Jayhun ilhomlari

KELAJAK EGALARIGA

Kecha chiviqlarni ot qilib minib,

Shovqin-suron solib yurgan bolalar.

Bugun aʼlo xulqli oʻquvchi boʻlib,

Dono muallimdan saboqlar olar.

Hozir osmon sari parvozga shaylab,

Varrak yasayotgan bu jajji qoʻllar.

Ertaga Marsni zabt etmoq uchun,

Kosmik kemalarni samoga yoʻllar.

Bungacha Andersen ertaklariday,

Sehrli olamda yayragan koʻngil.

Xalqning xizmatiga yaramoq uchun,

Toblab boraverar oʻzin yilma-yil.

Kattalar kichiklar ongin boyitib,

Aytib bersa qancha doston-ertaklar.

Kamolga yetganda ushbu farzandlar,

Xalqin porloq turmush sari yetaklar.

Bolalar! Sizlarni baxtiyor koʻrsak,

Dillarda toshadi quvonchlarimiz.

Sizning kamolingiz koʻrib ortadi,

Kelajakka boʻlgan ishonchlarimiz.

“Oʻzbekiston - yurtim”!- degan har farzand,

Diliga jo qilsa ilm-ziyoni.

Vatan ravnaqiga-ravnaq qoʻshilib,

Maftun qilaverar butun dunyoni.

Ahmad NAFASOV,

«Jayxun ilhomlari» NNTraisi.

 

ShUKUR ET

Bugun sochlaringni qoplasa qirov,

Ahvoling nima, deb soʻrmasa birov.

Sotib ololmasang bir aso – tayov,

Olgan har damingga shukrona keltir!

Boshingni silovchi Haqning oʻzi bor,

Yemoqqa, ichmoqqa rizq-u roʻzi bor,

Sabrli bandaga aytar soʻzi bor:

«Oʻtgan har damingga shukrona keltir!»

Bemor boʻlib qolsang, esla otangni,

Tobutin koʻtargan oʻsha motamni.

Doʻstim, artgin bugun koʻzdagi namni,

Oʻtgan har damingga shukrona keltir!

Yodingdan chiqmaydi yoshlik chogʻlaring,

Tirmashib oʻynagan oʻrik bogʻlaring.

Koʻkka boʻy talashgan Jumurtogʻlaring–

Shular borligiga shukrona keltir!

Jannatday yurting bor – jon Oʻzbekiston,

Erki bor, oʻziga xon – Oʻzbekiston,

Fallaga, paxtaga kon – Oʻzbekiston! –

Shunday Vataningga shukrona keltir!

Shu yurtda yashadim, shukrim koʻp, hayhot,

Yurtimni boshqarar Xudo bergan zot!

Oʻtgan kunlaringga sabr etib Farhod,

Olgan nafasingga shukrona keltir!

Farhod AVEZOV.

 

TEMUR BOBOM

Temuriylar maktabi,

Qad rostladi yurtimda.

Temurbekning qoni bor

Yurak urar koʻksimda.

Buyuk siymo u – aziz,

Mislsiz jasoratda.

Yengilmay oʻtgan hargiz,

Tengsizdir salobatda.

Kelmoqda shunday zamon,

Hurriyatdir bardavom.

Qoldiramiz albatta,

Ajdodlardek yaxshi nom.

Amir Temur –mard inson,

Goʻzal yurtim oʻgʻloni.

Gʻunchalab ochilmoqda,

Izi qolgan tuprogʻi.

Temur bobom eng jasur,

Adolatda hukmron.

Iftixordan dil masrur,

Izdoshingizmiz, bobom!

Dogʻ koʻrmaydi nomingiz,

Biz fidoyi farzandlar.

Eʼzozlar pok shaʼningiz,

Mangu sodiq avlodlar!

Dildora RAJABOVA, “Bogʻ” mahallasi.

 

OTA-ONAMGA

Onajonim, yuragimdan

Sizga atab sheʼr yozdim.

Yashamoq zavqi bilan,

Qanotimni keng yozdim.

Sizni yaxshi koʻraman,

Dadamni ham, albatta.

Bagʻringizga toʻlaman,

Har lahza, har soatda.

Quvonchimni koʻrganda,

Oromga chulgʻanasiz,

Baʼzan maʼyus tortganda,

Qaygʻurib, toʻlgʻonasiz.

Sizlardir keng osmonim –

Boshimda soyabonim.

Raʼno Ismoilova,

Amudaryo xizmat koʻrsatish va servis kasb-hunar kolleji oʻquvchisi.

 

USTOZLAR NASIHATI

Ustozlarim maktabda,

Bilimli boʻl, deydilar.

Ilm olsang, albatta,

Ochiqdir yoʻl, deydilar.

Uyda ota-onangga,

Eng yaqin yordamchi boʻl.

Ham akang-u opangning

Dil toʻla quvonchi boʻl!

Kattalarni koʻrganda,

Eʼtiborli boʻl, derlar.

Koʻchada duch kelganda,

Ularga ber yoʻl, derlar.

Ustozlar nasihatin,

Yuragimga joyladim.

Har bitta soʻz, hikmatin

Maʼnosini angladim.

Robigʻa ShOMURODOVA, 64-sonli maktab oʻquvchisi.

 

Bahor

Vatanga keldi bahor,

Bogʻ-u dala chamanzor.

Gullarim sochdi ifor,

Orolandi har makon.

Bogʻlar qiygʻos gulladi,

Qushlar salom yoʻlladi,

Goʻyo koʻklam siyladi,

Zebolandi Yer, Osmon.

Qushchalarga in qurdim,

Tongda varrak uchirdim,

Elni mehnat-la koʻrdim,

Yashillandi toʻrt tomon.

Mahliyo BOZORBOYeVA, 78-maktabning 4-sinf oʻquvchisi.