Urugʻlik chigitning sifati ustidan qatʼiy nazorat oʻrnatilmoqda

Maʼlumki, 2026-yilning 1-yanvaridan eʼtiboran mamlakatimizda urugʻchilik sohasida oʻziga xos yangi, raqamli davr boshlandi. Unga koʻra, mulkchilik shaklidan va qaysi idoraga boʻysunishidan qatʼi nazar, urugʻliklarni yetishtirish va realizatsiya qilish bilan shugʻullanuvchi barcha tadbirkorlik subʼektlari uchun qatʼiy talab oʻrnatildi. Yaʼni, zamonaviy raqamli QR-kodli yorliqlar bilan taʼminlanmagan, shuningdek, maxsus laboratoriyalar tomonidan ijobiy ekinboplik xulosasi olinmagan har qanday qishloq xoʻjaligi ekinlarining urugʻliklarini realizatsiya qilish qatʼiyan taqiqlandi. Bu jarayon, avvalambor, fermerlarni sifatsiz urugʻlardan himoya qilishga, qolaversa, yurtimizda yetishtirilayotgan mahsulotlarning raqobatbardoshligini xalqaro maydonda oshirishga qaratilgani bilan ahamiyatlidir.

Bu borada qabul qilingan Prezidentimizning maxsus Farmoni bilan urugʻlik paxta xom ashyosini qabul qilish, uni xavfsiz va sifatini yoʻqotmagan holda saqlash, dastlabki qayta ishlash bosqichlaridan oʻtkazish, urugʻlik chigit tayyorlash, uni fermerlarga tarqatish va eng asosiysi, barcha bosqichlarda sifatni qatʼiy nazorat qilish boʻyicha masʼul tashkilotlarga bir qator jiddiy vazifalar yuklatilgan.

Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspektsiyasining Qoraqalpogʻiston Respublikasi boshqarmasi Amudaryo tuman boʻlimi tomonidan mazkur Farmon asosida tizimli ishlar amalga oshirilmoqda. Inspektsiya mutaxassislari tomonidan chigitni ekishga tayyorlash jarayonlari ustidan qatʼiy va tizimli nazorat oʻrnatilgan. Zero, moʻl va sifatli hosil yetishtirishning asosiy garovi bevosita yerga qadaladigan urugʻning sogʻlomligi, ekinbopligi va yuqori unuvchanlik xususiyatiga bogʻliqdir.

Joriy yilda Amudaryo tumanida jami 13 ming gektar maydonga chigit ekish rejalashtirilgan. Eʼtiborli jihati shundaki, ushbu maydonning 3 ming 475 gektariga toʻgʻridan-toʻgʻri innovatsion usullar, yaʼni Xitoy-Shinjon texnologiyasi asosida xorijiy, serhosil paxta navlarini ekish belgilangan. Bu zamonaviy texnologiya nafaqat hosildorlikni keskin oshirishga, balki suv va boshqa tabiiy resurslarni tejashga ham xizmat qiladi.

Shu bilan birga, tumandagi mavjud fermer xoʻjaliklari oʻrtasida oʻtkazilgan shaffof tanlovlar natijasida 17 ta eng ilgʻor fermer xoʻjaligi urugʻlik yetishtirish huquqiga ega boʻlgan. Mazkur xoʻjaliklar tomonidan joriy yilda 874 gektar maydonda kelasi yillar uchun sifatli urugʻlik paxta yetishtirilishi rejalashtirilgan boʻlib, bu hududning mahalliy urugʻchilik bazasini yanada mustahkamlashga zamin yaratadi.

Bugungi kunda tumanda faoliyat yuritayotgan “Amudaryo kelajagi” ishlab chiqarish kooperatsiyasi tomonidan xorijdan keltirilgan, sertifikatlangan va barcha sifat talablariga toʻliq javob beradigan urugʻlik chigitlarni fermer xoʻjaliklariga tizimli va oʻz vaqtida tarqatish ishlari uyushqoqlik bilan amalga oshirilmoqda.

Bu muhim jarayonning har bir bosqichi, urugʻning ombordan chiqishidan tortib, to dalaga yetib borguniga qadar boʻlgan davr Agrosanoat majmui ustidan nazorat qilish inspektsiyasining Amudaryo tumani boʻlimi inspektorlari tomonidan kunu tun nazorat qilib borilmoqda. Zero, urugʻlik chigitning sifatini nazorat qilish – bu shunchaki mavsumiy agrotexnik jarayon emas, balki butun boshli mintaqaning iqtisodiy farovonligi, minglab oilalarning barqaror daromadi va mamlakat yengil sanoatini mustahkam xomashyo bilan taʼminlashning asosiy shartidir. Amudaryo tumanida olib borilayotgan bu kabi tadbirlar ertangi kunda xirmonimizning yanada yuksak boʻlishiga, el-yurtimiz dasturxoni toʻkinligi va iqtisodiyotimizning yanada gullab-yashnashiga xizmat qiladi.