Eng yaxshi kontsert dasturlari egalari aniqlandi

Qaysi xonandaning kontsertini ustun qoʻyasiz? Darakchi.uz aynan mana shunday savol bilan sizlarga murojaat qilgandi. 

Soʻrovnomada Yulduz Usmonova, Ozodbek Nazarbekov kabi xalq artistlari qatorida bugungi yoshlarning sevimli xonandalari Rayhon, Shahzoda, milliy qoʻshiqlari bilan xalq ogʻziga tushib borayotgan Botir Qodirov va Alisher Fayz hamda faqat jonli ijroni olqishlaydigan Jahongir Otajonov nomzodi ishtirok etdi. 

Soʻrovnomada qatnashganlarning 33,3%i Yulduz Usmonovaning kontsertini ustun qoʻyishini maʼlum qilgan. Ushbu koʻrsatkich bilan Usmonova birinchi oʻrinni egallagan boʻlsa, bugungi kunda kontsertining davomiyligi boʻyicha birinchilikda borayotgan Ozodbek Nazarbekov 16,7% ovoz bilan ikkinchi boʻldi. 

Uchinchi oʻrin esa kutilmaganda Shahzodaga nasib etdi. Garchi bir necha yillik tanaffusdan keyin endi-endi oyoqqa turayotgan boʻlsada unga 68 kishi ovoz bergan.

Mos ravishda 11,8% va 11,2% ovoz toʻplagan Botir Qodirov va Jahongir Otajonovlar 4 va 5-oʻrinlarni egallashdi. 

Bugungi kunda yoshlarning eng suyukli xonandasi, kontsertlarini shou darajasiga olib chiqayotgan Oʻzbekistonda xizmat koʻrsatgan artist unvoni sohibasi Rayhon esa barchani ajablantirib 6-pogʻonaga joylashdi. Uning uchun bor-yoʻgʻi 38 kishi (7,4%) ovoz bergan.  Oxirgi pogʻonada esa Alisher Turdiyev (Fayz) oʻrin egalladi. 

Demak, natijalar tomoshabin baribir haqiqiy sanʼatni yoqlashini koʻrsatdi. Qariyb 6-yildan beri kontsert bermayotgan, kliplar teleekranlarda aylanmayotgan Yulduz Usmonovaning hali ham muxlislar tomonidan olqishlanishi shundan dalolat bermoqda.  Oʻtgan asrning 80 - yillari ikkinchi yarmida ommaviy ijodini boshlagan Yulduz Usmonova 2007-yilgacha Toshkentdagi "Istiqlol" sanʼat saroyida kontsert dasturini taqdim etgan. Eng koʻp 21 kungacha kontsert bergan sanʼatkor oʻsha yili jonli ijro uchun ikki haftadan ortiq davom etadigan kontsert ogʻirlik qilishini taʼkidlagani holda, keyinchalik dasturlarini 14 kundan oshirmagan edi. 

(Manba: http://darakchi.uz)