Amudaryo tumanida gʻoʻza parvarishi va innovatsion texnologiyalarga bagʻishlangan koʻrgazmali seminar oʻtkazildi

Qishloq xoʻjaligi mamlakatimiz iqtisodiyotining eng muhim va tayanch tarmoqlaridan biri hisoblanadi. Ayniqsa, paxtachilik sohasida amalga oshirilayotgan izchil islohotlar, yerga boʻlgan munosabatning tubdan oʻzgarishi hamda ilgʻor xorijiy tajribalarning amaliyotga keng tatbiq etilishi natijasida moʻl va sifatli hosil yetishtirish uchun mustahkam zamin yaratilmoqda.

Bahorgi ekin-tikin ishlari yakuniga yetib, gʻoʻza nihollari tekis unib chiqqan ayni shu masʼuliyatli pallada ularni toʻgʻri va agrotexnik talablar asosida parvarish qilish dehqonlardan katta eʼtibor, bilim hamda mahorat talab etadi. Bu borada, ayniqsa, gʻoʻza qator oralariga birinchi ishlov berish, yaʼni kultivatsiya jarayonlarini sifatli hamda oʻz vaqtida oʻtkazish kelajak hosil taqdirini hal qiluvchi asosiy omillardan biridir. Shu maqsadda joylarda muntazam ravishda tashkil etilayotgan koʻrgazmali oʻquv-amaliy seminarlari klaster korxonalari, fermer xoʻjaliklari rahbarlari va mexanizatorlar uchun oʻziga xos tajriba almashish maktabi boʻlib xizmat qilmoqda.

Ana shunday tadbirlardan biri Amudaryo tumanining Qilichboy ovuli hududida ham boʻlib oʻtdi. Mazkur hududda samarali faoliyat yuritayotgan "Amirxon" fermer xoʻjaligi dalalarida gʻoʻza qator oralarini kultivatsiya qilish masalalariga bagʻishlangan keng qamrovli koʻrgazmali seminar tashkil etildi. Ushbu seminarda nafaqat joriy yilgi hosil taqdiriga daxldor boʻlgan kechiktirib boʻlmas agrotexnik tadbirlarni belgilab olish, balki qishloq xoʻjaligi sohasiga kirib kelayotgan yangi innovatsion texnologiyalar hamda xorij tajribasi bilan yaqindan tanishish masalasi ham muhokamalar markazida boʻldi.

Maʼlumot oʻrnida taʼkidlash joizki, joriy yilda Amudaryo tumani boʻyicha jami 13 ming gektar maydonga chigit ekilgan. Bugungi kunda deyarli barcha maydonlarda urugʻlar bir tekis unib chiqqan boʻlib, hududlardagi barcha fermer xoʻjaliklarida parvarish jarayonlari eng qizgʻin pallaga kirgan. Dehqonlarning fidokorona mehnatlari natijasida qisqa vaqt ichida tuman boʻyicha gʻoʻza qator oralariga ishlov berilgan, yaʼni kultivatsiya qilingan maydonlar hajmi 1 500 gektarga yaqinlashdi.

Albatta, bunday keng koʻlamdagi maydonlarda agrotexnik tadbirlarni sifatli oʻtkazish maqsadida zamonaviy texnika va mexanizmlardan unumli foydalanish, shuningdek, soha vakillarining tavsiyalariga qatʼiy amal qilish talab etiladi. Shu maqsadda "Amirxon" fermer xoʻjaligida tashkil etilgan koʻrgazmali seminarda tuman hokimi Sobir Xoʻjametov boshchiligidagi rahbarlar, agrar soha masʼullari, klaster korxonalari vakillari hamda hududdagi fermerlar ishtirok etishdi.

