INSON SALOMATLIGIGA EʼTIBOR - FAROVON TURMUShIMIZ ASOSI

Istiqlol yillarida jamiyatni harakatga keltiruvchi kuch hisoblangan aholi salomatligiga, uning baxtiyor va erkin yashashiga eʼtibor tobora kuchaymoqda. 2014-yilning oʻzida keksa avlod vakillari, xotin-qizlar va yoshlarga gʻamxoʻrlik koʻrsatish, oila, onalik va bolalikni himoya qilish uchun davlat byudjetidan ijtimoiy ehtiyojlar, jumladan, aholini qoʻllab-quvvatlash va ijtimoiy sohani mustahkamlash-ga ajratilayotgan yillik xarajatlar 60 foizdan ortgani fikrimizning yaqqol dalilidir.

Kishi sogʻlom boʻlsagina baxtiyor va mazmunli umr kechirishi mumkin. Sogʻligimiz esa oʻz hayotimizni oʻzimiz oqilona boshqarishimizga, sogʻlom turmush tarziga amal qilishimizga koʻp jihatdan bogʻliq.

Shu boisdan ham aholi orasida kasalliklarning oldini olish uchun har kim oʻz sogʻligini asrashga oʻzi eʼtibor bermogʻi lozimligi, sogʻlom turmush tarziga amal qilishning ahamiyati keng tushuntirilmoqda.

Shu maqsadda avgust oyida oʻtkazilgan "Salomatlik haftaligi”ning oʻzida 10 davra suhbati, 59 ta uchrashuvlar, 3 ta savol-javob kechasi, 1804 ta suhbatlar oʻtkazildi. Mazkur tadbirlarda aholining keng qatlami ishtirok etib, oʻzlariga kerakli maʼlumotlar olmoqdalar.

Salomatlikka oid targʻibot-tashviqot ishlarimiz bilan bir qatorda oʻtkazilayotgan tibbiy koʻriklar davomida ham koʻpgina kasalliklar erta aniqlanmoqda. Joriy yilning oʻzida Oʻzbekiston Respublikasi Sogʻlikni saqlash Vazirligi buyrugʻiga asosan tajribali shifokorlardan tashkil etilgan guruh tomonidan 3-marta chuqurlashtirilgan tibbiy koʻriklar oʻtkazildi.

13-avgust kuni "Hech kim mehr-eʼtibordan chetda qolmasin” shiori ostida oʻtkazilgan chuqurlashtirilgan tibbiy koʻrikda tumanimizning 506 nafar fuqarosi oʻz sogʻligini nazoratdan oʻtkazdilar. Ularning 15 nafari Ikkinchi jahon urushi qatnashchilari, 254 nafari mehnat fronti faxriylari boʻlib, 7 nafar keksalar oʻz xonadonlarida tibbiy koʻrikdan oʻtdilar.

Chuqurlashtirilgan tibbiy koʻrik natijasida malakali shifokorlar 171 nafar fuqaroga ambulator, 19 nafariga esa statsionar sharoitda davolanish uchun yoʻllanma berdilar.

Respublika ixtisoslashtirilgan tibbiy markazlar, ilmiy tekshirish institutlari, respublika klinik shifoxonalari yetakchi va malakali shifokorlari ishtirokida oʻtkazilayotgan buningdek chuqurlashtirilgan tibbiy koʻriklarda keng aholi qatlamining qamrab olinayotganligi tumanimiz aholisi orasida kasalliklarni erta aniqlash, oldini olish va sifatli davolashda muhim ahamiyat kasb etmoqda.

Olimboy HALIMOV,

tuman tibbiyot birlashmasi boshligʻi,

tibbiyot fanlari nomzodi.