Amudaryo tumanida paxta yigʻim-terimiga tayyorgarlik yakuniy bosqichga kirdi

Mamlakatimiz qishloq xoʻjaligida eng muhim va masʼuliyatli palla – kuzgi yigʻim-terim mavsumi yaqinlashmoqda. Amudaryo tumanida ham joriy yilgi paxta hosilini nest-nobud qilmasdan, uyushqoqlik bilan yigʻib-terib olish maqsadida qizgʻin hozirlik koʻrilmoqda. Jarayonlarning har bir bosqichi Agroinspektsiyaning tuman boʻlimi tomonidan qatʼiy nazoratga olingan boʻlib, asosiy eʼtibor texnikalarning shayligi va paxta qabul qilish maskanlarining tayyorgarligiga qaratilmoqda.

Xususan, tumandagi 337 ta fermer xoʻjaligi va qishloq xoʻjaligi korxonalari ixtiyorida boʻlgan jami 748 ta traktor tirkamasi tumandagi 5 ta paxta qabul qilish maskaniga yigʻildi. Ushbu texnikalar yordamida terilgan paxta xomashyosini maskanlarga betalofat yetkazish maqsadida tirkamalar ustiga yopiladigan brezentlarning sifati va ularning yongʻinga qarshi uskunalar bilan jihozlanganlik darajasi toʻliq oʻrganib chiqildi va aniqlangan kamchiliklarni joyida bartaraf etish choralari koʻrildi.

Sohani mexanizatsiyalash darajasini oshirish maqsadida 2024-2025-yillarda jami 12 ta zamonaviy paxta terish mashinasi keltirilgan boʻlib, joriy yilda ham qoʻshimcha 12 ta shunday texnikalar olib kelindi. Bugungi kunda barcha paxta terish mashinalari mavsumga toʻliq shay holatga keltirilgan. Bundan tashqari, kelgusi 2027-yil hosili uchun gʻalla ekishga moʻljallangan 14 ta zamonaviy don ekish seyalkasiga ham zarur servis xizmatlari koʻrsatilib, taxt qilib qoʻyildi.

Hosilni yetishtirishda agrotexnik tadbirlarni oʻz vaqtida va sifatli amalga oshirish naqadar muhim boʻlsa, uni yigʻib olishga tayyorgarlik koʻrish ham shunchalik dolzarbdir. Shu maqsadda, “Etefon” preparati sepilgan maydonlarda monitoring ishlari olib borilib, gʻoʻzaning rivojlanishi va koʻsaklarning ochilish jarayoni oʻrganilmoqda. Masalan, Zarbdor massivi hududidagi “Murodboy Gulora” fermer xoʻjaligining gʻoʻza maydonlarida ushbu preparatning belgilangan meʼyor va muddatlarda qoʻllanilishi nazorat qilindi. Xoʻjalik masʼullariga tegishli tavsiya va koʻrsatmalar berilib, barcha agrotexnik tadbirlarning samaradorligiga alohida eʼtibor qaratilyapti.

Joriy yilda tuman boʻyicha 4 ta subʼekt – 1 ta klaster, 2 ta kooperatsiya va 1 ta urugʻlik yetishtiruvchi xoʻjalikka qarashli qabul maskanlariga 64 ming 175 tonna paxta xom ashyosi qabul qilinishi rejalashtirilmoqda. Ushbu subʼektlarga sifat koʻrsatkichlarini aniqlash, oʻlchash, joylashtirish va saqlash jarayonlarini toʻgʻri tashkil etish boʻyicha aniq vazifalar yuklatilgan.

Maskanlarda qabul maydonlari, saqlash joylari, tarozilar, laboratoriya va texnologik uskunalar, elektr taʼminoti hamda yongʻin xavfsizligi vositalarining holati chuqur oʻrganilmoqda. Jumladan, “Amudaryo Kelajagi” ishlab chiqarish kooperatsiyasi 2026-yilgi mavsumda 1275 tonna paxta qabul qilishni reja qilgan boʻlib, hozirda maskan hududini obodonlashtirish, texnika va jihozlarni ishchi holatga keltirish ishlari qizgʻin davom etmoqda.

Xulosa qilib aytganda, paxta qabul qilish maskanlarini mavsum boshlanishiga qadar toʻliq tayyor holatga keltirish hamda belgilangan talablarga qatʼiy rioya etilishini taʼminlash Inspektsiyaning doimiy nazoratidadir. Oʻz vaqtida koʻrilayotgan bunday tizimli chora-tadbirlar yetishtirilgan hosilni sifatli va nest-nobud qilmasdan yigʻib-terib olish hamda yuqori hosildorlikni taʼminlash uchun mustahkam zamin yaratadi.