Xalq deputatlari Amudaryo tuman Kengashining yigirma sakkizinchi sessiyasi toʻgʻrisida AXBOROT

2013-yil 27-sentyabr kuni xalq deputatlari tuman Kengashining yigirma sakkizinchi sessiyasi boʻlib oʻtdi. Sessiyada tuman Kengashi deputatlari, hokim oʻrinbosarlari, hokimlik masʼul xodimlari, hokimlik boʻlimlari va jamoat tashkilotlari rahbarlari hamda ommaviy axborot vositalari vakillari ishtirok etdilar.

Sessiya kotibligiga "6-Boʻston” saylov okrugidan deputat Karimboy Atajanov saylandi.

Sessiya kun tartibiga "Fuqarolar yigʻinlari raislari (oqsoqollari) va ularning maslahatchilari sayloviga tayyorgarlik koʻrish hamda uni oʻtkazish toʻgʻrisida”gi masala havola qilindi.

Qoraqalpogʻiston Respublikasi Konstitutsiyasining 99-moddasiga, "Fuqarolarning oʻzini oʻzi boshqarish organlari toʻgʻrisida”gi Qoraqalpogʻiston Respublikasi Qonunining 23-moddasiga, «Fuqarolar yigʻini raisi (oqsoqoli) va uning maslahatchilari saylovi toʻgʻrisida»gi Qoraqalpogʻiston Respublikasi Qonunining 8-moddasiga muvofiq, fuqarolarning oʻzini oʻzi boshqarish organlari raislari (oqsoqollari) va ularning maslahatchilarining vakolat muddatining 2013 yil noyabr-dekabr oylarida tugashi munosabati bilan Oʻzbekiston Respublikasi Oliy Majlisi Senati Kengashining 2013-yil 12-sentyabrdagi KQ-90-II-sonli hamda Qoraqalpogʻiston Respublikasi Joʻqorgʻi Kengesi Prezidiumining 2013-yil 23 sentyabrdagi 244-sonli qarorlari qabul qilindi va saylov oʻtkazish muddati shu yilning noyabr-dekabr oylari qilib belgilandi.

Saylovlar mamlakatimizdagi 9756 ta, Qoraqalpogʻiston Respublikasidagi 401 ta fuqarolarning oʻzini oʻzi boshqarish organlarida boʻlib oʻtadi. Tumanda faoliyat yuritayotgan 1 ta shaharcha, 16 ta ovul, 19 ta ovul fuqarolar yigʻini tarkibidagi mahalla va shahardagi 11 ta mahalla fuqarolar yigʻinlarida 47 nafar oqsoqol va ularning 420 nafardan ortiqroq maslahatchilari saylanadi.

Sessiyada kun tartibidagi masala yuzasidan ishchi guruh tomonidan tayyorlangan xalq deputatlari tuman Kengashining qarori loyihasi oʻqib eshittirildi. Deputatlar qaror loyihasini bir ovozdan maʼqullab, tasdiqladilar. Tuman Kengashi qarori bilan tuman hududida fuqarolar yigʻinlari raislari (oqsoqollari) va ularning maslahatchilari saylovlarini tashkil etish va oʻtkazish boʻyicha tadbirlar rejasi tasdiqlanib, saylovni tashkil etish hamda oʻtkazishga koʻmaklashuvchi tuman komissiyasi tarkibi eʼlon qilindi.

Shuning bilan sessiya oʻz ishini yakunladi.