OILAVIY POLIKLINIKA XIZMATIDAN AHOLI MAMNUN
Tibbiyot maskaniga salomatligidan shikoyati bor insonlar shifokorlardan najot kutib tashrif buyuradilar. Har qanday bemorga u murojaat qilgan shifokorning eng avvalo shirin soʻzlari taskin boʻladi va shifo topishiga umid uygʻotadi. Shundan soʻnggina bemor muolajalar yordamida salomatligini tiklab oladi.
Koʻp yillardan beri sogʻlikni saqlash sohasida faoliyat koʻrsatib kelayotgan shifokor Rustam Xidirboyev ham bemorlar dardiga davo topib, ularning salomatligi tiklanishiga hissa qoʻshib kelmoqda. Mutaxassisligi bolalar shifokori boʻlgan Rustam Xidirboyev 1981-88-yillarda Toshkent shahridagi Oʻrta Osiyo tibbiyot pediatriya institutida tahsil oldi. Oʻqishni tugatganidan soʻng tumanda ish faoliyatini silga qarshi dispanserda ftiziopediatr boʻlib ishlashdan boshladi. Bir yildan keyin bolalar poliklinikasida belgilangan hudud boʻyicha bolalar shifokorligi vazifasiga oʻtdi.
Mamlakatimiz mustaqilligining dastlabki yillarida oʻz ishini sidqidildan bajarayotgan Rustam Xidirboyevni "Qipchoq” qishloq vrachlik punktiga mudir qilib tayinlashdi. Zimmasidagi masʼuliyatni sharaf bilan ado etib kelayotgan Rustam Xidirboyev nafaqat qipchoqliklar uchun, balki "Choykoʻl”, "Toʻlqin”, "Daryoboʻyi”, "Uyshin” va "Beshtom” ovullarida yashovchi barcha aholi uchun qadrdon boʻlib qoldi. Chunki, aholi ichida kimni qanday dard bezovta qilsa, darhol mana shu maskanga tashrif buyurib, bu yerdagi shifokorlarning tezkor yordamlaridan bahramand boʻlmoqda.
– Prezidentimiz Shavkat Mirziyoyev sogʻlikni saqlash tizimini yanada takomillashtirish boʻyicha tegishli koʻrsatmalar berib kelmoqdalar, – deydi 1-sonli qishloq oilaviy poliklinikasi mudiri Rustam Xidirboyev. – Mazkur koʻrsatmalarga asosan tizim tubdan isloh qilinmoqda. Tumanimizda qishloq oilaviy poliklinikalarining tashkil etilganligini sohadagi islohotlardan biri sifatida eʼtirof etishimiz mumkin. Aholiga qulaylik yaratish va sifatli tibbiy xizmatga, birlamchi tibbiy-sanitariya xizmatiga boʻlgan ehtiyojini qondirish maqsadida amalga oshirilayotgan islohotlar xalqqa juda manzur boʻlmoqda.
Shu yilning may oyida ishga tushirilgan 1-sonli qishloq oilaviy poliklinikasida terapevt, pediatr, akusher-ginekolog, stomatolog, jarroh va ultratovush tashhisi boʻyicha mutaxassis-shifokorlar aholiga xizmat koʻrsata boshladi. Poliklinika "Salomatlik - 2”loyihasi boʻyicha tibbiy asbob-uskunalar bilan jihozlandi. Undan tashqari, poliklinikaga tez yordam mashinasi ham biriktirilgan.
Yaqin kunlar ichida tumanimizdagi poliklinikalarda yanada yaxshiroq qulayliklar yaratilib, ishdagi samaradorlik ortishiga imkon boʻladi.
Ozoda Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
