Muzqaymoq va salqin ichimliklar sifati nazorat qilinmoqda
Yozning jazirama kunlari boshlanishi bilan inson organizmining salqin ichimliklar va muzqaymoq mahsulotlariga boʻlgan ehtiyoji tabiiy ravishda ortib boradi. Biroq, jazirama issiqda bunday mahsulotlarni isteʼmol qilish nafaqat rohat bagʻishlaydi, balki maʼlum sanitariya qoidalariga rioya etilmasa, salomatlik uchun jiddiy xavf tugʻdirishi ham mumkin.
Aynan shu jihatlarni hisobga olgan holda, mavsumiy yuqumli kasalliklarning oldini olish maqsadida Amudaryo tumani Sanitariya-epidemiologik osoyishtalik va jamoat salomatligi boʻlimi tomonidan tuman markazi hamda chekka hududlardagi savdo doʻkonlari va koʻchma shoxobchalarda keng qamrovli oʻrganish ishlari olib borilmoqda. Ushbu tadbirlardan koʻzlangan asosiy maqsad – ishlab chiqarilgan joyi va saqlash sharoitlari nomaʼlum boʻlgan, sifati kafolatlanmagan mahsulotlarning savdoga chiqarilishiga chek qoʻyishdir. Jarayon davomida boʻlim mutaxassislari mahsulotlardan namunalar olib, ularni laboratoriya sharoitida kimyoviy hamda bakteriologik tekshiruvdan oʻtkazadi va tegishli xulosalar beradi.
Sut va sut mahsulotlari, xususan, muzqaymoq tez va oson buziluvchi mahsulotlar toifasiga kiradi. Uni ishlab chiqarish va sotish jarayonida sanitariya-gigiyena talablariga amal qilmaslik ovqatdan zaharlanish holatlariga olib kelishi mumkinligi sababli nazorat tadbirlari kuchaytirilmoqda.
Muzqaymoq ishlab chiqarishda faqatgina belgilangan sovitish haroratiga amal qilish kifoya emas. Korxonalarda ishlab chiqarishni avtomatlashtirish, uskuna va anjomlarni muntazam tozalab turish, jarayonda tozalikni saqlash muhim ahamiyat kasb etadi. Bundan tashqari, ishlatiladigan tabiiy va quruq sutlar hamda turli qoʻshimchalarning sifati va xavfsizligini kafolatlovchi maxsus sertifikatlari boʻlishi qatʼiy talab qilinadi. Tayyor mahsulot qadogʻida esa ishlab chiqaruvchi korxonaning nomi, ishlab chiqarilgan sanasi, yaroqlilik muddati va saqlanish sharoitlari aniq koʻrsatilishi shart. Ushbu mahsulotlar faqat turgʻun savdo shoxobchalarida, maxsus sovutgichlarda saqlangan holda mijozlarga taqdim etilishi lozim.
Mahsulot xavfsizligi bilan birga savdo xodimlarining sanitariya holati ham muhim ahamiyatga ega. Muzqaymoq va salqin ichimliklar ishlab chiqaruvchi hamda sotuvchi xodimlar Oʻzbekiston Respublikasi Sogʻliqni saqlash vazirligining maxsus buyrugʻi asosida muntazam ravishda davriy tibbiy koʻrikdan oʻtgan boʻlishlari, maxsus toza kiyimda ishlashlari va shaxsiy gigiyena qoidalariga qatʼiy amal qilishlari kerak. Qolaversa, ichimliklar va muzqaymoqlar mijozlarga faqat bir marotaba ishlatiladigan idishlarda quyib berilishi, foydalanib boʻlingach, ushbu idishlar yaroqsiz holatga keltirilib, maxsus konteynerlarda yigʻilishi shart.
Shu oʻrinda, mutaxassislar barcha fuqarolarni yanada ogoh boʻlishga chaqiradi. Yozning issiq kunlarida quyosh nuri tik tushadigan ochiq sharoitda saqlangan, polietilen idishlardagi chanqoqbosdi ichimliklarni xarid qilishdan saqlaning. Shuningdek, koʻcha-koʻylarda uy sharoitida tayyorlangan, sanitariya talablariga javob bermaydigan nomaʼlum idishlarga solingan oʻrik sharbati, ayron, goʻja, mors va kvass kabi ichimliklarni isteʼmol qilish tavsiya etilmaydi. Bunday mahsulotlar issiqda oʻzining sifati va xavfsizligini tezda yoʻqotadi hamda oʻtkir yuqumli ichak kasalliklariga sabab boʻlishi mumkin. Xarid jarayonida erib qolgan, qadogʻining butunligi buzilgan yoki har xil uskunalarda tayyorlangan shubhali muzqaymoqlarni aslo sotib olmang.
Isteʼmol qilayotgan mahsulotingizning saqlash sharoitiga va yaroqlilik muddatiga doimo eʼtibor qaratish orqali oʻzingiz va yaqinlaringiz salomatligini mustahkam himoya qilgan boʻlasiz.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
