ELYoP MAShAPIPOV: YuPTBOShIMNING IShONChINI OQLAYMAN

Prezidentimizning Qoraqalpogʻiston Pespublikasiga tashriflarini qoraqalpoq xalqi koʻtarinki kayfiyat va sohalardagi ulkan oʻzgarishlar bilan kutib oldilar. Davlatimiz rahbari tashrif davomida Qoraqalpogʻistondagi ijtimoiy-iqtisodiy rivojlantirish boʻyicha belgilab berilgan vazifalarning ijrosini koʻrish bilan bir qatorda Nukus shahridagi zamonaviy koʻrinishda yangi qurilgan olimpiya va milliy sport turlariga ixtisoslashtirilgan oliy sport mahorat maktabida boʻlib, sportchilar faoliyatlari bilan yaqindan tanishdi va yutuqlarga erishgan sportchilarga qimmatbaho sovgʻalar taqdim etdi. Taniqli sport ustalari qatorida tumanimizdan yetishib chiqqan dzyudochi, Yevropa ochiq chempionati gʻolibi Elyor Masharipovga ham erishgan yutuqlari uchun “Malibu” avtomobilni sovgʻa qildi.

Yurtdoshimiz Elyor Masharipovning quvonchiga sherik boʻlib, taassurotlari haqida suhbatlashdik.
- Sportdagi yutuqlaringiz uchun Prezidentimiz tomonidan berilgan sovgʻani qabul qilganingizda koʻnglingizdan qanday tuygʻular kechdi?
- Men sportchilar oilasida voyaga yetganim sababli, bolaligimdan sportga qiziqdim. Otam Shomurod Masharipov sport murabbiysi boʻlgani uchun, eʼtibor berib shugʻullanishimga sharoit yaratib berdi. Onam ham doim gʻamxoʻrlik koʻrsatadi. Shularning sharofati va yurtimizdagi sport bilan shugʻullanishga yaratilgan keng imkoniyatlar tufayli, kurash sirlarini puxta egalladim. Bunda menga ustozim Chorsham Tajimurodov ham yaqindan  yordam berdi. Chirchiqdagi Olimpia zahiralari kollejida tahsil oldim. Oʻzbekiston chempioni boʻlishga muvaffaq boʻldim. Nufuzli musobaqalarda  sovrinli oʻrinlarni qoʻlga kiritdim. Bu yutuqlarim evaziga davlatimiz menga Qoraqalpoq Davlat jismoniy tarbiya fakultetiga imtihonsiz kirish imkonini berdi. Bu imkoniyatlardan samarali foydalanib, yanada koʻproq oʻrganishga intildim. Natijada dzyudo kurashi boʻyicha dunyo miqyosida oʻtkazilgan qator sport musobaqalarida nufuzli oʻrinlarni yengib oldim va yurtimizga gʻalaba bilan qaytdim. Prezidentimiz nomidan berilgan “Malibu” avtomobili sovgʻasini qabul qilib olayotganimda erishgan bu yutuqlarim arzimasdek koʻrindi. Endi bundan keyin oʻtkaziladigan musobaqalarga qattiq tayyorgarlik koʻrib, yurtimga bundan-da, koʻproq yutuqlar olib kelishga harakat qilishim kerakligi koʻnglimdan kechdi.   
- Mamlakatimizda sportni rivojlantirish boʻyicha olib borilayotgan islohotlarga, qoʻlga kiritilgan yutuqlarning yanada koʻpayishiga qanday hissa qoʻshmoqchisiz?
- Yurtimizda yaratilgan imkoniyatlar tufayli men sport  ustasi boʻlib yetishdim. Ayni paytda  Nukus shahridagi sport kollejida murabbiylik qilmoqdaman. Bu yerda 100 nafardan ziyod shogirdlarim bor. Men mana shu shogirdlarimga va yana koʻplab yoshlarga kurash sirlarini mukammal oʻrgatib, sport ustalari, polvonlar, chempionlar yetishtirib, sport sharafini yanada yuqori koʻtarmoqchiman. Yana Oʻzbekiston chempionatida 3 nafar shogirdimning yutuqqa erishganligini faxr bilan ayta olaman. Bugungi kunda davlatimizda jismoniy tarbiya va sport sohasida amalga oshirilayotgan islohotlar yoshlarning sogʻlom boʻlib voyaga yetishida va sport boʻyicha xalqaro maydonlarda qoʻlga kiritilayotgan yutuqlarning yanada koʻpayishida muhim oʻrin tutmoqda. Shunday ekan, men ham imkoniyat boricha mamlakatimiz sportini rivojlantirishga, munosib shogirdlar tayyorlab, Oʻzbekiston nomini dunyoga tanitishga harakat qilaman. 
- Kelgusidagi rejalaringiz qanday?
- Men doim yurtimizda sportga berilayotgan eʼtibor, yaratilayotgan sharoitlar, biz yoshlarga koʻrsatilayotgan gʻamxoʻrliklarga munosib boʻlishga intilaman. Prezidentimizning menga uchrashuv chogʻida “Bu hali sovgʻaning birinchisi, sendan kelajakda bundan ham katta yutuqlarni kutaman”, dedilar. Buni juda katta masʼuliyat sifatida qabul qildim. Keyingi yillarda mashqlarda jarohat olganligim sababli sogʻligim pasayib, musobaqalarda ishtirok eta olmayotgan edim. Salomatligimni tezroq tiklab, 2018-yilda oʻtkaziladigan Osiyo Chempionatida, 2020-yilda boʻladigan Tokio Olimpiadasida ishtirok etib, birinchilikni qoʻlga kiritishga harakat qilishim lozim. Xudo xohlasa, Oʻzbekiston bayrogʻini yuqori koʻtarib, Prezidentimning ishonchini va sovgʻani, albatta, oqlayman.
- Ezgu niyatlaringizga va muvaffaqiyatga erishingizni tilaymiz va barchamiz yutuqlaringizni kutib qolamiz.

Jurnalist Ozoda Xudoyberganova suhbatlashdi.