Madaniyat va sanʼat xodimlari kuni munosabati bilan bayram dasturxoni yozildi

Har bir millatning ruhi, uning asriy qadriyatlari va tarixi, eng avvalo, madaniyati hamda sanʼatida oʻz aksini topadi. Inson maʼnaviyatini yuksaltirish, yosh avlod qalbida goʻzallikka boʻlgan mehrni uygʻotishda madaniyat oʻchoqlarining oʻrni beqiyosdir. Davr bilan hamnafas tarzda madaniyat va sanʼatni yanada rivojlantirish maqsadida Amudaryo tumani madaniyat boʻlimi tomonidan ham keng koʻlamli, tahsinga sazovor ishlar amalga oshirib kelinmoqda.

15-aprel – Madaniyat va sanʼat xodimlari kuni munosabati bilan ana shunday oʻz kasbining fidoyilari uchun Amudaryo tumani hokimligi tashabbusi bilan bayram dasturxoni yozildi. Tadbirda hokim oʻrinbosari Nodirbek Kamolov ishtirok etib, tuman hokimi Sobir Xoʻjametovning soha xodimlariga bayram tabrigini oʻqib eshittirdi va esdalik sovgʻalarini topshirdi.

Aytish kerakki, Amudaryo tuman madaniyat boʻlimi tasarrufida bugungi kunda jami 7 ta madaniyat markazi aholiga madaniy xizmat koʻrsatib kelmoqda. Bu maskanlarning bittasi tuman madaniyat markazi maqomiga ega boʻlsa, qolgan oltitasi hududiy madaniyat markazlari sifatida faoliyat yuritadi. Mazkur madaniyat dargohlarida jami 96 nafar ishchi-xodim mehnat qilmoqda. Xodimlarning 19 nafari oliy, 14 nafari esa tugallanmagan oliy maʼlumotga ega.

Boʻlim tasarrufidagi 34-sonli tuman madaniyat markazi 250-oʻrindiqli muhtasham kontsert zaliga ega boʻlib, u yerda madaniyat va sanʼat yoʻnalishidagi ikkita toʻgarak muntazam faoliyat yuritadi. Bundan tashqari, ushbu markazda uchta mashhur xalq jamoasi – ashula va raqs yoʻnalishidagi “Uchqun” xalq ansambli, qadimiy anʼanalarimizni tarannum etuvchi “Ofarin” folklor-etnografik xalq ansambli hamda “Jayxun moʻʼjizasi” anʼanaviy sahna tsirk xalq havaskorlik jamoasi aholiga yuqori saviyada madaniy xizmat koʻrsatib kelmoqda.

Hududiy markazlarda ham jonli ijodiy muhit hukmron. Jumladan, Bobur ovuli hududida joylashgan 38-sonli, Boʻz-yop ovulidagi 39-sonli, Uyshin mahallasidagi 35-sonli, Choykoʻl ovulidagi 36-sonli, Qangli ovulida joylashgan 37-sonli va Qilichboy ovulidagi 40-sonli madaniyat markazlarda jami 19 ta toʻgaraklar faoliyat olib bormoqda.

Oʻz kasbining fidoyilari boʻlmish madaniyat va sanʼat xodimlari tumanda umumxalq bayramlari, muhim sanalar va kasb bayramlari munosabati bilan tashkil qilinadigan tantanalar, ijodiy uchrashuvlar, madaniy kechalar va kontsert dasturlarini yuqori saviyada tashkil qilish orqali aholiga sifatli madaniy xizmat koʻrsatib kelmoqdalar. Ularning bu mehnatlari davlatimiz va hukumatimiz tomonidan ham munosib ragʻbatlantirib kelinmoqda. Soha xodimlari va faxriylar orasida Qoraqalpogʻistonda xizmat koʻrsatgan madaniyat xodimi faxriy unvoni, “Madaniyat va sanʼat fidokori”, “Vatan fidoyisi”, “Umid uchquni” kabi koʻkrak nishonilari sohib va sohibalari bor.

Madaniyat va sanʼat sohasi rivoji yoʻlida xizmat qilayotgan bu insonlarning fidokorona mehnati tuman aholisining maʼnaviy olamini boyitishda, kelajak avlodga goʻzal qadriyatlarimizni bezavol yetkazishda mustahkam poydevor boʻlib xizmat qilmoqda va kelgusidagi yuksak muvaffaqiyatlar uchun muhim zamin yaratmoqda.

15-aprel – Madaniyat va sanʼat xodimlari kuni munosabati bilan tashkil qilingan bayram tadbiri ularning mehnatlarini munosib eʼtirof etish yoʻlidagi navbatdagi qadam boʻldi. Fursatdan foydalanib, biz ham qadrli madaniyat va sanʼat xodimlariga mustahkam sogʻliq, baxt-saodat, yangi ijodiy yutuqlar tilab qolamiz.