GOʻZALLIK VA NAFOSAT BAYRAMI

 6-mart kuni tuman hokimligida 8-mart – Xalqaro xotin-qizlar kuni munosabati bilan bayram tadbiri uyushtirildi. Tadbirga turli sohalarda faoliyat yuritayotgan ayol-qizlar va keng jamoatchilik vakillari taklif qilindi. Tantanali yigʻilishni tuman hokimi oʻrinbosari, xotin-qizlar qoʻmitasi raisi Maryam Ahmedova ochdi va olib bordi. Tuman hokimining birinchi oʻrinbosari Fayzulla Saʼdullaev oʻz nutqida erishayotgan har bir yutugʻimiz zamirida fidoyi va jonkuyar xotin-qizlarimiz mehnati mujassamligini, bularning barchasi Prezidentimiz Islom Karimov rahnamoligida yurtimiz xotin-qizlarining jamiyatdagi oʻrni va mavqeini mustahkamlash, ezgu intilishlarini qoʻllab-quvvatlash borasida amalga oshirilayotgan keng koʻlamli ishlarning yuksak samaralari ekanini taʼkidladi.

Darhaqiqat, bugun chekka-chekka qishloqlarimizda ham tadbirkor, mehnatsevar, fidoyi va qoʻli gul xotin-qizlarning ezgu intilishlariga keng yoʻl ochilmoqda. Bu — ayollarimizning mehnati qadrlanayotganidan, isteʼdod va salohiyati roʻyobga chiqayotganidan dalolatdir. Obod turmush yilida bu boradagi ishlar koʻlami yanada kengaymoqda.

Tadbir soʻngida tuman madaniyat va sport ishlari boʻlimi, tumanimizdagi taʼlim muassasalarining havaskor sanʼatkorlari va yosh ijrochilari tomonidan kontsert dasturi namoyish etildi. Ona, ayol va muhabbatni madh qiluvchi qoʻshiqlar kuylandi.

Tadbir tumanimizdagi «Bek» toʻyxonasida ayollar uchun yozilgan bayram dasturxoni atrofida koʻtarinki ruhda davom etdi.