu jarayon izchil davom ettirilib, tumanning Boʻz solma mahalla fuqarolar yigʻinida xatlov ishlari olib borilmoqda.

Shuningdek, fuqarolar va yuridik shaxslar uchun davlat xizmatlarini yanada qulaylashtirish maqsadida kadastr pasportlarini rasmiylashtirish ishlari ham jadallik bilan amalga oshirilmoqda. Davlat xizmatlari markazlari hamda Oʻzbekiston Respublikasi Yagona interaktiv davlat xizmatlari portali orqali jami 553 nafar jismoniy va yuridik shaxslarga kadastr pasportlari shakllantirib berildi. Bu esa aholiga koʻrsatilayotgan xizmatlar sifati va tezkorligini oshirishga xizmat qilmoqda.

Bundan tashqari, Oʻzbekiston Respublikasi Vazirlar Mahkamasining 2022-yil 14-fevraldagi “Qishloq xoʻjaligiga moʻljallanmagan yer uchastkalarini xususiylashtirish toʻgʻrisida”gi 71-son qarori ijrosi yuzasidan ham tegishli ishlar amalga oshirilmoqda. Mazkur qarorning 2-ilovasiga asosan yer uchastkalarini xususiylashtirish boʻyicha takliflar kiritish hamda ular yuzasidan vakolat doirasida xulosalar berish ishlari olib borildi. Hisobot davrida umumiy maydoni 1,18 gektarni tashkil etuvchi 4 ta yer uchastkasi boʻyicha takliflar kiritildi. Shundan 2 ta yer uchastkasi hozirgi kunda auktsion savdolariga chiqarilgan boʻlsa, qolgan 2 ta yer uchastkasi boʻyicha muhokama jarayonlari davom etmoqda.

Umuman olganda, filial tomonidan amalga oshirilayotgan ushbu ishlar hududda yer va koʻchmas mulkdan samarali foydalanishni taʼminlash, mulk huquqlarini qonuniy rasmiylashtirish hamda aholiga koʻrsatilayotgan davlat xizmatlari sifatini yanada oshirishga xizmat qilmoqda. Kelgusida ham ushbu yoʻnalishdagi ishlarni yanada kengaytirish va takomillashtirish rejalashtirilgan.

Sh.Sultanov, Davlat kadastrlari palatasi Amudaryo tumani filial boshligʻi