«Keksalarni eʼzozlash yili» tuman dasturi: raqamlar tilga kirganda...

Oʻzbekiston Respublikasi Prezidentining 2015-yil 18-fevraldagi "Keksalarni eʼzozlash yili Davlat dasturi toʻgʻrisida”gi PQ-2302-sonli qarori va shu qaror asosida Qoraqalpogʻiston Respublikasi Vazirlar Kengashining 2015-yil 5-martda 60-sonli qarori hamda 2015 yil 16-martda Amudaryo tumani hokimining 133-sonli qarori qabul qilindi.

Ushbu qaror asosida 6 boʻlim, 84 banddan iborat "Keksalarni eʼzozlash yili” tuman dasturi, tuman hokimi raisligida 27 nafar aʼzodan iborat dastur ijrosini tashkil etish va uning monitoringini olib borish boʻyicha tuman komissiyasi tasdiqlanib, doimiy ravishda faoliyat olib bordi.

Ushbu dastur doirasida keksalarni eʼzozlash, oʻzaro hurmat va mehr-muhabbat, yuksak axloqiy va maʼnaviy qadriyatlar muhitini shakllantirish, moddiy yordam koʻrsatish, keksa yoshdagi otaxon va onaxonlarning roʻzgʻor tashvishlarini yengillashtirish uchun zarur shart-sharoitlarni yaratish, taʼlim-tarbiya tizimi va sportning rolini kuchaytirish, bolalar, ayniqsa keksalar oʻrtasida jismoniy tarbiya va sportga mehr uygʻotish boʻyicha aniq chora-tadbirlarni amalga oshirish, tadbirkorlikni rivojlantirish boʻyicha mahalla va boshqa jamoat tuzilmalarining rolini oshirish, kam taʼminlangan oilalarga moddiy va maʼnaviy yordamni oʻz vaqtida va manzilli koʻrsatish masalalariga alohida eʼtibor qaratilgan boʻlib, keksalarning sharoitlarini yaxshilash va kundalik hayotini yengillashtirish, 75 yoshga toʻlgan va undan oshgan fuqarolarni pensiya va nafaqa toʻgʻri tayinlanishi va toʻlanishini tekshirish natijalari boʻyicha aniqlangan qarzdorlikdan ozod qilish, 1941-1945-yillardagi urush va mehnat fronti faxriylarini moddiy va maʼnaviy qoʻllab-quvvatlash boʻyicha kompleks tadbirlar oʻtkazilishini tashkil qilish, Respublikaning sanatoriy-sogʻlomlashtirish muassasalariga borayotgan 1941-1945 yillardagi urush va mehnat fronti faxriylariga bir yilda bir marta temir yoʻl transportida bepul yurish, shuningdek, havo transporti yoʻlkirasi qiymatining 50 foizini chegirish (borish va qaytish) huquqini berish, eng zarur mahsulotlar hajmi va turlarini koʻpaytirgan, sanitariya-gigiyena jihatidan eng zarur tovarlarni roʻyxatga kiritgan holda yetkazib berish, keksa yoshdagi nogiron odamlarning uyushgan holda dam olishlari uchun shart-sharoitlar yaratish, keksalarda surunkali, shu jumladan, yashirin kechuvchi va ilgari aniqlanmagan kasalliklarni erta aniqlash yoʻli bilan kasalliklar profilaktikasini kuchaytirish, keksalarni tibbiy koʻrikdan va tekshiruvlardan oʻtkazish, eng avvalo, qishloq joylarda aholining 2 ta madaniyat va dam olish markazlarini (Uyshin va Bobur aholi dam olish markazlari) qurish-taʼmirlash, jihozlash va foydalanishga topshirish ishlarini amalga oshirish, tumandagi (Qipchoq OFY) 1 ta silga qarshi kurashish dispanseri binosida rekonstruktsiya va qurilish ishlarini olib borish, 1941-1945-yillardagi urush va mehnat fronti faxriylari, shuningdek yolgʻiz va ijtimoiy madadga muhtoj keksa kishilarning kvartiralari va uylarini hashar yoʻli bilan joriy taʼmirlash, zarur hollarda esa mukammal taʼmirlashni, shuningdek, hovlilarni obodonlashtirishni nazarda tutgan holda, ularning turar-joy sharoitlarini yaxshilash boʻyicha har bir fuqarolar yigʻinlarida har yili bir nafardan jami 141 nafar kishini qamrab olgan holda 2015-2017-yillar mobaynida amalga oshirish va maʼnaviy tiklanishiga koʻmaklashish rejalashtirilgan edi.

Tumanimizda "Keksalarni eʼzozlash yili” davlat dasturi ijrosini taʼminlash uchun 16 mlrd. 474 mln. soʻm, 88 ming AQSh dollaridan oshiqroq mablagʻ sarflanishi rejalashtirilgan boʻlib, shundan 3 mlrd. 117 mln. soʻm byudjet va byudjetdan tashqari fondlar, salkam 5,5 mlrd. soʻmi bajaruvchi va homiylar hisobidan boʻlsa, 8 mlrd. 040 mln.dan ortiq soʻm tijorat banklari kreditlari hamda 0,9 mln. soʻm va 88 ming dollar bajaruvchi va homiylar, xalqaro tashkilotlar, grantlar, moliya institutlari hisobidandir.

Joriy yil davomida "Keksalarni eʼzozlash yili” davlat dasturini amalga oshirish borasida sarflangan mablagʻlar 18 mlrd. 490 mln. 400 ming soʻm, 88 ming 50 AQSh dollarini tashkil etdi.                  

Shundan 972,4 million soʻm byudjet va byudjetdan tashqari jamgʻarmalar mablagʻlari, 9881,5 mln. soʻm va 2,55 ming AQSh dollari bajaruvchilar va homiylarning mablagʻlari, 7635,6 mln. soʻm tijorat banklari kreditlari hamda 0,9 mln. soʻm va 85,5 ming AQSh dollari xalqaro tashkilotlar, moliya institutlari mablagʻlari va grantlaridir.