TADBIRKOR QIZLARNING ENG YaXShI LOYIHALARI ANIQLANDI

Mamlakatimizda ayollar tadbirkorligi va eng avvalo, qizlarning tadbirkorlik faoliyati bilan shugʻullanishlari uchun ragʻbatlantirish, ularda tadbirkorlik faoliyati koʻnikmalarini shakllantirish hamda huquqiy  bilimlarini oshirish boʻyicha kompleks chora-tadbirlar amalga oshirilmoqda.

Jumladan, Oʻzbekiston Xotin-qizlar qoʻmitasi hamkor tashkilotlar bilan birgalikda boshlangʻich bosqichlarda turgan, endi ish boshlayotgan xotin-qizlarga tadbirkorlikni oʻrgatish maqsadida turli oʻquv  kurslari tashkil etish, yosh oilalarga, tadbirkor ayollarga, shu jumladan, tadbirkorlik faoliyatini amalga oshirish  uchun kollejlarning bitiruvchilariga kreditlar ajratish, oilaviy biznes va hunarmandchilikni qoʻllab-quvvatlash jarayonlarida yaqindan yordam koʻrsatib kelmoqda.

Shu bilan birga kollejlarda bitiruvchi qizlarning mehnat huquqi va tadbirkorlik faoliyatini tashkil etishning huquqiy  masalalari  boʻyicha chuqur bilim va koʻnikmalarga ega boʻlishlariga koʻmaklashish maqsadida oʻquv-seminarlari tashkil etish orqali turli vaziyatlarda qanday qarorlar qabul qilishlari xususida yoʻnalishlar berilmoqda.

"Sogʻlom ona va bola yili” Davlat dasturida 2015-2016 oʻquv yilida  kasb-hunar kollejlari bitiruvchi qizlari oʻrtasida "Tadbirkor qizning eng yaxshi loyihasi – 2016” tanlovini oʻtkazish  va tanlov gʻoliblarini munosib taqdirlash vazifasi belgilangan.

Yaqinda tadbirkorlik sohasining "Ishlab chiqarish sohasidagi eng yaxshi loyiha”, "Servis sohasidagi eng yaxshi loyiha”, "Qishloq xoʻjaligi sohasidagi eng yaxshi loyiha” yoʻnalishlarini qamrab oladigan mazkur tanlovning tuman bosqichi oʻtkazildi.

Mangʻit Iqtisodiyot kolleji binosida boʻlib oʻtgan "Tadbirkor qizning eng yaxshi loyihasi - 2016” tanlovining  tuman bosqichida tumanimizdagi kollejlar bitiruvchi qizlari oʻz loyihalari bilan ishtirok etdilar.

"Sogʻlom ona va bola yili” Davlat dasturi hamda "Oʻzbekiston Respublikasida 2016-yilda fuqarolarning oʻzini-oʻzi boshqarish organlari faoliyati samaradorligini yanada oshirishga qaratilgan qoʻshimcha chora-tadbirlar Dasturi”da belgilangan vazifalarni amalga oshirish maqsadida Oʻzbekiston Xotin-qizlar qoʻmitasi, Oʻzbekiston savdo-sanoat palatasi, "Tadbirkor ayol” ishbilarmon ayollar assotsiyatsiyasi, Oʻzbekiston Respublikasi Markaziy banki, Oʻzbekiston Respublikasi kasaba uyushmalari Federatsiyasi Kengashi Rayosati, Oʻzbekiston "Mahalla” xayriya jamoat fondi va Oʻrta maxsus, kasb-hunar taʼlimi markazi qoʻshma qarori asosida oʻtkazilgan mazkur koʻrik-tanlovda ishtirokchi qizlarning belgilangan uchta yoʻnalish boʻyicha tayyorlagan loyihalari mutaxassislar tomonidan sinchiklab oʻrganib chiqilib, hakamlar hayʼatiga havola  etildi.

Koʻrik-tanlov Nizomiga muvofiq har bir yoʻnalish boʻyicha gʻoliblar aniqlanib, ularga koʻrik-tanlovning Qoraqalpogʻiston Respublikasi bosqichida ishtirok etishlari uchun yoʻllanmalar berildi.

Robiya YOʻLDOShEVA.