Tuman hokimi va boshqa masʼullar oʻz soʻzida global iqlim oʻzgarishlari va suv resurslarining taqchilligi sharoitida har bir qarich yerdan oqilona foydalanish, ilm-fan yutuqlarini amaliyotga joriy etish davr talabi ekanligini taʼkidlashdi. Shuningdek, mutasaddilar tomonidan kultivatsiya jarayonida eʼtibor qaratish lozim boʻlgan eng muhim jihatlar, xususan, traktorlarning yurish tezligi, ishchi organlarning sozligi hamda tuproqni yumshatish chuqurligiga doir aniq koʻrsatmalar berib oʻtildi.

Bugungi kunda yurtimiz qishloq xoʻjaligida dunyoning rivojlangan davlatlari tajribalarini oʻzlashtirishga va amaliyotga tatbiq etishga katta eʼtibor qaratilmoqda. Jumladan, paxtachilik yoʻnalishida Xitoy texnologiyasining joriy etilishi hosildorlikni oshirishda muhim qadamlardan biri boʻlmoqda. Seminarda ishtirok etgan xitoylik mutaxassis Xitoy usulida ekilgan paxtani parvarish qilishning oʻziga xos jihatlari, uning parvarishidagi muhim agrotexnik talablar haqida yigʻilganlarga batafsil maʼlumot va tushunchalar berdi. Xorijlik agronom tomonidan berilgan qimmatli maslahatlar va yoʻriqnomalar gʻoʻza parvarishida yoʻl qoʻyilishi mumkin boʻlgan xatolarning oldini olish hamda hosildorlikni sezilarli darajada oshirishga xizmat qilishi shubhasizdir.

Agrotexnik tadbirlarni yuqori sifatda va qisqa muddatlarda oʻtkazishda zamonaviy hamda kuchli texnikalarning oʻrni beqiyosdir. Ayni kunlarda "Amirxon" fermer xoʻjaligi dalalarida olib borilayotgan kultivatsiya jarayonlarida Turkiyadan keltirilgan eng soʻnggi rusumdagi zamonaviy moslamalardan foydalanilmoqda. Bu texnikalar oʻzining bir qator afzalliklari bilan avvalgi avlod moslamalaridan tubdan farq qiladi. Tadbir ishtirokchilari ushbu xorijiy texnikaning daladagi amaliy ishini oʻz koʻzlari bilan kuzatar ekanlar, uning unumdorligiga va ish sifatiga yuqori baho berdilar. Ushbu koʻp funktsiyali innovatsion kultivator bir vaqtning oʻzida bir nechta muhim vazifalarni bajarish xususiyatiga ega. U nafaqat gʻoʻza qator oralaridagi tuproqni belgilangan meʼyorda va bir tekisda yumshatadi, balki shu bilan birgalikda oʻsimlikka zarur boʻlgan oziqa moddalarini, yaʼni mineral oʻgʻitlarni ham berib ketadi. Eng eʼtiborli jihatlardan biri shundaki, mazkur zamonaviy agregat gʻoʻzani tubigacha yumshatish qobiliyatiga ega. Bu jarayon ildiz tizimining kislorod bilan toʻliq toʻyinishini taʼminlaydi va yer ostidagi tabiiy namlikni uzoq vaqt saqlab qolishga yordam beradi. Bunday tejamkor va unumdor texnikalarning dalalarimizda keng ishlatilishi nafaqat qimmatli vaqt va yoqilgʻini tejashga, balki ogʻir qoʻl mehnatini kamaytirib, umumiy ish sifatini yuqori darajaga koʻtarishga xizmat qilmoqda.

Koʻrgazmali amaliy seminar tumanning barcha qishloq xoʻjaligi xodimlari, agronomlari va mexanizatorlari uchun joriy yilgi paxta hosilini yetishtirishda oʻziga xos tajriba maktabi vazifasini oʻtadi. Yurtimizning ulkan xirmoni yanada yuksalishiga, tuman iqtisodiyotining barqaror mustahkamlanishiga va eng asosiysi, elimiz farovonligining oshishiga xizmat qiluvchi bunday ezgu va rejali saʼy-harakatlar natijasida joriy yilda ham Amudaryo tumani paxtakorlari kontraktatsiya shartnomalari shartlarini ortigʻi bilan bajarishiga shubha yoʻq.