EʼTIBORGA LOYIQ MEHNAT QILAMIZ
"Boʻzyop” ovulida joylashgan bizning 10-sonli umumtaʼlim maktabimizda ayni kunda 414 nafar oʻquvchilarga 60 nafar malakali oʻqituvchilar taʼlim-tarbiya bermoqda. 2009-yilda kapital rekonstruktsiya qilingan maktabimizda oʻquvchilarning fan asoslarini chuqur egallashlari uchun barcha sharoitlar bor. Fan xonalari bugungi kun talabiga muvofiq jihozlangan. Maʼnaviyat xonasi doimo oʻqituvchilar va oʻquvchilar bilan gavjum boʻladi. Bu yerdagi turli badiiy, ilmiy ommabop kitoblar, vaqtli matbuot nashrlarini mutolaa qilish hammamizning sevimli mashgʻulotimizga aylangan.
Maktabimizda 12x24 metr hajmdagi zamonaviy sport zalining qurilib foydalanishga topshirilganligi oʻquvchilarning ayni koʻnglidagi orzularining ijobati boʻldi. Bu yerda ular boʻsh vaqtlarida sportning oʻzlari xohlagan turlari bilan shugʻullanadilar. Tumanimizda oʻtkazilayotgan turli sport musobaqalarida oʻquvchilarimizning muvafaqqiyatli qatnashayotganliklari bejiz emas.
Taʼlim-tarbiya jarayonining samaradorligiga erishish uchun oʻqituvchilarimizning oʻz ustlarida ishlashlari va bilimlarini oshirib borishlariga ham intilayapmiz. Axir bugunning bolasining diqqat-eʼtiborini yuksak maʼnaviyatli, maʼrifatli, oʻz sohasining bilimdoni boʻlgan, axloqli va odobli oʻqituvchigina qozona oladi. Bolaga doʻstona munosabat qaror topgandagina darsda oʻquvchi oʻzini erkin tuta oladi, fikrlarini oʻrtaga tashlay oladi.
Bugungi kun oʻqituvchisi bolalarga taʼlim-tarbiya beribgina qolmay, ularning intellektual salohiyatini oshirishga, qiziqishlarini aniqlab, rivojlantirishga koʻmaklashuvchi shaxs hamdir.
Maktabimiz oʻqituvchilarining bu boradagi saʼy-harakatlari natijasida oʻquvchilarimiz turli koʻrik-tanlovlarda oʻz iqtidorlarini namoyish qilishayotir.
Yurtboshimiz oʻqituvchilarga, "Oʻqituvchi nainki sinfxonasiga fayz va ziyo olib kiradigan balki, ming-minglab qalblarga ezgulik yogʻdusini baxsh etadigan moʻʼtabar zotdir”, deya taʼrif berganlari har birimizning qalbimizga faxr va gʻurur bagʻishlaydi.
Yurtboshimizning tashabbusi bilan 1-oktyabr – Oʻqituvchilar va murabbiylar kuni, umumxalq bayrami qilib belgilanganligi zimmamizdagi gʻoyat masʼuliyatli vazifamizni sidqidildan ado etishga undaydi.
Fursatdan foydalanib tumanimizning barcha oʻqituvchilarini kasb bayrami bilan tabriklayman.
Gulasal MATYoQUBOVA,
10-sonli umumtaʼlim maktabi direktori, Qoraqalpogʻiston xalq taʼlimi aʼlochisi, xalq deputatlari tuman Kengashi deputati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
