«Iqtidor maktab ansambli» tanlovining tuman bosqichi oʻtkazildi

Sanʼat va madaniyat — inson maʼnaviyatining yuksak choʻqqisi, milliy oʻzlikni anglashning muhim vositasidir. Ayniqsa, yosh avlod qalbida goʻzallikka oshnolik, milliy qadriyatlarga hurmat va ijodiy tafakkurni shakllantirish bugungi davlat siyosatining ustuvor yoʻnalishlaridan biriga aylangan. Shu maʼnoda, yurtimizda navqiron isteʼdodlarni kashf etish va ularni qoʻllab-quvvatlashga qaratilgan keng koʻlamli islohotlar amalga oshirilib, bugun oʻz mevasini bermoqda. Amudaryo tumanida oʻtkazilgan navbatdagi ijodiy bellashuv ham ana shunday ezgu maqsadlarning amaldagi ifodasi boʻldi.

Oʻzbekiston Respublikasi Prezidentining 2025-yil 8-sentyabrdagi “Maktabdan tashqari taʼlim tizimini yangi bosqichga olib chiqish chora-tadbirlari toʻgʻrisida”gi qarori hamda Maktabgacha va maktab taʼlimi vazirligining 2026-yil 10-fevraldagi tegishli buyruqlari ijrosini taʼminlash maqsadida tashkil etilgan «Iqtidor maktab ansambli» tanlovining tuman bosqichi haqiqiy sanʼat bayramiga aylanib ketdi.

Amudaryo tumanidagi 9-sonli bolalar musiqa va sanʼat maktabi binosida boʻlib oʻtgan ushbu nufuzli tadbir Qoraqalpogʻiston Respublikasi “Kelajak” markazining tashabbusi bilan yuqori saviyada tashkil etildi. Tanlovning zamirida yoshlar oʻrtasida notiqlik sanʼati va sahna madaniyatini yuksaltirish, taʼlim muassasalaridagi oʻquvchilarning ijodiy hamda intellektual salohiyatini roʻyobga chiqarishdek olijanob maqsadlar mujassam. Shuningdek, Prezidentimiz tomonidan ilgari surilgan beshta muhim tashabbus doirasida yoshlarni vatanparvarlik ruhida tarbiyalash, ular uchun inklyuziv ijodiy muhit yaratish va erishilgan yutuqlarni ommalashtirish tadbirning asosiy mezoni sifatida belgilandi. Bu kabi loyihalar nafaqat sanʼatga boʻlgan qiziqishni orttiradi, balki yosh avlodning boʻsh vaqtini mazmunli tashkil etish va ularning qalbida milliy gʻurur tuygʻularini joʻsh urdirishga ham xizmat qiladi.

Tanlovda tumandagi umumtaʼlim maktablaridan jami 55 ta jamoa ishtirok etgani bellashuvning nechogʻlik keng qamrovli va murosasiz kechganidan dalolat beradi. Sahnada jarang sochgan oʻzbek milliy cholgʻu asboblarining sehrli navolari, oʻquvchilarning mahorat bilan ijro etgan kuylari tomoshabinlar va hakamlar hayʼatining olqishlariga sazovor boʻldi. Isteʼdodli yoshlarning chiqishlarini baholab borish uchun musiqa va sanʼat maktabining koʻp yillik tajribaga ega, malakali oʻqituvchilari jalb etildi. Hakamlar hayʼati har bir ijroni sinchkovlik bilan kuzatib, kuyning ohangdorligi, ijro mahorati va jamoaviy jipslikka alohida eʼtibor qaratdilar. Milliy merosimiz boʻlgan cholgʻu ijrochiligi sanʼati yoshlar qoʻlida yangicha mazmun va joziba kasb etgani tadbirning eng quvonarli jihati boʻldi.

Qizgʻin va maroqli kechgan bahslar yakunida gʻoliblar aniqlandi. Hakamlar hayʼatining xulosasiga koʻra, faxrli uchinchi oʻrin 28-sonli maktabning “Yosh sanʼatshunoslar” jamoasiga nasib etdi va ular 3-darajali diplom bilan taqdirlandilar. Ikkinchi oʻrinni 40-sonli maktabning mahoratli yoshlaridan iborat “Dilnavo” jamoasi egallab, 2-darajali diplomga loyiq koʻrildi. Tanlovning mutlaq gʻolibi sifatida 55-sonli maktabning “Gʻuncha” jamoasi eʼtirof etildi. Ushbu jamoa 1-darajali diplom hamda “Kelajak” markazining maxsus esdalik sovgʻalari bilan taqdirlanib, oʻz maktabi va ustozlari ishonchini oqladilar. Shuningdek, tadbirni yuqori darajada oʻtkazishda yaqindan koʻmak bergan va mezbonlik qilgan 9-sonli bolalar musiqa va sanʼat maktabi jamoasiga tashkilotchilar tomonidan alohida tashakkurnoma topshirildi.

“Iqtidor maktab ansambli” tanlovi amudaryolik yoshlar uchun nafaqat ijodiy bellashuv, balki doʻstlik va sanʼat bayramiga aylandi. Mazkur tadbir yurtimizda yosh isteʼdodlarni izlab topish, ularga oʻz iqtidorlarini namoyish etishlari uchun keng imkoniyatlar yaratish ishlari tizimli ravishda yoʻlga qoʻyilganini yana bir bor isbotladi. Zero, sanʼatga oshno boʻlgan, musiqani his qilgan yoshlar kelajakda Vatanimizning maʼnaviy poydevorini mustahkamlaydigan komil insonlar boʻlib voyaga yetadilar. Bugun sahnaga ilk qadamlarini qoʻyayotgan ushbu “gʻuncha”lar ertaga katta sanʼat olamining yorqin yulduzlariga aylanishiga shubha yoʻq.