SIFATLI TIBBIY XIZMAT KOʻRSATISh YOʻLIDA
Mamlakatimizda mustaqillik yillarida inson omiliga eʼtibor, uning baxtiyor va farovon yashashi uchun gʻamxoʻrlik kuchaydi. Bular albatta tibbiyot sohasida olib borilgan islohotlar bilan chambarchas bogʻliq.
Sogʻlikni saqlash tizimini yanada takomillashtirish, tibbiyot muassasalari faoliyati samarali boʻlishiga erishish, jahon andozalari talablariga muvofiq aholiga yuqori sifatli tibbiy yordam koʻrsatish bosh vazifa qilib qoʻyilgan bugungi kunda tuman tibbiyot birlashmasiga qarashli muassasalarda ham ulugʻvor vazifalarning ijrosi taʼminlanmoqda.
Birlashmaga qarashli koʻp tarmoqli markaziy poliklinikada Mangʻit shahri aholisiga tibbiy xizmat koʻrsatiladi. Keyingi yillarda davlati-mizning aholi salomatligini muhofaza qilishga, barkamol avlodning shakllanishiga, oilada tibbiy madaniyatni yuksaltirishga qaratayotgan eʼtibori tufayli aholining salomatlik koʻrsatkichlari se-zilarli darajada yaxshilandi. Kunlik qabul qilish quvvati 785 odamga moʻljallangan poliklinikamizda 22 turdagi mutaxassislar tomonidan bemorlar qabul qilinadi. Bu borada 70 nafar shifokor, 90 nafar hamshira, 22 nafar kichik hamshiralar oʻz xizmat vazifasini sidqidildan ado etmoqdalar.
Muassasamiz binosi 2012-yilda kapital rekonstruktsiya qilinib, qabul uchun qulay sharoitlar yaratildi hamda jahon andozalari talablari darajasidagi zamonaviy diagnostika tibbiy asbob-uskunalari oʻrnatildi. Jumladan raqamli rentgen apparati, ultratovush tekshiruvi apparati, shuningdek, koʻz kasalliklarini aniqlaydigan refroktometr bilan taʼminlandi.
Yaratilgan imkoniyatlar bemorlarga aniq tashhis qoʻyish va davolashni samarali olib borishga imkoniyat tugʻdiradi.
Joriy yilning oʻtgan davri mobaynida muassasamizda 409 982 ta qatnov qayd qilinib, bemorlarning aksariyati ambulator sharoitlarda sogʻlomlashtirildi.
Bugungi kunda jahon tibbiyoti tajribalari bemorlarga aniq tashhis qoʻyilib, ambulator sharoitlarda sogʻlomlashtirilishi qulay va samarali boʻlishini koʻrsatmoqda. Buni inobatga olgan holda poliklinikamizda mehnat qiladigan shifokorlar va oʻrta tibbiyot xodimlarining kasb malakasi va mahoratini oshirib borishga doimiy eʼtibor berayapmiz. Shuning natijasida 70 foiz shifokorlarimiz, 33 foizdan ortiq oʻrta tibbiyot xodimlarimiz kasb toifasiga ega boʻlishdi.
Muassasamizda va unga qarashli boʻlgan 19 ta qishloq vrachlik punktlarimizda bemorlarga sifatli tibbiy xizmat koʻrsatish bilan birga kasalliklarning oldini olish uchun emlash, kasalliklardan saqlanish yoʻl-yoʻriqlari, sogʻlom turmush kechirish afzalliklari aholi orasida keng targʻib qilinayapti. Umumtaʼlim maktablari oʻquvchilari yiliga bir marta tizimli ravishda eng malakali mutaxassislar ishtirokida bepul tibbiy koʻrikdan oʻtkazilmoqda. Aholining keng qatlamlari orasida oʻtkazilayotgan tibbiy koʻriklar tufayli koʻpgina kasalliklar aniqlanib, davo choralari koʻrilayapti.
Joriy yilimizning "Keksalarni eʼzozlash yili” deya nomlanishiga muvofiq qabul qilingan dasturga asosan tumanimizda istiqomat qiluvchi nuroniy yoshdagi otaxon va onaxonlarimizga alohida gʻamxoʻrlik koʻrsatilayotir. Ikkinchi jahon urushi va front orti mehnat faxriylari maxsus uy aptechkalari bilan taʼminlandi va ularga shifokorlar biriktirildi.
Fursatdan foydalanib, aholi sogʻligini saqlash va sifatli tibbiy xizmat koʻrsatish yoʻlida sidqidildan mehnat qilayotgan tibbiyot xodimlarini kasb bayrami bilan qizgʻin qutlayman!
Baxtiyor MUXTOROV,
tuman markaziy koʻp tarmoqli poliklinikasi mudiri.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
