QALBLARGA JOʻShQINLIK BAXSh ETGAN UChRAShUV

Sanʼat shunday dorilomon olamki, uning sehr-sinoati qoshida hamisha lol qolamiz. Beshikdagi goʻdakdan tortib, nuroniy yoshdagi insongacha ana shu goʻzal olam  sehriga oshno. Bu oshnolik – dillarga orom baxsh etadi, koʻngil dardiga misli moʻmiyoi-shifo, taskin beradi.

Shu yilning 6-aprel kuni tumanimizdagi 9-sonli bolalar musiqa  va sanʼat maktabining tantanalar saroyida boʻlib oʻtgan, el-yurt sevgan qoraqalpoq sanʼati ustalari va maʼnaviyat fidoyilari bilan uchrashuv tadbirida ishtirok etgan tumanimiz faollari, keksa otaxon va onaxonlar hamda yoshlar sanʼatning sehrli, qalblarga joʻshqinlik baxsh etuvchi qudratini yana bir bor dildan his etdilar.

Qoraqalpoq sanʼatini jahonga tanitgan, oʻz ijro mahoratlari bilan xalqimiz yuragidan munosib joy olgan hamda har biri oʻziga xos ijod va ibrat maktabini yaratgan sanʼatkorlar bilan "Sogʻlom ona va bola yili” Davlat dasturi doirasida oʻtkazilgan uchrashuv tadbirini tuman hokimining oʻrinbosari, xotin-qizlar qoʻmitasi raisi Maryam Ahmedova ochdi va uchrashuv tumanimiz xalqi maʼnaviy hayotida muhim ahamiyat kasb etishini alohida eʼtirof etdi.

Shundan soʻng sanʼatkorlar guruhi rahbari, Qoraqalpogʻiston Respublikasida xizmat koʻrsatgan sanʼat arbobi Obodon Saparova, Oʻzbekiston va Qoraqalpogʻiston sanʼatini dunyo mamlakatlari sahnalarida namoyish etib, oʻzbek va qoraqalpoq anʼanaviy ashulachilik yoʻnalishida katta yutuqlarga erishgan sanʼat ustalari, shoir va jurnalistlarni sahnaga taklif etdi. Tomoshabinlarning samimiy olqishlari ostida davraga kirib kelgan Oʻzbekiston, Qoraqalpogʻiston hamda Boshqirdiston Respublikalari xalq artisti Gulparshin Sirimbetova, Qoraqalpogʻiston xalq artisti Bibirobiya Oʻtepbergenova, Oʻzbekiston, Qoraqalpogʻiston xalq artisti Tamara Doshumova, sohirnafas suxandon Rayxon Saparova, Xonzoda Polvonova, Qoraqalpogʻistonda xizmat koʻrsatgan artist Gulnigor Sapayeva, xushovoz baxshi qiz Gʻumshagul Bekturgʻanova, jirov Salomat Ayapov, Oʻzbekiston xalq baxshisi, xorazmlik Qalandar baxshi Normatov, Qoraqalpogʻistonda xizmat koʻrsatgan madaniyat xodimi, shoir Abulqosim Oʻtepberganov, shoira Gulnora Nurlepesovalar birin-ketin sahnaga koʻtarilib, oʻz sanʼatlarini namoyish etdilar.

Gulparshin Sirimbetovaning jarangdor ovozi, Bibirobiya Oʻtepbergenovaning  hamon xalq dilida ardoqlanayotgan diltortar qoʻshiqlari, Xonzoda Polvonova, baxshi qiz Gʻumshagul Bekturgʻanova, jirov Salomat Ayapovning termalari, Gulnigor Sapayevaning va Tamara Doshumovaning ashulalari tomoshabinlar qalbiga xushnudlik baxsh etdi.

Dastur mehmoni, xorazmlik Qalandar baxshi Normatov oʻzbek va qoraqalpoq dostonlaridan parchalar kuylab, bir-biriga doʻst va qadrdon, ildizlari teran ikki millatning  qalban bir-birlariga talpinib, bir-birlarining koʻngillaridan suv ichib yashaguvchi totuv oila ekanligini soz-u suhbat orqali maromiga yetkazib ifoda etganidan tomoshabinlar qalbi zavq-shavqqa toʻldi.

Shoir Abulqosim Oʻtepbergenov, shoira va jurnalist Gulnora Nurlepesovalarning sheʼrlari koʻngillarga ajib bir taskin, samimiyat bagʻishladi.

Uchrashuv yakunida tumanimiz nuroniylaridan Gulmirza Nurmatov, Tursunboy Abdullayev hamda "Barkamol avlod” bolalar markazi direktori Xonimjon Rajabovalar sanʼatkorlarga tumanimiz xalqi nomidan chuqur minnatdorchilik bildirdilar.

Koʻngillar koʻngillardan suv ichib, bir-birlarini sogʻingan qalblar orom topgan ushbu uchrashuv barchada shirin taassurotlar qoldirdi.

Robiya YOʻLDOShEVA.