MILLIY OʻYINLAR – MILLAT FURURI

Xalqimizning asrlar osha yashab kelgan shunday milliy  oʻyinlari borki, ular yosh avlodning  jismoniy baquvvat, maʼnaviy yetuk boʻlib ulgʻayishiga xizmat qilib kelmoqda. Kurash – oʻzbeklarning milliy sport turi boʻlib, unda polvonlar bir-birining belidan olgancha or-nomus uchun kurashadilar. Xalq orasida kurash tushuvchi kuchli polvonlar juda hurmat qilingan, atrofdagilar ularga havas bilan qarashgan. Shuning uchun belini bogʻlab, kurash tushayotgan polvonlar xalq shodiyonalarining ardoqli mehmoni boʻlib kelgan.  Kurash qadimdan epchillik, chaqqonlik, chapdastlikni sinash musobaqalarining eng mashhur turlaridan biridir. Bu sport turida ishlatiladigan oʻzbekcha "chala”, "yonbosh”, "halol” iboralarini endilikda oʻzbek tilidan mutlaqo xabari boʻlmagan oʻzga yurt vakillari ham qoʻllamoqdalar. Bu har birimizga olam-olam gʻurur va iftixor tuygʻusini baxsh etadi. Shu gʻurur va iftixor bizni hech kimdan kam emasligimizni va hech kimdan kam boʻlmasligimizni taʼkidlab turadi.Farzandlarimizni ham mana shu gʻurur va iftixor tuygʻulari ruhida tarbiyalashimiz va ularni Vatani sharafi uchun bor kuchi bilan harakat qilishga oʻrgatishimiz lozim.

Arqon tortishuv, yogʻoch oyoqda yurish, qiz quvmoq kabi koʻplab milliy oʻyinlar qadim zamonlardan to shu bugunga qadar xalq orasida juda sevimli va ardoqli boʻlib kelmoqda. Ayniqsa bolalar va oʻsmirlar oʻrtasida xilma-xil serharakat "Oqsoq qargʻa”, "Oq terakmi - koʻk terak”, "Besh tosh”, "Roʻmol tashlashma” kabi koʻplab oʻyinlar hozirda ham bolalar tomonidan sevib oʻynab kelinmoqda.

Maqsadimiz – maktab oʻquvchilarini va yoshlarni oʻzbek xalq oʻyinlariga, jismoniy tarbiya va sport mashqlariga koʻproq jalb qilishdir.

Muhimi, millatimizning qadriyati boʻlmish xalq oʻyinlarini chuqur oʻrgatish, yanada ommalashtirish va farzandlarimizga ham bu milliy oʻyinlarimizni kelajakda uzluksiz, izchil davom ettirishga yordam berish, koʻmaklashishdir.

Chunki, tariximiz va urf odatlarimizni kelajak avlodlarimizga meros qilib qoldirishimiz, ularni koʻz qorachigʻiday avaylab-asrashga oʻrgatishimiz lozimdir.