Xalqaro Bolalar kitobi kuni munosabati bilan "Taraqqiyot koʻzgusi" gazetasi tahririyati viktorina oʻtkazdi
Xalqaro bolalar kitoblari kengashi tomonidan bolalarni kitobxonlikning ahamiyatini anglashga daʼvat etish maqsadida 1967-yilda 2-aprelni – Xalqaro Bolalar kitobi kuni sifatida nishonlashga qaror qilingan.
Bolalar kitobi kuni sifatida aynan shu sananing tanlanishi bejiz emas. Sababi, 2-aprel kuni jahon bolalarining sevib oʻqiydigan ertaklari muallifi Gans Xristian Andersen tavallud topgan kun. Ushbu sana shundan beri bolalar kitobxonligi targʻib etiladigan kun sifatida dunyo boʻyicha keng nishonlanadi.
Xalqaro bolalar kitobi kunida turli bolalar kitoblari koʻrgazmalari, tanlovlar, maʼnaviy-maʼrifiy tadbirlar, xilma-xil aktsiyalar oʻtkaziladi.
2-aprel kuni tumanimizda ham bolalar oʻrtasida kitobxonlik madaniyatini oshirish, ularning badiiy adabiyotga boʻlgan qiziqishlarini, kitob oʻqishga intilishlarini yanada kuchaytirish hamda hayotda ezgu maqsadlarga erishishda kitob eng toʻgʻri yoʻlni koʻrsatuvchi ishonchli doʻst ekanligini anglatish maqsadida “Taraqqiyot koʻzgusi” gazetasi muxbirlari va “Jayxun ilhomlari” nodavlat notijorat tashkiloti xodimlari oʻquvchi-yoshlar oʻrtasida soʻrovnomalar oʻtkazib, viktorina tashkil qildi.
Viktorinada oʻquvchi yoshlarga 2-aprel – qanday kun sifatida nishonlanishi, yurtimizda kitobxonlik madaniyatini oshirish va targʻib qilish boʻyicha qanday chora-tadbirlar koʻrilayotgani, qanday tanlovlar oʻtkazilayotgani, bolalarning qancha kitob oʻqiganligi va qanday kitoblarni koʻproq mutolaa qilishga qiziqishlari haqidagi savollar berildi va faol qatnashgan yoshlarga kitoblar sovgʻa qilindi. Yoshlarimizning bu savollarga qanday javob berganligiga guvoh boʻlib, shunga amin boʻldikki, ular hali yetarli darajada kitob oʻqiyapti, deya olmaymiz. Bu esa kitobxonlikni targʻib qilish boʻyicha tadbirlar koʻlamini yanada oshirish va kutubxonalarda kitoblar sonini koʻpaytirish, yoshlarni kutubxonaga jalb etish, qolaversa, oilada ota-onalar ham farzandlariga kitob oʻqishlariga imkoniyat yaratishlari zarurligidan dalolat beradi.
Kitob – hayot yoʻlini yorituvchi yorqin mashʼala. Kitob bilan doʻstlashish insonni yuksaklikka olib chiqadi va unga jahonni tanitadi. Shu bilan birga kitoblar zamon va elat tanlamasdan, doimo insonlarga hamroh boʻlib kelgan. Buni yosh avlodga ham anglatib, ularni kitobga oshno qilish, bolalarimizning komil inson, kelajakning munosib egalari boʻlib voyaga yetishlariga zamin yaratish – har birimizning asosiy vazifamiz.
Ozoda XUDOYBEPGANOVA
(Foto: Fikr.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
