Nukusda «Jasorat uchqunlari» musobaqasining Respublika bosqichi boʻlib oʻtdi

Har bir davlatning qudrati, tinchligi va kelajagi uning voyaga yetib kelayotgan navqiron avlodi qalbida shakllangan vatanparvarlik tuygʻusi, mustahkam irodasi hamda har tomonlama yetuk bilimlari bilan oʻlchanadi. Bugungi shiddat bilan rivojlanib borayotgan globallashuv davrida yoshlarni nafaqat jismonan baquvvat, balki maʼnan yetuk, zamonaviy bilimlarni puxta egallagan va oʻz Vatanini sevadigan, uning himoyasiga doimo shay turadigan insonlar etib tarbiyalash eng ustuvor yoʻnalishlardan biriga aylangan. Nukus shahrida navqiron avlod vakillari ishtirokida oʻtkazilgan “Jasorat uchqunlari” sport va maʼrifiy musobaqasining Respublika bosqichi ham shu maqsadga qaratilgan ahamiyatli tadbirlardan biri boʻldi.

Oʻsib kelayotgan yosh avlod qalbida Vatanga muhabbat, sadoqat va masʼuliyat tuygʻularini yuksaltirishga xizmat qiluvchi mazkur musobaqa shunchaki kuch sinashish maydoni emas, balki yoshlarning oʻziga xos matonat, doʻstlik va bilim maktabiga aylandi.

Ushbu nufuzli tadbirning ochilish marosimida Shimoli-gʻarbiy harbiy okrug qoʻmondonligi hamda Qoraqalpogʻiston Respublikasi Maktabgacha va maktab taʼlimi boshqarmasining masʼul rahbarlari, harbiy xizmatchilar va faxriy ustozlar ishtirok etishdi. Soʻzga chiqqanlar mamlakatimizda yoshlarga qaratilayotgan ulkan eʼtibor, ularning har tomonlama barkamol boʻlib voyaga yetishlari uchun yaratilayotgan keng imkoniyatlar haqida toʻxtalib oʻtishdi. Shuningdek, bu kabi harbiy-vatanparvarlik musobaqalari yoshlarda temir intizom, jamoaviy jipslik va mardlik fazilatlarini yanada rivojlantirishini alohida taʼkidladilar.

Musobaqalarda Qoraqalpogʻiston Respublikasining barcha hududlarida faoliyat yuritayotgan “Jasorat maktablari”ning eng sara, chaqqon va bilimli 5–9-sinf oʻquvchilaridan iborat jamoalar oʻzaro bellashdilar. Eʼtiborli jihati shundaki, mazkur yosh toifasi oʻquvchilarning dunyoqarashi shakllanadigan, ularda yetakchilik qobiliyatlari yuzaga chiqadigan eng muhim davr hisoblanadi.

Nizomga koʻra, har bir jamoa 8 nafar ishtirokchidan tashkil topgan boʻlib, ular musobaqa davomida bir yoqadan bosh chiqarib, haqiqiy jamoaviy ruhni, bir-birini qoʻllab-quvvatlash va oʻzaro uygʻunlikda harakat qilish koʻnikmalarini namoyish etishlari talab etildi.

Ishtirokchilar bir qator murakkab, ammo oʻta qiziqarli va muhim 5 ta yoʻnalish boʻyicha oʻz mahoratlarini sinovdan oʻtkazdilar. Xususan, saf tayyorgarligi shartida yoshlarning harbiy intizomi, qadamlarni bir xilda tashlashi va buyruqlarni soʻzsiz bajarishi koʻrikdan oʻtkazildi. Tibbiy bilim va koʻnikmalar sinovi ishtirokchilarni favqulodda vaziyatlarda birinchi yordam koʻrsatishga oʻrgatgan boʻlsa, zamonaviy dunyo talablaridan kelib chiqqan holda dasturga kiritilgan robototexnika yoʻnalishi oʻquvchilarning intellektual salohiyati va muhandislik iqtidorlarini namoyon etish uchun ajoyib maydon boʻldi. Shuningdek, huquqiy savodxonlik yoʻnalishida yoshlarning oʻz huquq va burchlarini qay darajada bilishi sinovdan oʻtkazildi. Milliy sport oʻyinlari shartida esa ularning jismoniy baquvvatligi va ajdodlarimizdan meros boʻlib kelayotgan qadriyatimizga boʻlgan hurmati yaqqol koʻzga tashlandi.

Kun boʻyi davom etgan, sogʻlom raqobat va hayajonli lahzalarga boy boʻlgan bellashuvlar yakuniga koʻra, hakamlar hayʼati gʻoliblarni eʼlon qildi. Barcha yoʻnalishlarda yuqori natijalarni qayd etib, oʻzlarining tengsiz ekanliklarini isbotlagan Qonlikoʻl tumanidagi 2-sonli umumtaʼlim maktabining “Lochin” jamoasi mutlaq gʻolib deb topildi va faxrli 1-oʻrinni qoʻlga kiritdi.

Oʻzining mustahkam irodasi va ahil jamoaviy harakatlari bilan ajralib turgan Taxiatosh tumanidagi 4-sonli umumtaʼlim maktabining “Jayxun” jamoasi esa 2-oʻringa sazovor boʻldi. Har bir shartda faol ishtirok etib, oʻzlarining qalqondek mustahkam ekanliklarini koʻrsata olgan Chimboy tumanidagi 36-sonli umumtaʼlim maktabining “Qalqon” jamoasi 3-oʻrin sohibi boʻldi.

“Jasorat uchqunlari” musobaqasi shunchaki tanlov emas, balki yosh qalblarda porlagan vatanparvarlik uchqunlarini yurtga sadoqat oloviga aylantirgan muhim bellashuv boʻldi. Mana shunday iqtidorli va shijoatli yoshlari bor yurtning sarhadlari daxlsiz, kelajagi esa buyukdir.