2017-yilda Amudaryoda salkam 39 mlrd. soʻmlik 250 loyiha ishga tushirildi

Amudaryo tumanini 2017-yilda ijtimoiy-iqtisodiy rivojlantirish, aholining turmush darajasini yaxshilash, tadbirkorlikni qoʻllab-quvvatlash orqali sanoat mahsulotlari ishlab chiqarish hajmini oshirish, servis va xizmat koʻrsatishni yanada yaxshilash, oziq-ovqat mahsulotlari yetishtirishni koʻpaytirish, qishloq xoʻjaligi sohasini rivojlantirish boʻyicha manzilli Davlat dasturiga kiritilgan 250 ta loyihalar ishga tushirildi. Mazkur loyihalarga qiymati 38 mlrd. 923 mln. soʻmlik investitsiyalar jalb qilindi. Shuning 15 mlrd. 537 mln. soʻmi loyiha tashabbuskorlari mablagʻi, 23 mlrd. 386 mln. soʻmi esa tijorat banklari kreditlaridir. Ushbu loyihalarning ishga tushirilishi tufayli 896 ta yangi ish oʻrni yaratildi.

2017-yilda tashkil etilgan “Amu-Shohjahongir” MChJ, “Mangʻit qurilish markazi” MChJ, “Jayxun gold tex” MChJ korxonalarida, shuningdek, faoliyat yuritayotgan MChJ shaklidagi “Amudaryotex” xorijiy korxonasini kengaytirish hisobiga eksportbop mahsulotlar ishlab chiqarish keng yoʻlga qoʻyilishi rejalashtirilgan.

2017-yilda sanoat sohasida 38 ta, xizmat koʻrsatish va servis sohasida 107 ta, qishloq xoʻjaligi sohasida 102 ta loyiha amalga oshirildi.

2018-yilda tumani boʻyicha mavjud korxonalarning toʻla quvvatlarda ishlashini taʼminlash barobarida 136 ta yangi loyihalarni amalga oshirish va 553 ta yangi ish oʻrinlarini yaratish rejalashtirilmoqda. Bu loyihalarga jami 89,417 mlrd. soʻmlik investitsiyalar jalb qilinadi. Shuning 47,930 mlrd. soʻmi tijorat banklari kreditlaridir.