Davlat xizmatchilari salomatligi — samarali boshqaruv garovi

Bugungi kunda mamlakatimizda davlat fuqarolik xizmatchilarini har tomonlama qoʻllab-quvvatlash, ularning ijtimoiy himoyasini kuchaytirish va sogʻligʻini muhofaza qilish ustuvor yoʻnalishlardan biriga aylangan. Bu borada qabul qilinayotgan normativ-huquqiy hujjatlar va amaliy tashabbuslar davlat boshqaruvi tizimining samaradorligini oshirishga xizmat qilmoqda.

Ana shunday muhim tashabbuslardan biri sifatida Prezident huzuridagi Davlat xizmatini rivojlantirish agentligi tomonidan Amudaryo tumani Tibbiyot birlashmasida amudaryolik davlat xizmatchilari uchun birlamchi tibbiy koʻrik tashkil etildi. Mazkur tadbir nafaqat xodimlar salomatligini nazorat qilish, balki kasalliklarni erta aniqlash orqali ularning uzoq muddat samarali faoliyat yuritishini taʼminlashga qaratilgani bilan ahamiyatlidir.

Tibbiy koʻrik jarayonida hokimlik xodimlari bilan bir qatorda tashkilot va muassasalar rahbarlari ham qamrab olindi. Bu esa rahbar kadrlar salomatligiga alohida eʼtibor qaratilayotganini, tizimda sogʻlom boshqaruv muhitini shakllantirish uchun muhim qadam ekanligini  koʻrsatadi.

Tibbiy koʻriklar davomida malakali mutaxassislar tomonidan xodimlar kompleks tekshiruvdan oʻtkazildi. Yurak-qon tomir tizimi, qon bosimi, qand miqdori, umumiy laborator tahlillar kabi muhim koʻrsatkichlar oʻrganildi. Shuningdek, har bir xodimga individual yondashuv asosida sogʻlom turmush tarzini yuritish, toʻgʻri ovqatlanish, jismoniy faollikni oshirish hamda stressni boshqarish boʻyicha tavsiyalar berildi.

Mutaxassislarning taʼkidlashicha, aynan profilaktik tibbiy koʻriklar orqali koʻplab kasalliklarning dastlabki belgilari aniqlanadi va bu ularni oʻz vaqtida davolash imkonini yaratadi. Bu esa nafaqat inson salomatligini asrash, balki iqtisodiy va ijtimoiy yoʻqotishlarning oldini olishda ham muhim omil hisoblanadi.

Oʻzbekiston Respublikasining “Davlat fuqarolik xizmati toʻgʻrisida”gi qonunida davlat xizmatchilariga tibbiy xizmat koʻrsatish ijtimoiy himoyaning muhim yoʻnalishlaridan biri sifatida belgilangan. Ushbu norma amaliyotda izchil tatbiq etilayotgani esa davlat tomonidan inson omiliga berilayotgan ustuvor eʼtiborning yaqqol ifodasidir.

Amudaryo tumanida tashkil etilgan mazkur tibbiy koʻrik tadbiri ham ana shu tizimli ishlarning mantiqiy davomi boʻlib, davlat xizmatchilarining sogʻlom va samarali faoliyat yuritishi uchun mustahkam zamin yaratmoqda. Zero, sogʻlom kadr — bu sifatli xizmat, samarali boshqaruv va barqaror rivojlanish demakdir.

Shu bois, bunday tashabbuslarning muntazam davom ettirilishi nafaqat davlat xizmatchilarining hayot sifatini oshiradi, balki jamiyat taraqqiyotiga ham bevosita ijobiy taʼsir koʻrsatadi.