ISTIQLOL - NURLI KELAJAKKA YeTAKLOVChI KUCh

1991-yil 1-sentyabr. Bu Oʻzbekiston istiqlolga erishgan kun sifatida eng qutlugʻ, eng aziz sanaga aylandi.

Istiqlol davlatimiz asosini qurish, ijtimoiy yoʻnaltirilgan bozor munosabatlarini shakllantirish, milliy ongimiz va maʼnaviyatimizni yuksaltirish, yurtimizda yashayotgan har bir inson uchun munosib hayot tarzini yaratish, jahon hamjamiyatidan munosib oʻrin egallash imkonini berdi.           

Istiqlol tafakkurimizda tub burilish yasadi. Mustaqillik magʻzini anglash, mustaqil yashash mohiyatiga yetish, shunga moslashish va koʻnikish kayfiyatini paydo qildi.

Oʻzbekistonning oʻz maqsadlari va rejalari, har qanday davlat havas qilsa arzigulik boy imkoniyatlarga ega ekanligi qalblarimizni gʻururga toʻldiradi va ishlashga, yaratuvchanlikka, bunyodkorlikka undaydi. Oʻzbekiston shuhrati har birimizning shuhratimizga aylandi. Vatan farzandi, shu mamlakat fuqarosi ekanligimizdan chinakam faxrlanish baxtiga muyassar boʻldik, xalq sifatida aslimizga qayta boshladik. Tariximiz, milliy qadriyatlarimiz, milliy maʼnaviyatimiz asoslarini oʻrganishga, ularni oʻzimizniki qilishga erishdik. Tarixga munosabat oʻzgardi, tarixni hayotimizning ajralmas bir boʻlagi deb tushunadigan boʻldik.

Qadriyatimizni qayta tiklashda yana bir muhim masalaga alohida eʼtibor qaratildi. Bu - insonparvarlik mezonidir. Chunki insonni, uning hayotini, sogʻligini, haq-huquqlarini birinchi darajaga qoʻyish mamlakatimiz siyosatining muhim yoʻnalishi hisoblanadi.

Bugun milliy mafkuramiz tomirlari mustahkam va sogʻlom. Inson maʼnan qancha yuksak boʻlsa, boshqalarni, ularning fikrini, fazilatlarini shuncha qadrlaydi.

Hozir xalqimiz orasida sogʻlom hayot, sogʻlom avlod, sogʻlom fikr uchun kurash boshlandi.

Shu asosda komil inson tarbiyasi masalasi, Prezidentimiz qayta-qayta uqtirayotganidek, bizda davlat siyosatiga aylandi.

Oʻzbekistonimiz tarixan juda qisqa fursatda yana dunyo bilan bogʻlandi. Oʻz oʻrni va mavqeini topdi.

Tarixdan maʼlumki, bizning xalqimiz bashariyat taraqqiyoti  va rivojiga ulkan hissa qoʻshgan 13 ta mamlakatlarning biri hisoblanadi.

Biz bu bilan faxrlanamiz.

Istiqlol - bizning fikrimizni va qalbimizni tozaladi. Yoʻlimiz toʻgʻri va haq. U bizni taraqqiyot yoʻllari boʻylab yetakladi. Oʻzbekiston boshqalar havas qiladigan davlatga aylandi.

Yurtboshimiz  taʼbiri bilan aytganda: "Oʻzbekiston kelajagi buyuk davlatdir”. Ha, bizni kelajakda nurli manzillar kutmoqda.

P.Matchanova.

1-son tuman Davlat notarial idorasi notariusi, II darajali huquqshunos.