YoShLAR HAM MASʼUL

Biz "qalb amri bilan” degan iborani koʻp ishlatamiz. Haqiqatan ham har qanday ishga, oʻqishga ishtiyoq eng avvalo insonning qalbida uygʻonadi. Qalb - yurak buyurgan ishga qoʻl urilsa, bu ish muvaffaqiyatli yechim topadi.

Har tong oʻzim tahsil oladigan Qipchoq agrobiznes kollejiga oʻqishga otlanarkanman, qalbimni quvonch tuygʻusi toʻldiradi. Umumiy oʻrta taʼlimdan soʻng kasb-hunar kollejida tahsil olib, hunar oʻrganishni oʻz xohish-istagim bilan tanlab, yanglishmaganimni his etib, quvonib ketaman.

Kollejda oʻqish nihoyatda zavqli va qiziqarli. Men bu yerda nafaqat oʻzim tanlagan kasb yoʻnalishi boʻyicha, balki internet tarmogʻiga ulangan elektron kutubxonada shugʻullanib, kasb malakamni oshirish, dunyoqarashimni kengaytirish imkoniga ega boʻldim. Bundan tashqari, kollejimizda sportning xohlagan turi bilan shugʻullanishimiz uchun zarur sharoitlar yaratib berilgan. Hatto oʻzimiz tanlagan kasbimizga yondosh bironta hunarni egallashimiz uchun ham imkon bor. Ayniqsa, biz qizlar uchun tikuvchi-dizaynerlik toʻgaragidagi mashgʻulotlar juda qiziqarli.

Shu kunlarda men qadrdon kollejimni tugatish arafasidaman. Kollejda olgan bilimimni yanada mustahkamlash, kasbiy malaka oshirish uchun tuman DSIda amaliyot bosqichini oʻtayapman. Shu bilan birga kollejimizdagi fizika-matematika va informatika fanlari boʻyicha toʻgaraklarga qatnashmoqdaman. Maqsadim fizika-matematika yoʻnalishi boʻyicha oliy oʻquv yurtiga kirib oʻqish,oʻz iqtidorimni shu yoʻnalish boʻyicha namoyon etishdir. Buning uchun mamlakatimizda juda katta imkoniyatlar yaratilgan.

Oʻzbekiston Respublikasi Konstitutsiyasi qabul qilinganligining 20-yilligiga bagʻishlangan tantanali marosimda muhtaram Prezidentimiz 2013-yilga "Obod turmush yili” deb nom berar ekan, mazkur nom bilan bogʻliq ravishda qabul qilinadigan Davlat Dasturidagi oltita ustuvor yoʻnalish haqida alohida toʻxtalib, tom maʼnoda xalqimiz hayotida toʻkin-sochinlik, sogʻlik, fayz-baraka, millatlararo ahillik, tinchlik-xotirjamlik, eng muhimi, ijtimoiy faollik hukmron boʻlishi uchun har bir kishi, ayniqsa, yoshlar ham masʼulligini taʼkidlagan edilar.

Prezidentimiz aytganiday: "Shu aziz Vatan – barchamizniki!” Demak, ona Vatanimizning obodligi, tinchligi, yuksak taraqqiyoti uchun shu muqaddas zaminda yashab, ildiz otgan har bir inson masʼul. Bugungi dorilomon kunlarning qadriga yetib, eʼzozlash, hayot tarzimizda yuksak sifat darajasiga erishish uchun fidoyilik koʻrsatib mehnat qilish esa har birimiz uchun sharafdir.

Biz yoshlar har kuni oʻqish, amaliy-nazariy mashgʻulotlardan boʻsh vaqtlarimizda dala mehnatkashlari, pillakorlar huzuriga hasharga chiqib, xonadonlarimizdagi tomorqa yerlarida mehnat qilib, oʻz mehnatimiz samarasidan el-u yurtga manfaat yetayotganidan xursandmiz.

Nodira BOLTABOYeVA,

Amudaryo agrobiznes kolleji bitiruvchisi.

(Foto - http://evrofarm.uz)