Amudaryoda fermerlar bilan ochiq muloqot: yangi farmonlar qishloq xoʻjaligida yangi imkoniyatlar eshigini ochmoqda

Amudaryo tumanida qishloq xoʻjaligi sohasi vakillari, fermer xoʻjaliklari rahbarlari va mutasaddi tashkilotlar ishtirokida muhim uchrashuv boʻlib oʻtdi. Tuman hokimligi majlislar zalida tashkil etilgan ushbu ochiq muloqot Oʻzbekiston Respublikasi Prezidentining paxta va bugʻdoy yetishtiruvchilarni qoʻllab-quvvatlashga qaratilgan PF–82-sonli hamda lalmi va yaylov yerlaridan samarali foydalanishni ragʻbatlantirish boʻyicha PF–83-sonli Farmonlari mazmun-mohiyatini keng tushuntirishga bagʻishlandi.

Tadbirda Qoraqalpogʻiston Respublikasi Vazirlar Kengashi Raisining qishloq va suv xoʻjaligi boʻyicha oʻrinbosari, Qishloq xoʻjaligi vaziri Kamiljan Aytbayev ishtirok etib, fermer xoʻjaliklari rahbarlari bilan ochiq va samimiy muloqot olib bordi. Uchrashuv davomida agrar sohada amalga oshirilayotgan islohotlar, davlat tomonidan yaratilayotgan yangi moliyaviy imkoniyatlar hamda fermerlarni qoʻllab-quvvatlash mexanizmlari atroflicha muhokama qilindi.

Taʼkidlanganidek, Prezidentimiz tomonidan qabul qilingan yangi farmonlar qishloq xoʻjaligi tarmogʻida iqtisodiy barqarorlikni mustahkamlash, ishlab chiqaruvchilarni ragʻbatlantirish va hosildorlikni oshirishga xizmat qiladi. Ayniqsa, paxta va bugʻdoy yetishtiruvchilarga berilayotgan moliyaviy imtiyozlar fermerlarning manfaatdorligini yanada kuchaytirishi qayd etildi.

Farmonga muvofiq, 2026-yil hosilidan boshlab Qishloq xoʻjaligi vazirligi huzuridagi Agrar sohada toʻlovlar agentligi tomonidan imtiyozli kredit foizlarining bir qismi kompensatsiya qilinadi. Xususan, paxta yetishtirish uchun ajratilgan kreditlarni belgilangan muddatda qaytargan xoʻjaliklarga foiz toʻlovining 2,5 foizlik punkti, yil yakunigacha toʻliq qaytarganlarga esa 5 foizlik punkti qoplab beriladi. Bugʻdoy yetishtirish uchun olingan imtiyozli kreditlarni 1-avgustga qadar toʻliq qaytargan xoʻjaliklar uchun esa foiz toʻlovining 4 foizlik punkti kompensatsiya qilinadi.

Bu esa, avvalo, fermerlarning kredit yukini kamaytirish, ularning moliyaviy barqarorligini taʼminlash hamda yangi mavsumga yanada puxta tayyorgarlik koʻrishiga zamin yaratadi.

Shuningdek, paxta-toʻqimachilik klasterlari va ip-kalava ishlab chiqaruvchi korxonalar uchun ham alohida yengilliklar nazarda tutilgan. Endilikda paxta xomashyosini xarid qilish uchun ajratilgan tijorat kreditlari boʻyicha toʻlangan foizlarning bir qismi davlat tomonidan qoplanadi. Bu esa ishlab chiqarish zanjirida uzluksizlikni taʼminlash va eksport salohiyatini oshirishga xizmat qiladi.

Uchrashuvda dizel yoqilgʻisi xarajatlarini kamaytirish masalasiga ham alohida eʼtibor qaratildi. Qayd etilishicha, 2026-yil 1-apreldan 1-iyulgacha birja orqali xarid qilingan har bir tonna dizel yoqilgʻisi qiymatining 13 million soʻmdan oshgan qismi uchun, biroq 2 million soʻmdan ortiq boʻlmagan miqdorda subsidiya ajratiladi. Bu imkoniyat qishloq xoʻjaligi texnikalaridan samarali foydalanish, mavsumiy ishlarni oʻz vaqtida bajarish va ishlab chiqarish xarajatlarini qisqartirishda muhim ahamiyat kasb etadi.

Tadbir davomida lalmi va yaylov yerlaridan samarali foydalanishning yangi tartiblari ham batafsil tushuntirildi. Mutaxassislar tomonidan ushbu yer maydonlarini iqtisodiy aylanishga kiritish, chorvachilik va yem-xashak bazasini mustahkamlash, suv tanqisligi sharoitida samarali agrotexnologiyalarni qoʻllash boʻyicha tavsiyalar berildi.

Fermerlar oʻzlarini qiziqtirgan savollar bilan murojaat qilib, kredit olish, subsidiya ajratish, yer maydonlaridan foydalanish hamda hosilni realizatsiya qilish masalalarida mutasaddilardan batafsil javob oldilar. Ochiq muloqot shaklida oʻtgan uchrashuv soha vakillari uchun muhim axborot va tajriba almashuv maydoniga aylandi.

Taʼkidlash joizki, mazkur farmonlar nafaqat fermer xoʻjaliklarini moliyaviy qoʻllab-quvvatlash, balki qishloq xoʻjaligida samaradorlikni oshirish, zamonaviy boshqaruv tizimini joriy etish va oziq-ovqat xavfsizligini mustahkamlashda ham muhim omil boʻlib xizmat qiladi.

Charos Arslonova, tuman hokimligining Axborot xizmati rahbari.