Katta sport musobaqalarida maktab taʼlimining oʻrni katta

Tumanimizdagi 36-sonli maktab oʻquvchilari uchun har yili bahor oylari turli sport oʻyinlari mavsumiga aylanadi. Sinflararo boʻlib oʻtadigan turli sport musobaqalari maktab birinchiligi uchun keskin va doʻstona bellashuvlarga imkon yaratadi.

– Maktabimizda bahorgi sport musobaqalari Navroʻz bayrami arafasida qizgʻin tus oldi, – deydi maktab jismoniy tarbiya rahbari Soliy Yoʻldoshev. – Beshinchi sinfdan oʻninchi sinfgacha boʻlgan oʻquvchi-yoshlar oʻrtasida stol tennisi va shaxmat sporti boʻyicha oʻtkazilgan musobaqalarda barcha sinflarning oʻquvchilari ishtirok etdilar.

Maktab oʻquvchilari orasida sportning shaxmat turiga qiziquvchilar koʻpchilikni tashkil etadi. 5-7-sinflar oʻquvchilari oʻrtasida oʻtkazilgan musobaqalarda 5-sinf oʻquvchisi L. Nurillayeva, 7-sinf oʻquvchisi R. Allaberganov, 9-sinf oʻquvchisi S. Qurbonboyevlar faxrli 1-oʻrinni egallashdi. 5-sinf oʻquvchisi A. Boltaboyev, 6-sinf oʻquvchisi L. Boboniyozova, 8-sinf oʻquvchisi I. Karimovlarga ikkinchi oʻrin nasib etdi.5-sinfdan D. Ashirov, F. Habiyeva va 9-sinfdan M. Shomurodovlar 3-oʻrinni oldilar.

Shuningdek, stol tennisi boʻyicha oʻtkazilgan sport musobaqalari ham hayajonli daqiqalarga boy boʻldi. Musobaqa yakunida 5-7-sinflar oʻrtasida Sh. Soliyev 1-oʻrinni, R. Allaberganov 2-oʻrinni, S. Ametov 3-oʻrinni olgan boʻlsa, 8-10-sinflar oʻrtasida 1-oʻrin U. Qozoqboyevga nasib etdi. J. Matniyazov 2-oʻrin, J. Yoʻldoshev esa 3-oʻrin sohiblari boʻlishdi.

–Bunday musobaqalar oʻsib kelayotgan yosh avlodni katta sport musobaqalariga tayyorlashda muhim ahamiyatga ega, – deydi maktabning jismoniy tarbiya fani oʻqituvchisi M. Qurbonboyev. – Chunki bola birdaniga keng miqyosdagi musobaqalar gʻolibi boʻla olmaydi. Boshlangʻich sport taʼlimini maktabda puxta egallagachgina katta sport sari qadam qoʻyadi. Shuning uchun maktabda oʻtkazilgan sinflararo bellashuvlarning sportchi-yoshlarni tarbiyalashdagi roli juda katta.

Dildora Abdurahmonova.