Bepul kardioskrining: mobil angiograf yordamida murakkab diagnostika amaliyotlari oʻtkazilmoqda

Yurak-qon tomir kasalliklari butun dunyoda eng koʻp uchraydigan va inson hayotiga jiddiy xavf tugʻdiradigan xastaliklar sirasiga kiradi. Shu bois, kasallikni davolagandan koʻra, uning oldini olgan maʼqul, degan tamoyil asosida yurtimizda keng koʻlamli profilaktika ishlari olib borilmoqda. Inson qadrini ulugʻlash va uning sogʻligʻini asrash maqsadida tibbiyot sohasida amalga oshirilayotgan izchil islohotlar bugun oʻzining amaliy natijalarini bermoqda. Ana shunday xayrli va muhim tadbirlardan biri Amudaryo tumanida tashkil etildi.

Poytaxtdan, xususan, Milliy tibbiyot markazidan kelgan yuqori malakali bir guruh mutaxassislar Amudaryo tumani tibbiyot birlashmasida boʻlib, zamonaviy va maxsus uskunalar yordamida mahalliy aholini chuqurlashtirilgan tibbiy koʻrikdan oʻtkazdilar. Ushbu tibbiy koʻrikning asosiy yoʻnalishi xalq orasida kardioskrining deb ataluvchi oʻta muhim jarayon, yaʼni koronarografiya amaliyotini bajarishga qaratildi. Mutaxassislar tomonidan olib kelingan maxsus mobil angiograf apparati yordamida yurakning koronar tomirlarini aniq va tezkor tekshirish imkoniyati yaratildi.

Tibbiyotda ushbu amaliyot infarktgacha boʻlgan holatlarni erta aniqlash va oʻlimga olib keluvchi ogʻir yurak xurujlarining oldini olishda eng samarali usul sifatida baholanadi. Milliy tibbiyot markazi shifokorlarining chekka hududlarga tashrifi esa bunday murakkab tekshiruvlarni markazga bormasdan, bemorlarning bevosita yashash joyida amalga oshirish imkonini bermoqda.

Mutaxassislarning taʼkidlashicha, koronografiya bu yurakni oziqlantiruvchi qon tomirlarining holatini maxsus kontrast modda va rentgen apparati yordamida tekshirishning eng ishonchli usuli hisoblanadi. Jarayon davomida malakali shifokor bemorning qoʻl arteriyasi orqali ingichka kateter kiritadi va yurak tomirlariga kontrast modda yuboriladi. Natijada rentgen monitori orqali tomirlarning ichki holati, ulardagi tiqilish yoki torayish darajasi juda aniq koʻrinadi. Odatda 15 yoki 30 daqiqa davom etadigan bu tekshiruv koʻkrak qafasida ogʻriq yoki siqilish his qilgan, jismoniy harakat vaqtida hansirashdan aziyat chekadigan, shuningdek, yurak infarkti gumon qilingan bemorlar uchun oʻta zarur amaliyot sanaladi. Ushbu aniq tashxislash usuli shifokorlarga keyingi davolash taktikasini toʻgʻri tanlashga, zarur hollarda esa tomirlarga stent qoʻyish orqali bemor hayotini saqlab qolishga yaqindan yordam beradi.

Eng quvonarlisi shundaki, mazkur chuqurlashtirilgan tibbiy koʻrik va murakkab diagnostika amaliyotlari aholining ijtimoiy himoyaga muhtoj qatlamlari uchun mutlaqo bepul amalga oshirilmoqda. Jarayonda birinchi navbatda barcha nafaqadagi fuqarolar, 1- va 2-guruh nogironligi bor shaxslar, shuningdek, ijtimoiy reyestrda kambagʻal oila sifatida roʻyxatga olingan yurtdoshlarimiz qamrab olindi. Ulardan tashqari, Afgʻon urushi hamda Chernobil halokati qatnashchilari ham ushbu bepul kardioskrining dasturiga kiritilgan boʻlib, zarurat tugʻilganda ularga tibbiy sugʻurta doirasida bepul stent qoʻyish amaliyoti ham bajarilishi koʻzda tutilgan. Bunday eʼtibor va gʻamxoʻrlik aholining davlatga va ertangi kunga boʻlgan ishonchini yanada mustahkamlashga xizmat qilishi shubhasizdir.

Inson salomatligi bebaho boylikdir. Oʻz vaqtida oʻtkazilgan toʻgʻri va aniq tekshiruvlar koʻplab ogʻir asoratlarning oldini olishga, eng muhimi, inson hayotini asrab qolishga xizmat qiladi. Amudaryo tumanida tashkil etilgan bu galgi tibbiy aktsiya ham yurtdoshlarimizni oʻz sogʻligʻiga eʼtiborli boʻlishga chaqirib, davlatimiz tomonidan xalq salomatligi yoʻlida yaratilayotgan ulkan imkoniyatlarning yana bir amaliy ifodasi boʻldi.