Shimoli-gʻarbiy harbiy okrugida «Ochiq eshiklar kuni» tadbiri oʻtkazildi

Shimoli-gʻarbiy harbiy okrugining Maʼnaviyat va maʼrifat markazida «Ochiq eshiklar kuni» tadbiri oʻtkazildi. Yoshlarning boʻsh vaqtini mazmunli tashkil etish, ularning qalbida Vatanga boʻlgan cheksiz muhabbat va sadoqat tuygʻularini uygʻotish maqsadida oʻtkazilgan ushbu tadbir yoshlar uchun haqiqiy jasorat va matonat maktabiga aylandi.

Tadbirning asosiy maqsadi — yosh avlodni harbiy xizmatning mashaqqatli va sharafli yoʻli bilan yaqindan tanishtirish, ularda milliy armiyamiz bilan faxrlanish hissini shakllantirishdan iborat boʻldi.

Markaz hududida tashkil etilgan harbiy texnika va zamonaviy qurol-yarogʻlar koʻrgazmasi yoshlar uchun shunchaki qiziqarli tomosha emas, balki ularga mamlakatimizning mudofaa qudrati va harbiy salohiyatini oʻz koʻzlari bilan koʻrish uchun ajoyib imkoniyatin boʻldi. Har bir zamonaviy qurol ortida Vatan tinchligini koʻz qorachigʻidek asrayotgan mard oʻgʻlonlarning kuchi, bilimi va jasorati mujassam ekanini yoshlar teran his etdilar. Talaba-yoshlar harbiy texnikalarning imkoniyatlari bilan tanishar ekan, yurt himoyachisi boʻlish naqadar yuksak masʼuliyat ekanini yana bir bor anglab yetdilar.

Tadbirning eng hayajonli va taʼsirli lahzalaridan biri — harbiy xizmatchilar tomonidan namoyish etilgan qoʻl jangi ustalarining chiqishlari boʻldi. Har bir harakatdagi aniqlik, tezkorlik va yuksak intizom tomoshabinlarni hayratga solmay qoʻymadi. Bu chiqishlar shunchaki jismoniy mashq emas, balki yillar davomida toʻplangan tajriba, iroda va bukilmas matonat mahsulidir. Yoshlar bu chiqishlarni kuzatar ekan, kuchli boʻlish, oʻz ustida muntazam ishlash va har qanday vaziyatda Vatan himoyasiga tayyor turish kabi oliyjanob maqsadlarni qalblariga tukkan boʻlsa ajab emas.

Harbiy orkestr sadolari ostida yangragan kuylar va isteʼdodli yoshlar ijrosidagi Vatanni madh etuvchi qoʻshiqlar tadbirga bayramona ruh va koʻtarinkilik bagʻishladi. Bu kuy-qoʻshqiqlar har bir tinglovchining yuragiga kirib borib, oʻz yurti, muqaddas tuprogʻi va hilpirab turgan bayrogʻi bilan faxrlanish tuygʻusini yanada mustahkamladi. Vatanparvarlik nafaqat soʻzda, balki mana shunday kuylarda, inson ruhiyatini junbushga keltiruvchi ohanglarda ham aks etadi. Bunday madaniy chiqishlar harbiy soha va jamiyat oʻrtasidagi maʼnaviy koʻprikni yanada mustahkamlashga xizmat qildi.

Taʼkidlash joizki, «Ochiq eshiklar kuni» doirasida Qoraqalpogʻiston Respublikasidagi barcha oliy taʼlim muassasalari talabalari, keng jamoatchilik vakillari va yosh harbiy xizmatchilar oʻrtasidagi muloqotlar juda samimiy ruhda kechdi. Koʻrgazmali mashgʻulotlar va tashkil etilgan davra suhbatlari orqali yoshlar harbiy xizmatning nazariy va amaliy jihatlarini, uning inson shaxsiyatini shakllantirishdagi ahamiyatini chuqurroq angladilar. Bu yerda toʻplangan yoshlar nafaqat yangi bilimlarga ega boʻlishdi, balki oʻzlarini qiziqtirgan savollarga soha mutaxassislaridan batafsil javoblar oldilar. Bunday bevosita muloqot yoshlarning harbiy kasbga boʻlgan qiziqishini oshirishda muhim omil boʻlib xizmat qiladi.

Shimoli-gʻarbiy harbiy okrugida oʻtkazilgan ushbu maʼnaviy-maʼrifiy tadbir kelajak posponlarini tarbiyalaydigan chinakam maktab vazifasini oʻtdi. Zero, Vatan himoyasi — bu nafaqat harbiylarning vazifasi, balki shu aziz tuproqda yashayotgan har bir fuqaroning muqaddas burchidir. Ushbu tadbirdan koʻzlangan maqsad bitta — tinchlikni asrash, xalq farovonligini taʼminlash va yoshlarni Vatanga sadoqat bilan xizmat qilishga daʼvat etish. Zero, mard va jasur oʻgʻlonlari bor yurtning kelajagi hamisha nurafshon boʻladi.